大東門 (廣州)

2016年，廣州迎春花市越秀區會場北門臨時牌樓，仿明清時期大東門個款整嘅。

大東門（粵拼：daai6 dung1 mun4）係廣東廣州一笪地方，喺越秀區中山三路同東濠涌交界附近。喺大宋到明清時期，呢度係廣州城東邊大門，亦係廣州古城八個城門之一。雖然城門喺1920年開馬路嗰時拆咗，但到而家「大東門」都係呢處地名。

史

大明洪武年間，由於廣州城擴建，將之前喺芳草街一帶嘅東城街搬到而家越秀北、中路一帶，重喺豪賢路整咗北城墻。而東城墻重喺而家越秀路一帶，重喺越秀中路同中山四、三路交界位整咗大東門。嗰時為咗加強城市嘅防禦能力而開多咗三個門。明清時期位置一直冇變過。

大清尾時，由於嗰時民眾反映話行一段路撞到成10幾米高嘅城墻，加上開放時間只限每日朝早六點到晚黑九點，入廣州城啲人好多時都排長龍，從而加劇咗要推冧城墻嘅講法。廣東諮議局聽到民眾反映熱烈之後，民國2年（1913年）2月開咗大會議通過咗拆除城墻嘅決議，但嗰時冇乜錢而嗌咗好多坐緊監啲疑犯去拆而導致工期太慢。

1918年，嗰時廣州凈得市政公所，主管魏邦平組織一大堆民工同居民攞鋤頭同鏟嚟掘同揼城墻，搞到成街泥而引起民眾好多怨氣。1921年，廣州正式成立市政府之後，孫文個仔——孫科派到廣州做市政廳長，之後重請埋其他5位留學生做廣州市政㕔屬下嘅6個局長，而新到任嘅政府班人開始搞徹底拆除城墻嘅工作。由於廣州拆城墻時俾市政公所時期班友搞咗好多蘇州屎同手尾，程天固先搵咗拆城墻啲承建商一齊傾過，重訂埋合同，要喺限期內清嗮啲手尾。而空出嚟啲地等城建班人馬規劃好新路之後，將路基兩邊啲地變賣或由拆城啲商人承包做之後嘅清手尾啲收入。過咗幾個月，蘇州屎冚唪唥清走嗮，碎石攞咗嚟整馬路。而工期用咗唔夠一年搞掂嗮。原先嘅城門同城墻分別變成越秀路同中山三路周邊嘅住宅。

附近交通

• 電車：

  大東門站

• 巴士：

  大東門站

• 地鐵：

  廣州地鐵1號綫：農講所站或烈士陵園站

連出去

• 〈廣州舊墻發現民國時期香煙廣告大幅美女圖〉 (繁體中文).
• 〈中山三四路擴建工程完成 傳統商業街風貌將延續〉 (簡體中文). 南方日報.
• 〈穿越广州古城门：20年代的拆城运动〉 (簡體中文). 今日头条.