大角嘴碼頭

大角嘴碼頭係舊底香港一座碼頭，喺九龍大角咀西面，畀人坐油蔴地小輪來回大角嘴同埋中環港內綫碼頭，曾經係香港主要碼頭之一，最後因填海拆咗。個位置大約係家下港鐵東涌綫奧運站北端，滙豐中心對出。

史

未有大角嘴碼頭之前，大角嘴碼頭連巴士總站塊地，原來係海來嘅。即係亞細亞油倉對出一角凹咗入去嘅海皮，有油倉碼頭。個凹位正正係就家下𣾀豐中心，而海邊就家下海景街度。後尾大角嘴開始發展，大同船塢同其他重工業搬走起多層大廈，最後連油倉都搬埋。個凹位就填咗，起咗碼頭同巴士總站，而櫻桃街就拉長到巴士總站個位。

原本小輪係大角嘴東面旺角嘴嘅旺角碼頭開嘅，1960年香港政府打算將塘尾道由旺角嘴亞皆老街伸長到官涌佐敦道，要填海起路。1972年4月23號旺角碼頭搬到大角嘴呢塊新填地，而原碼頭就填咗做渡船街。新嘅大角嘴碼頭唔單止有船搭，出面重有個大角嘴碼頭巴士總站，即家下𣾀豐中心個位，等巴士可以接人坐船過海。

1978年11月6號，大角嘴碼頭留咗一邊做開中港客運飛翔船，船係去廣州嘅，所以叫港穗碼頭。呢個係1949年之後，第一條開返嘅中港客運航綫。1988年，喺尖沙嘴起咗中國客運碼頭（又叫中港碼頭），呢啲船就轉晒去中港碼頭上落。

1992年6月1號個碼頭就執咗。因為香港有玫瑰園計劃，大角嘴對出填晒海，加上香港有地鐵（家下港鐵）、巴士代替小輪，就無再起返。個巴士總站重用多幾年，1995年5月8號先停用，啲巴士綫搬晒去奧運站周圍嘅新屋苑。碼頭海皮位起咗條深旺道，同埋地鐵奧運站。