開主選單

廣韻

宋代嘅官方韻書

 大宋重修廣韻粵拼daai6 sung3 cung4 sau1 gwong2 wan5 》,簡稱《廣韻》,係中國頭一部由政府主修嘅韻書,喺北宋大中祥符元年(1008年)由陳彭年中文陳彭年哋奉詔去寫,主要係增訂自先前嘅兩本韻書《切韻》同《唐韻》。《廣韻》總共收206個韻,包括平聲57韻、上聲55韻、去聲60韻、入聲34韻。

佢係切韻音系嘅韻書之一,喺清朝重新發掘佢之後,啲人用佢作爲知曉古音嘅重要書籍。而高本漢利用佢去復原中古音。《廣韻》之前嘅切韻系韻書曾經長期失傳,但二戰後發現咗王仁昫《刊謬補欠切韻》嘅完整版。

背景

北宋真宗時,由於舊時嘅韻書有幾多漏誤,用來做科舉標準唔得掂,就敕命去編寫《廣韻》。

內容

《廣韻》嘅卷首記載話佢收咗2萬6194字,註解有成19萬1692字。之不過有啲字係多音字,一隻字有幾個音,所以其實有重複計數,今人踢走重複,計出嘅真實收錄字數係一萬六千字左右[1]。《廣韻》總共有五卷,韻目中平聲有57韻(上平聲28韻,下平聲29韻。平聲分咗上下兩卷,係因爲平聲字多,分兩卷係爲咗編纂上嘅方便,音韻上冇唔同,而區別於其他三聲),上聲有55韻,去聲有60韻,入聲有34韻,合計206韻。之不過,同時相鄰嘅兩個或三個韻可以通押同用,即係押韻時可以按規定諧押唔同嘅韻,按通押嘅韻數計,平聲有31,上聲有30,去聲有33,入聲有19,總共係113韻(不過呢個通押規定係《廣韻》編纂完之後又再改過嘅,本來係平聲32、上聲32、去聲34、入聲19,總共117韻)[2]。個通押規則直到平水韻都冇變,平水韻有106韻。

相比原本嘅《切韻》,《廣韻》多出13韻,佢哋分別係:

  • 分開咗真韻嘅開口同合口,增加咗合口嘅「諄、準、稕、術」[3]
  • 分開咗寒韻嘅開口同合口,增加咗合口嘅「桓、緩、換、曷」
  • 分開咗歌韻嘅開口同合口,增加咗合口嘅「戈、果、過」
  • 追加番對應住嚴韻嘅上聲韻同去聲韻,增加咗「儼、釅」

以上四項嘅最後一項,係8世紀初嗰陣由王仁昫追加嘅,除此以外,都係將啲韻分咗開合,但音節嘅種類自身並冇增加到(開合係指介音係咪圓脣,而押韻係押韻腹同韻尾,唔睇介音,所以喺通押中會冇咗開合區分),所以冇本質嘅變化。

  1. 水谷誠 (2004年). 《『大宋重修広韻』と『大広益会玉篇』》(«大宋重修廣韻»同«大廣益會玉篇»),出自叢書:《«集韻»系韻書研究》. 白帝社. 第 181頁. ISBN 4891746920. 
  2. 小川環樹 (1977年). 《唐詩の押韻》(唐詩嘅押韻),出自叢書:《中國語學研究》. 創文社. 第 87~115頁. 
  3. 不過有一部分合口字依然留咗喺真韻度。