廢工

廢工（粵音：fai3 gung1；英文：bullshit job ）或者假gaa2工（pseudowork）係响 2010 年代初興起嘅一個概念，泛指有一啲工，啲人返工做嘢嗰陣扮到好似份工好有價值噉，但份工實際上根本完全產生唔到咩價值。

「今個星期我為咗向班經理稟ban2報我做緊乜，總共填咗成 10 份 form 咁多，做咗好多嘢呀。」

有人响 2015 年嘅英國同荷蘭做過調查，有成近 40% 嘅受訪者都話自己份工似係廢工。

成因

睇埋：管理同營銷

廢工化（bullshitization）係指一份本來唔係廢工嘅工，慢慢噉變成一份廢工。研究者亦有進一步思考「點解會有廢工化嘅情況」呢條問題。

一般認為，一份工之所以會廢工化，其中一個主因係因為管理層係噉擴充啲行政工作，搞到啲員工成日掛住（例如）填 form 同埋收發電郵同同事講自己想做乜，冇晒時間去做實事。當中學術界就被指有噉嘅情況。

起源

廢工呢個概念，源自 2013 年。當時美國人類學家大衛·格里伯出咗篇文，呔圖係《論廢工呢種現象》，提出廢工呢個概念，而佢及後仲出咗本書，本書呔圖係《廢工：一個理論》，成本書都係討論緊呢樣嘢。到咗 2020 年代，廢工嘅概念已經引起咗唔少經濟學同管理學等領域嘅研究者關注。

睇埋

• 經濟價值，可以用嚟衡量一份工「幾有價值」嘅一個概念。
• 美德訊號

拎

• 何謂「廢工」(bullshit job)？，Hok6.com（香港），繁體粵文同中文夾雜，講廢工呢個概念。
• Your Job Achieves Nothing... (probably), How Money Works （英文），一條英文 YouTube 片講廢工呢個艾啲亞aa4。