小澤一郎1942年5月24號—)係日本政治人。依家係自由黨代表,以前做過自民黨幹事長,民主黨代表。小澤一郎素有「政壇破壞王」嘅稱號,喺退出自民黨之後,不斷組織新黨同自民黨抗衡,佢亦都係兩次成就非自民黨政權上台嘅幕後推手。

小澤一郎

生平 編輯

小澤一郎老豆係前眾議院議員小澤佐重喜,喺屋企排行第一。喺佢讀大學嗰陣,小澤佐重喜突然死咗。喺1969年,小澤一郎就「代父從軍」,代表自民黨參選,而且重當選咗,嗰年佢只係27歲,係當年最後生嘅國會議員。

小澤一郎自此扶搖直上,到1989年,海部俊樹做咗自民黨總裁,委任咗小澤做自民黨幹事長。1992年,佢喺擁立羽田孜做竹下派接班人失敗,於是就離開咗竹下派,成立咗自己嘅黨內派系改革論壇21(羽田-小澤派)。呢次分裂令到當時嘅首相宮澤喜一冷待小澤派嘅閣僚,小澤就成為非主流派,同主流派對立。就喺嗰時,小澤一郎寫咗《日本改造計劃》呢本書,書入面話日本左派勢力太弱,所以應該有兩個右翼嘅政黨輪流執政,呢個理念成為咗佢之後從政嘅目標。

1993年,社會黨喺國會對宮澤喜一提出不信任動議,自民黨嘅羽田-小澤派居然倒戈令動議通過,宮澤被逼解散國會,提前大選。之後小澤一郎拉大隊走人,成立咗新生黨。新生黨喺大選成績好好,議席數目僅次自民黨同社會黨。之後新生黨在內嘅7個政黨組成聯盟,推舉細川護熙做首相,成為1955年之後第一個唔係自民黨嘅首相,「55年體制」正式瓦解。

不過好景不常,社會黨同新黨先驅認為小澤一郎成日喺背後操縱政府諗法,搞到聯合政權好快出現問題,後來呢兩個黨退出,重走去同自民黨籌組政府,聯合政權只係維持10個月就玩完。

之後喺1995年尾,小澤嘅新生黨同其他聯合政權政黨合併做新進黨,不過黨入面好快出現裂痕,捱咗三年之後就要解散。同時間,佢又起咗一個新黨叫「自由黨」,不過人數唔及估計咁多。1999年,自由黨受自民黨邀請加入政府,一年之後自由黨就留唔番喺政府出現分歧,選擇留低嘅人退出,成立保守黨。自由黨經過分裂之後勢力減退咗唔少。

到2002年,當時民主黨嘅代表鳩山由紀夫同小澤一郎開始傾兩黨合併嘅事,不過民主黨入面有反彈,後來鳩山因為喺地方選舉成績唔掂要辭職,跟手嘅菅直人繼續同自由黨傾,最後喺2003年9月26號,民主黨同自由黨合併,黨名繼續用返民主黨個名。

2006年,小澤一郎接替前原誠司成為民主黨代表。喺佢帶領下,民主黨氣勢好好,參議院選舉入面,更加成為第一大黨,第一次攞到參議院控制權。

2009年,佢嘅政治獻金醜聞累佢要辭咗民主黨代表個位,近幾年自民黨施政成績唔好,好多人覺得自民黨會再次下野,所以當時小澤一郎係好有機會喺下次選舉之後做到首相,點知都係爭臨門一腳。果然喺8月嘅選舉,民主黨橫掃大部分議席,接佢任嘅鳩山由紀夫就做咗首相。

2010年6月,鳩山由紀夫因為美軍普天間基地問題落台,當時由菅直人接手剩低嘅任期。9月小澤一郎當時出嚟爭民主黨代表個位,結果輸咗畀連任嘅菅直人手上。

2012年,小澤一郎反對政府加銷售稅,拉大隊退出民主黨,成立國民生活第一黨,之後佢再吸納其他人馬,成立未來黨,由環境學家嘉田由紀子做黨代表。主打反核同凍結銷售稅。但係選舉成績好差,由61席跌到得返9席,小澤之後一直保持頹勢。選舉之後嘉田同小澤兩個人反面,2013年12月,小澤就帶埋佢啲人馬成立生活黨。

生活黨選舉成績一直唔好,議員數目越嚟越少,第47屆日本眾議院議員總選舉之後,連政黨嘅條件都符合唔到,好在選完冇耐就有以前拍過戲嘅參議員山本太郎入黨,連黨名都為佢重新改過。2016年,將黨名改做自由黨。喺呢段時期,小澤同本身反咗面嘅民主黨,以及其他在野政黨一齊反對安保法案,之後喺選舉方面都有同呢啲政黨協調。

到咗2019年,小澤嘅自由黨同國民民主黨達成共識,自由黨會解散,大部分議員就會加入國民民主黨。2020年,國民民主黨又同立憲民主黨合併,大部分國民民主黨嘅議員都會加入新嘅立憲民主黨,包括小澤一郎自己。

2021年,日本舉行眾議院大選,小澤喺自己經營好耐嘅選區輸咗畀自民黨嘅候選人,但係靠比例區「復活」當選。呢屆無論朝野都有諸如小澤咁樣嘅大佬級人物落馬,被視為係一場「世代交替」嘅選舉。

出面網頁 編輯