大埔超級城

大埔超級城係香港新界大埔區裏面最大嘅購物中心，喺大埔安邦路8同10號，佔地60多萬呎，可以分成A至到E區，裏面有幾間食肆、時裝連鎖店、百佳超級廣場同埋一田百貨。

大埔超級城 C 區「美食坊」地下成日用嚟做宣傳活動嘅場地

大埔超級城裏面嘅百佳超級廣場

地理上睇，大埔超級城喺成個大埔新市鎮嘅正中間，所以大埔區居民去超級城買嘢算幾方便。不過，因為遠離鐵路車站，所以唔能夠好似新城市廣場、上水廣場、apm或者太古城中心嗰類鐵路沿線嘅商場咁，吸引到其它區嘅市民，人流主要係大埔區嘅居民。

歷史

• A 區分為上下兩層，下層有漢城燕窩大藥房（前身係超群餅店）同吉野家、7-Eleven等等舖頭，而上層就有萬寧、食肆大家樂同必勝客。

• B 區嘅迎囍大酒樓同和民居食屋現址，前身係已經執笠嘅敦煌酒樓，喺亞洲金融風暴同埋沙士之前，啱啱係飲食業最好嘅時期，當時敦煌租咗兩層，原本係全大埔區最大型嘅酒樓，之後來因財政困難而執笠。原本嘅地方分拆出而家兩間食肆。大型百貨公司一田（前身吉之島喺2010年7月18號執咗），書店大眾書局（喺2007年中搬去D區），幾間食肆同時裝店都喺呢區開業。

• C 區係上下兩層屬餐廳同時裝集中地，人流亦係繼B 區成第二旺區域。地下亦有舞台，每逢大型節日都會舉行活動或者請明星表演去吸引其他地區市民。

• D 區前身係摩登市集，但係環境同出租率一直唔多好，而且舖頭太少（只有一層），所以無人問津。直至新鴻基將佢重建，再加上百佳租用其中半邊，情況先至得到改善。2003-04 年間百佳對面多數係西醫醫務所，2005年開始已經搬到 E 區，原址而家係各間商舖。

• E 區上層前身係綠葉幼稚園，後來搬去呢區地下嘅一半舖位，另一半係直銷中心有限公司。上層吉咗用嚟起商舖同西醫醫務所。

交通

• A 區嘅北面有巴士總站，係大埔區其中一個交通樞紐。
• 港鐵巴士：
  • K12，大埔墟站 ↔ 大埔八號花園，喺 B 區對出嘅太和路有中途站
  • K14，大埔中心 → 大埔墟站，每日朝早 7-10 點喺 B 區太和路車站出發，即係 K12 中途站
  • K17，大埔墟站 ↔ 富善，由火車站出發嗰陣，喺 D 區對出嘅南運路有中途站

隔籬商場

• 大埔廣場

東、南、西面向係大埔超級城嘅 C、B、A 區，全部有行人天橋連接

• 昌運中心

喺 A 區嘅西面，有行人天橋連接

• 翠屏商場

喺 A 區的西北面，即係昌運中心嘅正北面，有行人天橋連接

• 寶湖商場

喺 E 區南面，有行人天橋連接

• 新興花園商場

喺 D 區東面，即係南運路對面嘅馬路，有行人天橋連接

連去

• 大埔網站
• 大埔超級城
• facebook專頁