座標: 23°07′21″N 113°16′23″E / 23.1225°N 113.273°E / 23.1225; 113.273

唔同時段,東濠涌嘅景。
日頭嘅東濠涌
晚黑嘅東濠涌

東濠涌粵拼dung1 hou4 cung1郵政式拼音:Tung Ho Chung)係廣州一條護城濠,從麓湖西南邊開始,一直流到而家江灣大酒店附近,流入珠江

地理

原流域同會水[1]

  • 上游:由三度過水坑匯流,每個都長三百米左近。其中北接百步梯白雲山)嘅流水,東接長腰嶺、百足崗、大窩山嘅流水,西接馬鞍嶺、銀魚崗、唐帽崗嘅流水,落去南邊接屐釘嶺、鵝髻嶺、圓砲台。到咗越秀山嘅東部,就同金釵嶺、七星嶺、葵蓬崗嘅流水交匯,經小北門過咗潼關,就入咗廣州城嘅六脈渠。呢一段全長大概有4.5公里,流速係22.65立方米/秒。
  • 淘金坑段:呢段喺錢路頭造幣廠南,同東濠嘅主流交匯。呢段嘅水源係北郊嘅幾十個山坑啲流水一齊到馬鞍崗北度會埋嘅。北邊係接坡狗窿、子龍山、崩崗、黃家山、金釵嶺嘅流水,東邊係接黃花崗、羅(?)崗、上下墳頭崗、烏龍崗、青菜崗、和尚崗嘅流水,西邊係接番鬼山、下塘崗、北校場、巴山嘅流水。呢一段嘅流速係9.23立方米/秒。
  • 法政路脈渠玉帶濠:係以左第二脈正渠做主,有三路嘅脈渠相會,一個係小北十八洞嘅流水,一個係經飛來廟、雙槐洞、九如坊、法政路嘅濠涌,夾埋德宣東路、天官里嘅一路水,喺潼關度會入東濠。而玉帶濠嘅東流線,就經東水關橋會入東濠。最尾係經萬福路,接埋竺橫沙涌嘅流水入珠江。呢一段全長大概有2.5公里。

呢家嘅路線

全長4.5公里,闊7~11米,流域面積係11.1km²。最先喺白雲山下邊嘅麓湖開始,先經過麓景路,去到恆安路口嘅廣東省皮膚病醫院門口就轉入地底。跟住到北較場路口出返地面,經過17中附近,之後喺北園酒家後邊條街差唔多喺越秀北路附近入地底。跟住到越秀橋出返地面,一直向南流,經過大東門東華西路三角市越秀區第二中醫醫院40中越秀南路白雲樓,最後喺江灣大酒店附近、江灣大橋底流入珠江。

喺好耐之前[咩時候?],東濠涌係珠江一條天然支流,源頭就喺白雲山嘅甘溪同文溪附近,一直去到而家嘅法政路附近。喺嗰時,條河闊而深,通船都得。一直到明朝為止,佢係廣州城東邊嘅主要交通樞紐。由於佢嘅水質比較靚,亦係嗰時廣州居民一條主要供水渠。但到咗清朝,由於白雲山環境俾人大面積破壞,搞到甘溪同文溪都冇嗮水。到20世紀中,水質非常之污濁,附近居民都叫東濠涌做「臭涌」。條涌臭到兩邊住戶都唔夠膽開窗。

21世紀初,廣州市政府開始整治市內河道。2008年,開工整返成條東濠涌嘅下游出嚟。2010年6月整好1.89km嘅地面河段。而時隔1年又3個月,就喺越秀北路附近搞二期嘅揭蓋復涌工程,2015年2月13號搞掂咗從麓景十字路口附近到越秀橋附近嘅流域,麓湖公園西南邊附近嘅河直到2015年5月初先至全面完工。[未記出處或冇根據]

沿線古蹟

整理東濠下游碑記

係喺2002年7月評定咗做廣州嘅市級文物保護單位,由民國時期嘅市政當局立起嘅,家下文氏石碑仲喺越秀橋西側,但碑文度嘅「市長劉公紀文」、「工務局局長文樹聲」落款喺文革畀啲友鏟走咗。

碑文嘅全文如下:

粵城設置肇始于周赧王,時越人公師隅所築之南武城,歷時二千餘載,濠渠淤塞事所常有,雖歷代有所浚,第多因陋就簡,只顧目前,無一勞永逸之策,以故水患疊見,而東濠則尤甚焉,民國二十有一年七月二十九日廣州市大雨竟夕,東濠上游山洪暴發,小北區域首當其衝,塌宇傷人遽罹浩劫,百年以來未嘗有也,翌歲秋,複遭巨浸,為患無已,補牢之舉,自不容緩,興利除弊,責在有司。二十有二年冬,樹聲忝長工務,謀為市民安居弭患,即致力修治渠務,乃秉承▇▇▇▇▇▇(市長劉公紀文)意旨籌集款項,繕治圖則,幾十餘月始克竣事。爰於二十有四年秋,舉工事自築橫沙以迄雙眼橋,濠長凡萬尺,阻者寬之,淤者浚之,分級跌流,以殺激湍,並於濠旁拓築行路以示濠界,而利往來,複於潼關築口,建置活閘以壓倒流。濠有橋凡五,曰竺橫沙橋、曰小東門橋、曰東華路橋、曰大東門橋、曰越秀橋,而橋孔皆隘,宣洩維艱,故皆夷而新之,斯橋其一矣,此皆下游之工事也。至若擴而充之,鑿溝以泄河源,築壩而成涵湖,利用山洪,以資灌溉,斯則上游工事之設施更為完美然,亦未可視為緩圖也。茲因橋成,爰紀其要,以勒貞瑉。  

中華民國二十四年十一月 ▇▇▇▇▇▇▇ (工務局局長文樹聲)撰並書


小東門橋

2008年12月評定咗做廣州嘅市級文物保護單位。喺越秀南路三角市,橫跨咗東濠湧,宋代起橋陣係用巨石搭出嚟嘅,原初叫東高橋,到明代改名做永安橋。喺民國25年(1936)改建成鋼筋混凝土結構梁式橋,改埋叫小東門橋。陰刻嘅「小東門橋」字由時工務局長文樹生題寫。

沿岸建築

高架橋

內文: 東濠涌高架橋

1991年,廣州市政府為咗解決市區中心成日大塞車嘅問題,順著東濠涌架空起條高架橋,1994年7月起好。

博物館

內文: 東濠涌博物館

2008年,廣州市政府開始大舉治理東濠涌污水問題。東濠涌博物館係呢次工程一部分,喺2010年10月28號正式免費開放。佢重係中國內地第一間以河做主題嘅博物館。[未記出處或冇根據]

  • "亞運改變生活 憶苦思甜暢「游」東濠涌" (中文). 網易房產. 2010年.
  1. 新廣州建設概覽 1949