山道

山道，香港一街，喺石塘嘴，南低北高，沿山而建，低處遠到干諾道西，高處上到般咸道同薄扶林道交界，英文寫做Hill Road，故戰前又有音名希路道。山道天橋，因山道而名，山道上有如天遮，行車天橋，由薄扶林道，兜兜兜兜落到干諾道西。

山道

山道為百年古道，原本有坑，當地叫大坑，後世又有叫山道明渠，水流入海。有坑嗰段，約今聖公會聖彼德小學，到皇后大道西。而大道西個位，上面起咗公廁，一直到封坑先無咗。而近加倫臺處，原本坑西叫山道，坑東叫加倫街，又叫加刺連士街，後來改名加倫臺。一九六五年到一九六八年之間，條坑冚咗，依段仔都變成山道。

史

石塘嘴戰前出名塘西風月。皇后大道西同德輔道間，今長發大廈處，呢段山道，有四大妓寨，詠樂、倚紅、賽花、歡得，盛極一時。香港大學近山道頂，選址立法局曾有激辯。

山道到南里之間，有街無名，可睇成山道一支。史上嗰處，有石塘嘴街市，一八五八年開張。後來變成山道休憩花園。如今做咗香港大學站出入口。