廣府學宮

廣府學宮（廣州文廟），廣州府嘅府學學宮，同省城內番禺學宮同南海學宮以省城三大學宮齊名（府學至大）。原先喺廣州城內番山一帶，即係家下文明路以北，文德路以西，府學西街以東，而北面隔一隔先到中山五路。

廣府學宮位置。北面仁愛大街一段，即係定下中山五路，南面對住文明門，城牆拆咗變文明路。府學東街，即係文德路，起路拆咗廣府學宮東側。府學東街仍然保留至今。

史

• 
  大門口
• 
  大成殿
• 
  元碑同香爐

宋慶曆（1401-1408）年中，皇帝落柯打要整學校，廣州就喺西城嘅番市（宜家嘅光塔路一帶）用舊孔廟搞學校。後尾搬過幾輪，到咗紹聖三年（1096），廣州知府章楶搬個府學到省城東南嘅番山（宜家廣州市十三中入邊）下。時府學可容學員150人有多，係嶺南第一嘅儒林。後尾又加咗禦書閣、亭齋泮池、觀德亭。淳祐四年（1244）陣，經略使方大琮改建飛閣，隔離排著文、行、忠、信4個齋，呢個就係番山書院。

元代、明代陣試過停下又辦返個學宮幾次。喺明嘉靖十九年（1540）復辦陣，敬一亭搬咗去番山。萬曆二十八年（1600），教授董應舉呈請督學副使袁茂英重建殿、廡、亭、閣同埋啟聖、名宦等祠堂，收返府學西邊地皮，起學舍廊同埋射箭場，開埋城牆窿搞正門，改名文明門（文明路就咁來嘅）。

清順治、康熙、雍正、乾隆年間，有過幾次重修同擴建。咸豐七年（1857）喺戰亂中毀咗。到同治元年（1862），知府李福泰等發起籌款重建，照原貌搞新正個學宮。文昌宮後尾改成仰高祠，第度起返個文昌宮，清埋宮牆外啲住屋，愛來改起舊閣，補起東西聖域、賢關兩石坊。

拓闊文德路

1918年10月廣州市政公所成立後，計劃整闊條府學東街做馬路，時潮梅鎮守使劉志陸同省員警廳廳長魏邦平寫信話，要留返低府學東街東側嘅劉家祠，魏因而改咗拓闊路線偏西啲，變咗要徵用學宮東邊啲地，呢個範圍度要拆學宮嘅文昌宮、仰高祠、名宦祠，主體嘅大成殿、明倫堂、崇聖殿當時唔使拆。改完嘅工程計劃就畀省城紳士反對得好衡。

1919年1月，清末進士兼粵紳易學清，擔大旗要求停低開路，市政公所未有理，就同啲粵紳齊電北京嘅廣東會館求助。後由梁士詒擔大旗，用旅京廣東人士個名，施壓廣東當局，北京政府總理錢能訓都聯絡埋廣東軍政府要渠處理好呢單嘢。

桂系元老岑春煊後尾同廣東軍政府分別寫信畀北京國務院同埋啲紳士，澄清開路唔係拆曬啲屋。後尾2月下旬開始派員實測同畫規劃工程則，送請粵紳參照，之不過啲粵紳仲係不滿。到1919年3月14號，公所驚啲反對人士阻埋開工，派咗成百個員警遊擊隊（類似特警）去睇場，睇著工程隊拆咗文昌宮等開路。

後續

1920年代尾，學宮再畀當局佔用，成咗廣東陸軍衛戍醫院，大成門嘅門廳畀封埋間成病房。1938年-1945年廣州淪陷期間，大半學宮嘅圍牆畀人毀埋。光復後廣東省政府喺1947年1月，喺學宮南面部分設立廣東省文獻館。1949年後，文獻館啲建築慢慢畀拆曬，改成廣州市第一工人文化宮等。

省立中山圖書館少兒部仲剩低原學宮嘅翰墨池，同番山亭。

參攷

• 〈第18期 广府学宫 难敌世事沧桑，岭南第一儒林风流云散〉。
• 〈广府学宫今昔〉。

睇埋

• 廣州市歷年拆毀文物一覽