山階宮(日文:やましなのみや )係日本舊時一個宮家,由伏見宮邦家親王庶長仔晃親王響1864年成立。1947年,響駐日盟軍總司令指示底下,山階宮最後一任當主武彥王皇籍脫離。依家山階宮已經絕家。

歷史

初代當主晃親王原本叫清保,係邦家親王庶長仔。晃親王一早響1824年就出家,改叫濟範入道親王。響1864年,德川慶喜應承會將所有權力交畀孝明天皇,孝明天皇好開心,於是佢下令晃親王返翻嚟做皇室成員,獲賜宮號「山階宮」。

由於嗰時晃親王冇仔女,所以就過繼咗最細嘅細佬定麿王做自己契仔。響1873年,晃親王獨仔菊麿王出世,但係因為已經有契仔定麿王,所以菊麿王就被老豆過繼咗畀梨本宮守脩親王。1885年,定麿王改為認小松宮彰仁親王做契爺,搞到山階宮一下子冇咗繼承人,所以獨仔菊麿王返咗嚟山階宮。1898年,晃親王過身,山階宮當主一位由菊麿王接任,同年菊麿王大仔武彥王出世。

1908年,菊麿王過身,當主一位由武彥王接任,而武彥王響1922年娶咗賀陽宮邦憲王細女佐紀子女王做老婆。但係響1923年發生關東大地震,當時大緊肚佐紀子女王因為走唔切而畀嘢壓死,搞到武彥王精神有問題,嚴重到唔夠擔再娶老婆。而響1929年,連最細個嗰細佬茂麿王都皇籍脫離,所以由個時開始山階宮已經一早預咗要絕家(因為武彥王精神有問題到唔夠擔再娶老婆,所以生唔到仔,而全部細佬都皇籍脫離,佢哋啲仔女唔可以又做返皇室成員;而且武彥王有問題,搞到其他宮家都唔肯過繼個仔畀佢)。

1947年響駐日盟軍總司令指示底下,武彥王皇籍脫離,降為平民。1987年,武彥王過身,山階宮絕家。

歷任當主

山階宮

山階家

山階家即係山階宮響皇籍脫離之後個宮家,但係呢個時候嘅山階家已經唔再係皇室成員,淨係得個名。注意,山階家並唔係山階侯爵家。

  • 第一代(同時係末代):山階武彥(即山階宮武彥王)

分支

  • 山階侯爵家(由菊麿王二仔芳麿王響1920年成立)
  • 筑波侯爵家(由菊麿王三仔藤麿王響1928年成立)
  • 鹿島伯爵家(由菊麿王四仔荻麿王響1928年成立)
  • 葛城伯爵家(由菊麿王細仔茂麿王響1929年成立)

家族系譜

  • 山階宮晃親王
    • 山階宮菊麿王
      • 山階宮武彥王
      • 山階芳麿(菊麿王二仔,響1920年皇籍脫離,成立山階侯爵家)
      • 筑波藤麿(菊麿王三仔,響1928年皇籍脫離,成立筑波侯爵家。佢兩個仔常治常遍都好出名)
      • 鹿島荻麿(菊麿王四仔,響1928年皇籍脫離,成立鹿島伯爵家。1932年戰死)
      • 葛城茂麿(菊麿王細仔,響1929年皇籍脫離,成立葛城伯爵家)