經濟價值

經濟價值（粵拼：ging1 zai3 gaa3 zik6 | 英文：economic value）係經濟學上嘅一個概念，指一件貨品或者服務對一個經濟個體（例如係一個消費者）嘅主觀價值。

兩個消費者喺一間舖頭入面買嘢；件貨嘅價錢牌上嘅數字（一定程度上）反映件貨嘅市場價值，如果件貨喺兩個消費者心目中經濟價值夠高，佢哋就會肯畀錢買件貨。

經濟價值同市場價值唔同，市場價值係客觀嘅，指經過供應同需求過程之後一件貨品或者服務每單位賣幾多錢，而經濟價值就係主觀嘅－同一件貨品服務對唔同嘅個體嚟講嘅經濟價值可以唔同。

概論

睇埋：慾望同效益

舉個例說明，想像一隻喺市面上賣嘅電子遊戲，一個市場入面有啲消費者想買隻遊戲有啲唔想，而且個個消費者想要呢隻遊戲嘅程度都唔同：隻遊戲嘅出版商首先為隻遊戲定個價；呢隻遊戲嘅經濟價值對個個消費者嚟講都唔同－有啲消費者好想玩隻遊戲，所以隻遊戲滿足到佢哋嘅慾望（對佢哋嚟講，隻遊戲有 $v_{1}$ 咁多經濟價值）；有啲消費者根本冇興趣打機，所以隻遊戲完全滿足唔到佢哋嘅慾望（對佢哋嚟講隻遊戲經濟價值係 0）；有啲消費者有少少鍾意隻遊戲，所以隻遊戲對佢哋嚟講有啲經濟價值 $v_{2}$，但係

$v_{2}<v_{1}$

於是呢班消費者就冇第一批消費者咁願意使錢落隻遊戲度，就可能會（例如）選擇等多兩三個月，隻遊戲價錢下降先買。响經過咗一柞個體決策過程之後，賣隻遊戲嘅出版商可能會選擇加價或者減價，最後隻遊戲就得出咗個價格 $p$，意思係個市場當中呢隻遊戲平均每件賣 $p$ 咁多錢。

一件貨品服務嘅市場價值好大程度上由經濟價值話事：如果有一件貨，佢好能夠滿足消費者嘅慾望，對所有消費者嚟講都有好高嘅經濟價值，令所有消費者都肯付出高嘅代價嚟得到呢件貨，最後結果件貨就會有高嘅需求量，所以（根據需求定律）呢件貨就會有高嘅市場價值。

睇埋

• 生產同消費
• 供應同需求
• 創新
• 市場定位
• 廢工

參考

• Bourdieu, Pierre (1984). Distinction: A Social Critique of the Judgement of Taste (paperback). Cambridge: Harvard University Press. ISBN 978-0-674-21277-0.
• Deaton, Angus (1992). Understanding Consumption. Oxford University Press. ISBN 978-0-19-828824-4.

拎

• （英文） Economic value. Investopedia.