官派律師

官派律師係一個中華人民共和國司法制度入面嘅一種角色。一般嚟講內地嘅法律援助機構會為經濟有困難嘅被告安排律師，或者安排喺人民法院或看守所派駐嘅值班律師。而官派律師就係指喺敏感案件中由當局指派嘅律師。

關於官派律師嘅爭議

喺好多案件入面，唔少當事人同佢哋嘅親屬都對官派律師退避三舍。關於官派律師嘅爭議，主要係環繞佢哋獨立自主性被質疑，家屬唔信佢哋會盡力辯護，同埋佢哋行徑嘅錯漏。

唔會盡力辯護

好多時，被告或者家屬都唔信官派律師係真誠為被告辯護。而且就算當事人無經濟困難，執法部門都會要求被告必須聘用官派律師，同時要家屬炒咗本來自己請嘅律師。而且，呢啲律師亦被指只會幫政府官方工作，唔會幫自己當事人。

行徑錯漏

有啲官派律師唔單止唔會通知被告家屬審訊日期或者判刑結果，甚至拒絕同家屬會面或者聯絡。

爭議事例

長沙富能公益案

喺2020年嘅長沙富能公益案，程淵被判「顛覆國家政權罪」罪成，事前當局一直唔畀佢老婆施明磊幫佢請嘅吳有水律師參與案件，而要求佢用「官派律師」。但嗰名「官派律師」從來冇同佢溝通過，甚至無通知佢，程淵已完成審訊同埋被判刑，只有後嚟佢聯絡檢察院先知。佢之後去到官派律師嘅律師事務所要求會見，事務所一開頭就話個律師開緊會，之後突然又話佢已經走咗，仲要求家屬即刻離開事務所。

12港人案

喺12港人案入面，有被禁錮港人嘅家屬就提及，連官派律師姓名、電話、事務所等都無法得知，想索取資料嗰陣，反而被鹽田分局以「信息屬刑事案信息」拒絕。

另外，被告之一李宇軒去到3月底喺內地刑滿被遣返返港後，案件喺3月31號提堂，佢被一名大律師羅達雄代表，羅達雄當時拒絕透露李嘅下落，而李宇軒嘅妹妹就話羅達雄唔係家屬安排嘅代表律師，更加話睇報道先知有呢個人，有部分傳媒就形容佢喺事件上係官派律師，但佢所屬嘅律師樓就否認。

對制度嘅批評

• 中國維權律師關注組喺2020年9月18號，就喺《立場新聞》就12港人案發表文章，話中國多次自稱為「法治國家」，強制要求使用「官派律師」唔合法理。另外，中國係聯合國成員，有責任遵守《保護所有遭受任何形式拘留或監禁的人的原則》，而當中入面係有提及，被拘留或監禁嘅人有權接受，特別係自己家屬嘅探訪，並且有權同佢哋通信，同時佢哋亦應該獲得充分機會同外界聯絡。
• 喺12港人案入面，民主黨議員涂謹申就批評質疑拒絕公開官派律師嘅資料，目的係唔想負責任。佢話，被捕者家屬唔知道官派律師個名，無從得知律師有無見過被捕者、會唔會代表被捕者上庭等，又話。向家屬公開官派律師資料係基本公義制度。
• 曾經喺中國從事法律維權工作嘅旅美中國律師彭永峰批評，叫官派律師做「維穩律師」更加合適。佢批評，呢啲律師只會按照官方嘅統一口徑去介入案件，希望當事人能夠配合政府去做一場司法表演，好明顯就係維穩嘅一部分。
• 長沙富能公益案入面，被告本來聘請，但後來因為官方介入被換走嘅律師吳有水，就形容官派律師係中國法治嘅毒瘤，話官派律師背叛自己嘅當事人，幫對方講說話。
• 端點星案被告陳玫嘅阿哥，就曾經喺網站《中國人權》寫文，話官派律師係中共當局嘅走狗，只係配合中共進行欺世表演。「官派律師」已成為中共政權壓制公民權利、打擊異議人士嘅常用手段，呼籲國際社會關注。