科學對照

科學對照（英文：scientific control）係指喺做實驗嗰陣特登要設計到「確保自變數以外嘅變數嘅影響要有咁細得咁細」。

控制方法

睇埋：隨機化實驗、雙盲實驗同再現性

喺廿一世紀初嘅科學上，科學對照嘅方法有好多：

• 隨機化（randomization）：醫學同社會科學等研究人嘅領域常用嘅技巧，指將實驗入面啲受試者隨機噉分組－

  Foreach 受試者，

  隨機噉揀「實驗組」或者「對照組」，

  將位受試者分落嗰組度；

  • 噉做可以避免實驗組同對照組之間有啲咩（實驗操作以外嘅）差異。
• 雙盲法（double-blind）：醫學同社會科學成日用嘅一種技巧，指做實驗嘅人同受試者喺實驗結束之前都唔知每位受試者屬邊組－想像家陣又有位醫學研究者想做臨床試驗試隻新藥，但佢實驗未做完就話咗俾班實驗組嘅受試者知，佢哋食嘅係新藥唔係安慰劑，班受試者信隻藥有效而最後因為噉而感覺舒服咗（DV 受影響）；事實上，「諗住自己食咗隻特效藥（但隻藥實際上係冇用嘅安慰劑）會令病人主觀感覺舒服咗」－所謂嘅安慰劑效應－呢種現象喺廿世紀嘅醫學上經已廣受人討論；為咗防止安慰劑效應噉嘅現象，廿一世紀初嘅人類實驗實會用雙盲法－唔俾受試者知邊個入咗實驗組邊個入咗對照組，而且啲研究人員喺實驗結束之前亦都唔會知呢樣資訊，費事研究人員唔小心或者無意識噉泄露資訊（兩邊都睇唔到樣資訊，所以叫雙盲）。
• 再現（replication）：將場實驗重複噉做幾次－一般嚟講，「嗰幾次實驗冚唪唥都受同一個混淆變數影響」嘅機率低過「第一次實驗受嗰個混淆變數影響」嘅機率；例如一場化學實驗，研究大可以攞多幾條試管，設同一樣嘅環境（IV），睇吓場化學反應（DV）係咪真係次次都會發生；

... 呀噉。

睇埋

• 實驗操作
• 對照組