東伏見宮依仁親王

東伏見宮依仁親王（日文：ひがしふしみのみやよりひとしんのう，1867年 10月16號—1922年 6月27號），係東伏見宮第一代當主，邦家親王細仔，同時係海軍軍人，最高官位係海軍元帥大將大勳位功三級。佢結過兩次婚，前任係土佐藩藩主山內豐信三女八重子，繼任係前宮內大臣岩倉具定大女周子。

經歷

1867年，依仁親王響京都府出世，老豆係邦家親王，阿媽係女房伊丹吉子，嗰時佢叫定麿王。本身佢係要去圓滿院出家，但係響1868年爆發明治維新，所以佢冇出到家。同年，佢做咗大佬晃親王嘅契仔。1877年，佢就讀海軍兵學校預科，但響1884年退學，改為去英國留學。第二年12月，佢改認彰仁親王做契爺，1886年親王宣下，做咗明治天皇嘅猶子，改名叫依仁親王^[1]。

1887年，依仁改去法國留學，入讀布雷斯特海軍學校。佢響1890年畢業之後升為海軍少尉，兩年後返嚟日本，正式開始參軍，同年同八重子結婚，更成為貴族院議員（不過得個名）。四年之後同八重子離婚，響1898年同周子結婚^[1]。

1903年，根據契爺彰仁親王嘅遺囑，依仁親王另開東伏見宮（話就係開，實際上係繼承。彰仁咁做嘅原因係因為佢鍾意輝久王多過依仁，所以就將用過嘅宮號畀依仁）。之後曾參加日俄戰爭。1910年佢同東鄉平八郎、乃木希典，代表日本去英國出席佐治五世嘅就任儀式^[1]。

1918年，依仁出訪英國，中間嗰個人就係佢

跟住佢先後做過横須賀鎮守府司令長官同埋第二艦隊司令長官，1918年升為海軍大將，同年畀人派去到英國訪問。1919年，佢認咗邦彥王細仔邦英王做契仔^[1]。

1922年，依仁親王死咗，終年五十四歲，死後追封為海軍元帥。因為佢冇仔，所以東伏見宮絕家，但就保留皇族身份。1931年，契仔邦英王降為華族，另起東伏見伯爵家，以繼承東伏見宮^[1]。

同夏威夷王國維多利亞卡奧拉尼公主嘅婚事

1881年，夏威夷王國國王卡拉卡瓦訪問日本，呢次係第一次有外國領導人過嚟日本，所以好隆重，皇室仲邀請佢響赤坂離宮同明治天皇傾計。因為嗰時美國野心好大，卡拉卡瓦希望同日本聯手抗美，因而諗住將大女維多利亞卡奧拉尼公主嫁畀定麿王（即係依仁親王）。當時明治天皇希望將日本國力增強，又唔想同外族聯婚，因而反對，所以最後呢場婚事就取消^[2]。

屋企

老豆：邦家親王

阿媽：伊丹吉子

契爺：前契爺晃親王 - 後契爺彰仁親王

兄弟：晃親王 - 嘉言親王 - 讓仁親王 - 朝彥親王 - 夭折 - 貞教親王 - 夭折 - 彰仁親王 - 能久親王 - 夭折 - 夭折 - 博經親王 - 智成親王 - 貞愛親王 - 清棲家教 - 載仁親王

前任太太：八重子

繼任太太：周子

契仔：邦英王

相

依仁親王著住另一套軍服

攷

↑ ^1.0 ^1.1 ^1.2 ^1.3 ^1.4 〈『親王・諸王略傳』依［依仁］〉。web.archive.org。2018-12-23。歸檔時間2018-12-23。喺2020-10-23搵到。{{cite web}}: CS1 maint: bot: original URL status unknown (link)
↑ 〈1232夜『反米大陸』伊藤千尋|松岡正剛の千夜千冊〉。web.archive.org。2016-04-23。歸檔時間2016-04-23。喺2020-10-23搵到。{{cite web}}: CS1 maint: bot: original URL status unknown (link)

拎

東伏見宮家御家族の写真アルバム

[:0-1] 1.0 ^1.1 ^1.2 ^1.3 ^1.4 〈『親王・諸王略傳』依［依仁］〉。web.archive.org。2018-12-23。歸檔時間2018-12-23。喺2020-10-23搵到。{{cite web}}: CS1 maint: bot: original URL status unknown (link)

[2] 〈1232夜『反米大陸』伊藤千尋|松岡正剛の千夜千冊〉。web.archive.org。2016-04-23。歸檔時間2016-04-23。喺2020-10-23搵到。{{cite web}}: CS1 maint: bot: original URL status unknown (link)

[1]

[2]