西灣 (西貢)

西灣係香港新界西貢區出名嘅海灘，西貢大浪灣「四灘一尖」嘅「四灘」之一，俗稱大浪西灣。由於地處萬宜水庫去大浪灣嘅入口，而且麥理浩徑喺旁邊經過，所以係西貢遠足人士一個重要嘅補給同埋休息地點。呢度水清沙幼嘅海灘，亦都成為咗唔少遊艇假日嘅落腳點。

西灣對出嘅大洲（左）同埋尖洲（右），已經成為咗地標性嘅海景啦。

西灣

名

西灣俗稱大浪西灣，意思係指呢個灘係喺西貢大浪灣嘅最西邊，大浪灣舊陣時叫做鳳灣

歷史

海星聖堂，據村民話係用大理石起嘅，棟樓喺六十年代左右荒廢咗，而座牌樓上邊寫住1903同埋天主堂三隻字，左邊寫住海星聖堂，但而家行去棟嘢嘅路都荒廢晒啦，而當年曾經係村入面唯一嘅小學。

西灣自古就係呢頭漁船避風嘅地方，而喺岸邊就慢慢形成咗今日見到嘅西灣村。西灣村嘅歷史好久遠，有本《大浪西灣黎氏族譜》話，西灣村嘅歷史最耐可以追到去明朝成化年間，距離而家有成六百年歷史噉話。

西灣村喺未起萬宜水庫之前，只可以坐船過去，所以村內齋靠個海都已經夠晒食，而天主教會亦曾經係1903年，起咗一間教堂──海星小堂，並係教堂入面附設小學，間教堂係用大理石嚟起嘅，至而家重仍然企咗係度。

雖然係1960年代嗰時，香港政府係萬宜村起咗個水庫，而亦因為咁，塞住咗官門水道，搞到西灣嘅水路交通變咗做陸路，迫住令西灣嘅交通要對外面開放，同時亦因為新任牧師腳患嚴重，爬唔過座西灣山，搞到西灣嘅傳教同埋教育事務返唔到落去，再加埋香港工業化帶嚟好多工作機會，令啲後生仔係咁離開西灣，而條村亦都變咗做條老人村啦。

由1980年代去到1990年代，政府起咗一大堆遠足徑，引咗好多普羅大眾去行山，而麥理浩徑貫穿成條西灣村，再加埋個西貢東郊野公園嘅設立，令到旅遊觀光，好似士多呀、租屋呀、沖身咁，慢慢變成當地好重要嘅經濟支柱，而到2003年SARS嘅流行，更令到西灣呢個比較接近市區，而座山又唔算太難行嘅郊野，變成一個非常旺場嘅渡假地點。

景觀

大浪西灣曾經得到由香港郊野公園之友會、國際獅子總會港澳三０三區同埋漁農自然護理署舉辦嘅「香港十大勝景選舉」第一名。可以知道見西灣景觀個靚法，晨咁早就得到官方同民間嘅肯定。

西灣本身分咗做南灘同埋北灘，而西灣旁邊有西灣山同埋獨孤山。西灣山標高314米，山坡好斜，南北兩面都有道路連接。西灣對出個海度，可以見到大洲同尖洲兩座小島，係西灣的代表性海景。由北灘向北行無幾耐，可以行到去香港九大石澗之一嘅雙鹿石澗及鹿湖。

西灣最出名嘅都重係佢嘅水清沙幼，未受污染嘅原始海灘，而海灘對出個海域，都係屬於大浪灣嘅海域，所以同埋大浪四灘都可以享受呢個海天一色嘅海景。

西灣係香港無乜幾個可以嘅觀星地方。西灣一帶無乜人，而且大多數村民重保持住傳統農村嘅作息生活，所以光害較少，適宜觀星。

生態

香港東邊海岸由於距離珠江口啲污染物好遠，而且重要面對住個開闊嘅太平洋，而沿岸多山嘅地形亦阻住人口發展同埋由此而嚟嘅污染，令香港東邊海域成為大群珊瑚聚落嘅溫床，就好似好出名嘅海下灣同埋大浪灣咁。喺西灣出海無幾遠，就可以好容易咁睇到唔少珊瑚礁，而根據村民嘅描述，五十年代喺西灣重可以好容易咁捉到海參。

喺陸上，由於西灣係一條季節性嘅河道出海口，所以喺啲海水唔鹹唔淡嘅地方會有好大片嘅紅樹林，而隨住紅樹林嘅形成，有唔少魚呀、蝦呀咁嘅生物亦都會係紅樹林度生活，重會引來好多鳥類同埋昆蟲定居或者覓食，當中有好似係全球都唔多見嘅紫背葦鳽咁啦，都會喺包括西灣在內嘅大浪灣範圍活動，而政府亦因為咁，而喺2001年嘅《大浪灣分區計劃大綱草圖》入面，將部份地區列做自然保護區同埋具特殊科學價值地點而保存咗落嚟，可以知道呢處喺成個生態系上面嘅重要地位。

而且作為西貢一個地標性嘅優美地點，西灣嘅自然環境對成個香港氣候嘅調節仍然起到一定嘅作用。

交通

西灣嘅交通係大浪灣最方便嘅，經水路、陸路同埋空路都可以嚟到。

水路方面，可以自己包隻船去西貢市中心或者黃石碼頭，亦可以自己開隻遊艇去。

陸路方面，就有幾條路可以畀你揀。可以喺西貢市中心轉居民巴士直接去到西灣亭總站，再沿住條山路過去，亦可以先搭車去到北潭涌郊野公園服務中心，再行過去萬宜水庫另一邊，爬過西灣山，亦可揀飛的直接去到水庫迴旋處，然後行過西灣山，大概行六公里左右就嚟到。反方向行嚟嘅話，亦可以由黃石碼頭出發，經過赤徑、大浪村、鹹田到達，然後經過吹筒坳去到西灣亭坐居民巴士走人。

空路方面，西灣嘅北面有一個小型直升機停機坪，不過家陣只係畀緊急服務用，普通民眾係唔可以自己搭直升機出入嘅。

設施

西灣重有一個政府露營營地，而且有燒烤爐設備，衛生設施方面，就只係得旱廁，而水源亦都只有間歇性嘅溪澗，而村入面嘅人家一般有井水，有必要嗰時可以試吓問佢哋借，而手機呢一般都收唔到，而係有需要嘅時候，可以試吓問士多房老細借個電話嚟用，村入面有幾間士多房，亦都唔少有提供租房同埋沐浴設備嘅，不過一般都係要收錢嘅，而係士多入面可以買到一般燒烤用品以至各式飲品，而且亦有簡單餐點可以畀你堂食，當地嘅民風淳樸，不過非假日嘅日子唔一定會開門。

危機

2000年，香港政府發表《大浪灣分區計劃大綱草圖》（No.S/SK-TLW/1），劃咗將區內好多地方入保護區，重打算喺五個鄉村發展區鼓勵起丁屋，希望喺十年之內，區內人口由廿幾加到千幾。因為計劃好大而且包括西灣，有可能危及成個大浪灣嘅歷史古跡同自然環境，所以大浪灣之友之類嘅組織成立，組織起嚟反對計劃。近年香港民間嘅保育意識高咗，而且生態旅遊亦都開始興，所以反對聲音得到好大迴響。城規會喺2000年11月同反對代表見面，係2001年嘅，決定大幅減少起丁屋嘅規模，限制喺原有丁屋重建同埋已批准項目。

但係，當大眾興起行山，有啲無公德心行山人會留低啲垃圾；而沙灘外面又停住一大堆遊艇，帶嚟好多油污，再加埋要處理當地居民嘅基本生活需求，要唔想破壞成個環境，係西灣未來發展嘅挑戰。

相

• 
  起咗座萬宜水庫，雖然幫到唔少村民搵食，但亦都搞到村入面嘅人係咁搬走，攪到個西灣無晒人。
• 
  完全荒廢晒嘅聖堂外觀。