民進黨 (日本)

民進黨，曾經係日本最大在野黨，2016年由民主黨同維新黨合併成。第一任代表係舊民主黨嘅岡田克也。

黨史

2016年3月17號，民進黨正式成立。由舊時民主黨代表岡田克也繼續做埋剩低嗰半年任期。第24屆日本參議院選舉之後，岡田克也話做完呢任之後唔再連任。

9月15號，民進黨舉行黨代表大會選新一任嘅黨代表。最後有3個人正式入圍，包括蓮舫、前原誠司同玉木雄一郎。蓮舫最後贏咗，做咗民進黨第二任代表。不過佢好快就俾雙重國籍風波困擾，有台灣血統嘅蓮舫最初唔認自己揸住台灣國籍，後來又去做咗選擇以日本做唯一國籍嘅宣言書，即係自打嘴巴。到後來2017年東京都議會選舉，民進黨出現歷史性挫敗，全黨得5人當選。最後蓮舫辭職。

2017年9月1號，民進黨舉行臨時大會。得前原誠司同枝野幸男兩人正式入圍黨代表競選。前原誠司當選第三任代表。安倍晉三領導嘅自民黨喺啱先嘅東京都議會選舉大敗，而早前出走自民黨當選東京都知事嘅小池百合子，由佢領導嘅都民第一會就大勝。結果安倍晉三趁內閣支持度回穩、新敵人小池嘅羽翼未豐，同埋在野黨持續頹勢之下提早喺2017年10月舉行大選。前原誠司見民進黨自立黨之後民望未曾有過起息，於是搵小池百合子密斟，提出民進黨同小池新成立嘅希望之黨合併，不過俾小池拒絕。後來民進黨宣佈唔提名任何候選人，而希望之黨改為提名部分同自己政見相符嘅民進黨保守派出選，又排除反修憲嘅民進黨自由派加入，於是自由派出走民進黨，成立立憲民主黨。重有一班人選擇做獨立候選人參選。結果民進黨喺選舉前一分為三。

眾議院選舉結果出爐，枝野幸男領導嘅自由派立憲民主黨大勝，議席多過之前成3倍幾，重攞埋最大反對黨嘅地位。相反希望之黨議席微跌，小池百合子嘅地頭東京重只係贏到1席。另外有19個同民進黨有關係嘅候選人當選。選舉後前原誠司以大選失利為由辭職，重退埋黨，打算加入希望之黨。黨代表就由大塚耕平擔任。大塚耕平已經係民進黨兩年入面第四個黨代表。

當時民進黨重剩低40幾個參議院議員，獨立參選嘅民進黨員就喺眾議院成立一個會派(無所屬之會)運作，由岡田克也揸莊。

選舉之後，黨代表大塚耕平一直想拉返埋立憲民主黨同希望之黨，試過提出喺議會成立聯合三個黨嘅黨團，不過因為立憲民主黨反對而告吹。而呢段時間，民進黨枕住有參議員退黨加入立憲民主黨，好似第二任黨代表蓮舫。希望之黨初初都歡迎呢個建議，不過後來希望之黨嘅細野豪志有保留，最後連兩黨聯合嘅黨團都組唔成。

2018年3月，讀賣新聞話民進黨同希望之黨已經傾緊係咪要合併。但係同時，民進黨嘅眾議院會派無所屬之會又同立憲民主黨傾緊合組議會黨團。有報道指，無所屬之會當中得3個人同意民進黨同希望之黨合併。到4月尾，兩黨代表大塚耕平同玉木雄一郎宣佈兩個黨會喺5月7號合併，新黨會叫做「國民民主黨」。宣佈一出，兩個黨有唔少人都表示唔會入新黨，包括民進黨第一任黨代表岡田克也、希望之黨嘅井出庸生。而參議院黨團會長小川敏夫更加拉大隊走人，連埋佢在內嘅17人會宣佈退出民進黨，10人表示想入立憲民主黨，7人會保持無黨籍。

2018年5月7號，民進黨壽終正寢，約莫得一半嘅國會議員選擇同希望之黨支持合併嘅一方組成新黨國民民主黨。

黨名同黨徽

民進黨嘅黨名同黨徽都係民間公開募集返嚟。

黨名方面，由民主黨同維新黨經黨內民調之後各出一個，民主黨提議新黨叫「立憲民主黨」，而維新黨就提議新黨叫「民進黨」，經過民意調查之後，新黨個名就扑鎚叫做民進黨。期間，一個冇開名嘅自民黨議員話，一批台灣民進黨籍議員嚟日本千葉縣同自民黨幹部會談嗰時話，認為新黨有機會改名做「民進黨」可能會影衰台灣民進黨。後來新黨真係改咗名做民進黨。民主進步黨發言人楊家俍就話台灣同日本都有一個民進黨「感覺好親切」。順帶一提，民進黨自由派喺第48屆日本眾議院議員總選舉時分裂，佢哋新成立嘅黨名就用返落選嘅「立憲民主黨」。

黨徽方面就喺新黨成立咗之後募集。之後揀咗4個黨徽出嚟投票，最後揀咗一個「M」字型嘅黨徽。新黨徽出現後，日本網民，甚至一啲政治記者都認為新黨徽就好似一男一女喺度扑嘢噉。又有人覺得黨徽好似抄襲日本食品公司井村屋嘅標誌。

選舉成績

民進黨成立嗰陣，眾議院有96個議員，參議院有60個議員。

眾議院

選舉	總議席	黨代表	註
(創黨時)	96 / 470	岡田克也
2017	19 / 465	前原誠司	所有當選人都係獨立身份參選

參議院

選舉	總議席	非改選	黨代表	註
(創黨時)	60 / 242		岡田克也
2016	49 / 242	17	岡田克也

睇埋

• 第1屆日本民進黨黨魁選舉
• 第2屆日本民進黨黨魁選舉
• 第3屆日本民進黨黨魁選舉
• 自由民主黨 (日本)