自由黨 (日本，2016年)
自由黨（じゆうとう，英文Liberal Party）係日本嘅政黨，簡稱自由。日本傳媒為咗唔好撈亂佢同自民黨，會就咁簡稱做由。佢嘅前身係日本未來黨，後來改名做生活黨，2016年改做依家嘅自由黨。黨代表係小澤一郎同山本太郎，2019年宣佈同國民民主黨合併。
歷史
編輯2012年，未來黨喺大選入面慘敗，黨嘅小澤一郎同嘉田由紀子兩派衝突激化，最後勢力較細嘅嘉田出走，黨名叫返「日本未來黨」，而小澤就將黨名改做生活黨，黨徽就用返以前小澤搞嘅另一個黨—國民生活第一個黨徽。
到2014年嘅第47屆日本眾議院議員總選舉，生活黨頹勢未止，由5席輸剩2席，連成為政黨嘅條件都冇埋，後來得以前拍過戲嘅參議員山本太郎入黨，生活黨又湊夠人變返正式政黨，黨名重為佢改做「生活黨同山本太郎同朋友們」（生活の党と山本太郎となかまたち），以示兩者合併。
2016年嘅第24屆日本參議院議員通常選舉，生活黨同一樣係反修憲嘅民進黨、日本共產黨、社民黨結盟，最後有1個人喺比例區贏咗，2個人就用獨立身份贏咗。
到2016年10月12號，生活黨改名做自由黨，呢個名亦係小澤一郎以前喺新進黨瓦解之後用過嘅。
2017年嘅第48屆日本眾議院議員總選舉，當時小池百合子興起，自由黨好多潛在候選人都走去跟小池嘅希望之黨或者由民進黨出走嘅立憲民主黨，打後自由黨直頭話唔用黨嘅名義出選，剩低嘅有3個候選人用獨立身份出戰，最後連任嘅小澤一郎同玉城丹尼當選。
2018年，玉城丹尼走去選沖繩縣知事，辭咗國會議員個位，眾議院就得返小澤一個。最後玉城丹尼當選沖繩縣知事。冇耐之後，走咗去立憲民主黨嘅日吉雄太退黨，返去自由黨。自由黨又可以保持到眾議院會派嘅地位。
2019年1月24號，自由黨宣佈同國民民主黨喺國會入面組成統一會派。到咗4月26號，自由黨同國民民主黨合併，除咗山本太郎之外，所有國會議員都入咗國民民主黨，自由黨宣佈解散。