小松宮(日文:こまつのみやKomatsu no miya),係日本一個曾經存在嘅宮家,由邦家親王第八個仔彰仁親王響1881年成立。1903年,彰仁親王死之後,因為冇仔女,所以由能久親王第四個仔輝久王響1910年降做華族,另外起小松侯爵家以繼承小松宮。

小松宮宮邸(1903年之前)

歷史

彰仁親王原先係仁孝天皇個契仔,響1848年正式繼承仁和寺同埋出家,改名叫純仁。1867年彰仁返翻嚟皇室,而當時畀佢個宮號係東伏見宮。後嚟彰仁親王響明治維新期間表現好好,多次成功鎮壓叛亂,獲得明治天皇嘅讚賞,明治天皇為咗表揚彰仁,所以響1881年決定另起小松宮畀彰仁。

1903年,彰仁親王病得好嚴重,但係佢並冇諗住將小松宮傳畀契仔依仁親王,反而想傳畀細佬能久親王四仔輝久,彰仁仲話輝久好得意。所以一早響1886年,依仁親王就正式繼承東伏見宮。響1903年2月,彰仁過身。本身彰仁個遺孀賴子係想認輝久做契仔,從而完成老公在生時個願望,令輝久繼承小松宮,但係最後皇室唔同意,結果小松宮絕家。

但係響七年之後,皇室又批准輝久降做華族,另外起小松侯爵家去繼承小松宮。

小松侯爵家現任當主係小松揮世久

歷任當主

小松宮

  • 第一任(同時係最後一任):彰仁親王

小松侯爵家

  • 第一任:小松輝久
  • 第二任:小松彰久
  • 第三任(現任):小松揮世久