大埔七約
大埔七約係香港大埔區裏面嘅七條村落（地區），分別係泰亨約、林村約、翕和約、集和約（即沙羅洞）、樟樹灘約、汀角約、粉嶺約，全部都係非鄧姓嘅村落。
喺清嘉慶期間，大埔以北嘅泰亨村文氏計劃喺「大步墟」起樓同埋開舖頭，但係受到大埔頭鄧氏家族嘅強烈反對。光緒十八年 (1892年)，新安知縣就裁定「大步墟」係鄧氏嘅稅地，其他嘅氏族唔可以喺度起舖，而且更立碑喺天后廟裏面。
以文氏為阿頭嘅七約，同年就喺「大步墟」（大埔舊墟）嘅對岸成立咗「太和市」（大埔新墟）。同時間「大埔七約鄉公所」亦正式成立，鄉公所辦公嘅地方就喺富善街裏面嘅文武廟。為咗方便鄉民往返林村河兩岸，七約喺1896年重修由「太和市」去林村河北岸嘅「廣福橋」。之後九廣鐵路英段喺「太和市」起個大埔墟火車站，太和市嘅發展就大大超越「大步墟」。