雙子座

雙子座（Gemini），又叫双子座，係家下八十八西洋星座之一。佢響天球赤道一帶，佔天球面積514平方度。地球北半球來講，雙子座係冬天嘅星座，即係冬夜會見到。肉眼可以睇到嘅星，約莫70粒到。有一到四等星19粒，即係有1等星1粒、2等星2粒、3等星4粒、4等星12粒。

雙子座
Gemini

星座
雙子座恆星一覽
縮寫	Gem
所有格	Geminorum
象徵物	雙胞胎
赤經	7
赤緯	+20x
面積	514平方度 (第30位)
流星雨	雙子座流星雨 雙子座ε流星雨
鄰接 星座	巨蟹座 天貓座 御夫座 金牛座 獵戶座 麒麟座 小犬座
可見嘅緯度範圍： +90°至−60°之間 最適合觀賞嘅月份：2月

雙子座喺黃道12星座排第三。

雙子座有兩粒非常之光嘅星，喺希臘神話入便呢兩粒星係一對孖生兄弟。當中較暗嘅嗰粒叫α星（北河二），佢喺望遠鏡入便睇係一組雙星（查實佢係一組六合星）。第啲星都比較暗。唯有γ星可以喺城市燈光下睇到。

歷史

雙子座形象係孖生兄弟。

雙子座係古希臘托勒密所編嘅托勒密48星座之一。

1930年冥王星就係喺雙子座嘅δ星附近發現嘅。

占星

占星學上屬呢個星座嘅人係喺5月21號至6月21號出世。而呢段時間出世嘅人有雙重性格，多才多藝嘅意思。

深空天體

雙子座入便最光嗰嚿深空天體係疏散星團M35，喺雙子座η星嘅側邊，隔地球大概有2800光年咁遠，光度5級。

故仔

星座符號：

希臘神話入便，有對孖生兄弟叫卡斯特（Castor，星官北河三）同波樂克斯（Pollux，星官北河二），由斯巴達皇后麗達（Leda）生嘅蛋孵出，阿哥卡斯特嘅老豆係斯巴達國王延達瑞斯（Tyndareus），細佬波樂克斯嘅老豆係天神宙斯，波樂克斯亦因此有不死之身。兩兄弟自細一齊大，感情好好。卡斯特擅長戰術，波樂克斯精於格鬥。佢哋都鍾意冒險，其中最出名嘅係阿哥號（Argo）遠征嘅故事。兩兄弟喺嗰次遠征中係重要嘅角色。聽講話有一次海面起咗暴風雨，奧菲斯即刻企喺船側彈豎琴，向眾神祈禱。兩兄弟頭頂都出現咗一粒大星，畀咗兩人力量嚟到頂過暴風雨。佢哋後嚟就俾人奉為航海嘅守護神。

17世紀天文學家約翰‧赫維留筆下嘅雙子座

後尾，兩兄弟亦有參與第啲冒險，冇諗到俾老友出賣，卡斯特死咗，留低有不死之身嘅波樂克斯。波樂克斯向宙斯請求同卡斯特同生共死。於是乎兩兄弟有半年喺天上，半年喺人間生活。呢個故仔可能係受雙子座從冬季到春季都出現喺日落嗰時嘅天空，其餘半年唔見蹤影而啟發。

睇埋

• 星座
• 希臘神話