人馬座

  想搵占星術嘅人馬座嘅話，請睇人馬宮。

人馬座（Sagittarius），又叫射手座，係家下八十八西洋星座之一。佢響天球赤道一帶，佔天球面積867平方度。地球北半球來講，人馬座係夏天嘅星座，即係夏夜會見到。肉眼可以睇到嘅星，約莫115粒到。有一到四等星20粒，即係有2等星2粒、3等星8粒、4等星10粒。

人馬座
Sagittarius

星座
人馬座恆星一覽
縮寫	Sgr
所有格	Sagittarii
象徵物	弓箭手
赤經	19
赤緯	-25
面積	867平方度 (第15位)
流星雨	人馬座流星雨 人馬座ψ流星雨 摩羯座－人馬座流星雨
鄰接 星座	蛇夫座 天蠍座 南冕座 望遠鏡座 印第安座 顯微鏡座 摩羯座 天鷹座 盾牌座 巨蛇座 (尾)
可見嘅緯度範圍： +55°至−90°之間 最適合觀賞嘅月份：8月

人馬座位於黃道十二星座排第九。

占星

喺占星學嚟講11月22日至12月21日出世嘅人屬於人馬座。

歷史

人馬座係古希臘托勒密所編嘅托勒密48星座之一。

故仔

17世紀天文學家約翰·赫維留筆下嘅人馬座

話說，喺希臘北部帖撒（Thessalia）山地住咗一班人頭馬怪物（Centaur）。人頭馬怪物上半身似人，下半身似馬。佢哋大多喺山野上周圍跑，舉止又粗魯、野蠻，唯獨係奇龍（Chiron）例外，佢唔單止好有禮貌，重精通音樂，醫術，同埋打獵。聽講係太陽神阿波羅同佢個妹－月亮女神阿蒂蜜斯傳授畀佢。

奇龍住喺洞穴，栽種草藥救助病人，重代人扶養孤兒。依啲孤兒包括指揮阿哥號（Argo）遠征隊嘅積遜（Jason），希臘名醫阿伊斯古拉普斯（Aesculapius）同特洛伊戰爭中嘅勇士亞吉力（Achilles）等知名人物。

但唔好彩，好多人頭馬怪物（包括奇龍在內）都中咗另一位英雄海克力斯（Hercules）誤射嘅毒箭，一個一個死去。天神宙斯為咗紀念奇龍，就將佢拉弓準備射箭嘅形象，掛喺天上，成為人馬座。聽講因為古撒利人大都善於騎馬同狩獵，所以先有依個神話。

而另一種人頭馬怪物，就變成另一個星座：半人馬座，就係初夏傍晚可以喺南方地平線上見到嘅星座。佢哋表現出手持長槍刺殺左邊嘅狼（即係豺狼座）嘅姿態。

睇埋

• 黃道