徐世昌

徐世昌（1855年10月23號—1939年6月5號）係中華民國北洋政府大總統，1918年到1922年在任。

徐世昌

生平

徐世昌喺清咸豐五年九月十三日（即係1855年10月23號）響河南省出生。佢好早就結識咗袁世凱。之後徐世昌做咗舉人，1886年做進士。佢喺嗰年入咗翰林院做庶吉士。

1897年，袁世凱小站練兵嗰陣，徐世昌做埋新建陸軍參謀營務處總辦，係袁世凱嘅幕僚。1905年，袁世凱搞新式警政，推薦徐世昌做巡警部尚書，負責京師治安。1906年，徐世昌做軍機大臣。1907年，徐世昌做東三省總督兼管三省將軍事務。1909年袁世凱失勢，徐世昌亦都自己請求引退，改咗做郵傳部尚書、津浦鐵路督辦。

1911年清朝搞責任內閣制，徐世昌做咗慶親王內閣嘅閣員。1914年袁世凱任命徐世昌做國務卿。1915年袁世凱搞帝制運動，徐世昌唔做國務卿。1916年3月，徐世昌又做番國務卿，但係只係做咗1個月度就辭職。1918年10月，徐世昌接替馮國璋做大總統。任內發生五四運動。1922年第一次直奉戰爭後，直系控制咗北洋政府，曹錕、吳佩孚幕後操縱老國會話徐世昌總統係非法，迫佢喺6月2號落台。之後由黎元洪做大總統，徐世昌退出政界。