大麻二酚

大麻二酚（英文：Cannabidiol，簡稱：CBD）係百幾種大麻有效成分中最具醫療價值嘅一種，有放鬆身心、保護神經、改善皮膚發炎、抗氧化、舒緩皮膚敏感泛紅、為皮膚表層建立保護屏障、改善皮膚自我修復力；對恢復皮膚健康、舒緩皮膚問題嘅能力，可以治療濕疹等病。

香港政府喺十個政府合署設立大麻二酚產品棄置箱，俾香港市民能夠喺2023年1月30號或之前將含有大麻二酚成份嘅產品棄置（屯門政府合署棄置箱）

大麻二酚係大麻主要嘅非精神科成分，有多種藥理作用，包括抗焦慮、抗精神病、止嘔、抗炎特性等。有研究報告指出，大麻二酚喺非轉化細胞中無毒性，唔會誘發食物攝入變化，唔會誘發全身僵硬症，唔會影響生理參數（心率、血壓、體溫），唔會影響胃腸道嘅轉運，唔會改變精神運動或心理功能。

研究報告指出，長期使用高劑量（每日高達1.5克）嘅大麻二酚喺人體內耐受性仍然良好。就算大麻二酚同四氫大麻酚（THC）分子相似，大麻二酚只會喺非常高劑量（四氫大麻酚嘅100倍）下先至同大麻素受體互相有弱作用。另外，喺大麻二酚中亦未察覺到好似四氫大麻酚噉會引起對人體思維同感知嘅改變。唔同藥理學性質令到大麻二酚同四氫大麻酚有完全唔一樣嘅安全度。對二十五項關於生物多樣性公約內安全性同功效研究嘅綜述，並未發現大麻二酚於廣泛劑量範圍中使用多種用藥方式有顯著副作用，包括急性同慢性用藥方案。

管制

大麻二酚已經喺歐洲大部分地區同其他國家獲得安全性同功效批准，因此佢嘅新陳代謝、毒理學、安全度醫學訊息已經夠完善。大部分國家會容忍含指定濃度以下嘅大麻二酚產品喺國內販售，包括毒品管制較嚴格嘅泰國。

香港

喺2022年，香港特別行政區政府宣布會立例禁止喺香港使用、管有或銷售大麻二酚，無論做任何用途即屬違法。香港政府表示，香港現行嘅法例同醫護人員守則禁止任何醫護人員使用大麻二酚作醫療用途，香港衞生署亦唔會為大麻二酚產品發出任何許可證，而香港研究資助局亦禁止任何喺香港使用大麻二酚嘅學術研究，由2023年2月1號起大麻二酚喺香港會列為「危險藥物」並受香港「危險藥物條例」管制，屆時香港將成為全球首個全面禁止使用大麻二酚嘅地區。香港禁毒常務委員會主席李國棟醫生表示，極之微量嘅大麻二酚即使由吸入方式進入人體已經會引發嚴重不良反應，包括幻覺、心跳加速、器官衰竭，李國棟醫生又引述香港大學李嘉誠醫學院嘅研究，大麻二酚造成上癮嘅情況同海洛英等毒品差唔多，因此香港有禁絕大麻二酚嘅必要。而香港藥劑師崔俊明更表示，將大麻二酚產品開封後放置約一至兩個月，就會產生喺香港一直受禁制嘅四氫大麻酚。