黎元洪

黎元洪（1864年10月19號—1928年6月3號），字宋卿，中國湖北武漢人，係大清末期至中華民國初期嘅軍事同政治人物。1911年參與辛亥革命，1916年同1922年做總統，1928年死喺天津。

黎元洪

生平

1883年，黎元洪考入天津北洋水師學堂。畢業之後入咗水師。1906年，黎元洪做新軍第二十一混成協協統，駐守湖北武昌。

1911年武昌起義後，黎元洪畀起事嘅軍人推舉做湖北軍政府都督。1912年中華民國臨時政府喺南京成立，黎元洪被選做臨時副總統。1913年，黎元洪做副總統。

1915年袁世凱搞帝制運動嗰陣，封黎元洪做武義親王，黎元洪唔肯接受。1916年6月袁世凱過身後，黎元洪繼任大總統。1917年，佢同段祺瑞喺對唔對德國宣戰度意見分歧。黎元洪搵張勳入北京調解，但係張勳就趁機復辟咗宣統帝。張勳復辟失敗後，黎元洪辭職，由馮國璋接任大總統。

1922年第一次直奉戰爭後，大總統徐世昌落台。黎元洪又做大總統，1923年6月畀曹錕趕落台。