恐怖谷

恐怖谷（粵拼：hung2 bou3 guk1）係一個有關情緒同埋外觀設計嘅諗頭。簡化講，恐怖谷理論講嘅嘢係呢一點：「似人非人嘅物件會令人覺得恐怖。」

恐怖谷呢個諗頭源自機械人學，而到咗廿一世紀初，恐怖谷經已俾人應用落去角色設計同埋恐怖文學等嘅領域嗰度。

嗌法

英文：uncanny valley
日文：不気味の谷，日羅係 bukimi no tani

概論

精確啲講嘅話，恐怖谷個諗頭如下。

想像家陣畫一條線，X 軸表示「一件物體有幾似人類」，而 Y 軸就表示「人類對嗰件物體嘅好感」；心理實驗表明，呢條線會有個谷－^[1]

一般人傾向對完全唔似人嘅物體（例如係一架車）冇咩特別好感；
當一件物體個樣開始似人類，人通常會開始對佢有啲好感，例子可以想像有眼耳口鼻、特登整到個樣好得意嘅人形機械人或者毛公仔；
當相似度高到某個點、但嗰件物體又明顯唔係人嗰陣，人對嗰件物體嘅好感會勁跌，會覺得件物體令佢哋毛管戙，例如係喪屍，或者像真度高但明顯唔係人嘅機械人；
一般人對健康正常嘅人（最似人嘅物體）最有好感。

下圖就係恐怖谷理論嘅圖解：Y 軸表示好感度，X 軸表示似人度；實線表示靜止唔郁嘅物體，喺呢條線最低點嘅係死屍，而虛線表示曉郁嘅物體，喺呢條線最低點嘅係喪屍。

亦即話 $y$ 喺 $x=0$ 嗰陣會係 0（點 1），而隨住 $x$ 數值升， $y$ 會跟住升（點 2）；當 $x$ 升到咁上下去到某一個點， $y$ 會急跌（點 3）；然後當 $x$ 去到最大值嗰陣， $y$ 會急升同返去到最高點（點 4）。呢條線嗰個「谷」就係所謂嘅恐怖谷－「因為覺得件物體恐怖，而引致嘅好感度低谷」^[2]^[3]。

應用

恐怖谷理論喺理論同實用上都有用。

喺機械人學同電腦圖像學等嘅領域上，恐怖谷理論對人形機械人或者虛構角色嘅設計有所啟示，啲人設計呢啲嘢嗰陣往往想避免件嘢進入「似人非人」嘅恐怖谷。

恐怖文學好興運用恐怖谷嚟令創作嘅角色恐怖，好似喪屍同吸血鬼等恐怖文學成日用嘅橋段，都係講到一啲「望落似人但明顯唔係人」嘅事物^[4]。

睇埋

喪屍
吸血鬼
仙子
瘦長男
電腦圖像，廿一世紀初嗰啲好像真嘅 3D 模型，有時會進入人類嘅恐怖谷。

文獻

Bartneck, C., Kanda, T., Ishiguro, H., & Hagita, N. (2007). Is the uncanny valley an uncanny cliff? Proceedings of the 16th IEEE, RO-MAN 2007, Jeju, Korea, pp. 368–373.
Miklósi, Ádám and Korondi, Péter and Matellán, Vicente and Gácsi, Márta Ethorobotics: A New Approach to Human-Robot Relationship. Frontiers in Psychology, 2017, 8, p. 958.

引述

↑ Mathur, Maya B.; Reichling, David B. (2016). "Navigating a social world with robot partners: a quantitative cartography of the Uncanny Valley". Cognition. 146: 22–32.
↑ MacDorman, K. F.; Chattopadhyay, D. (2016). "Reducing consistency in human realism increases the uncanny valley effect; increasing category uncertainty does not" (PDF). Cognition. 146: 190-205.
↑ MacDorman, K. F.; Ishiguro, H. (2006). "The uncanny advantage of using androids in social and cognitive science research" (PDF). Interaction Studies. 7 (3): 297-337.
↑ Laks, Z. A. (2015). Derelict dolls and strange spaces: the horror of the uncanny valley in the films of Roman Polanski. Studies in Eastern European Cinema, 6(2), 154-168.

拎

（英文）恐怖谷，電視橋段網講恐怖谷嘅概念。

[1] Mathur, Maya B.; Reichling, David B. (2016). "Navigating a social world with robot partners: a quantitative cartography of the Uncanny Valley". Cognition. 146: 22–32.

[2] MacDorman, K. F.; Chattopadhyay, D. (2016). "Reducing consistency in human realism increases the uncanny valley effect; increasing category uncertainty does not" (PDF). Cognition. 146: 190-205.

[3] MacDorman, K. F.; Ishiguro, H. (2006). "The uncanny advantage of using androids in social and cognitive science research" (PDF). Interaction Studies. 7 (3): 297-337.

[4] Laks, Z. A. (2015). Derelict dolls and strange spaces: the horror of the uncanny valley in the films of Roman Polanski. Studies in Eastern European Cinema, 6(2), 154-168.

[1]

[2]

[3]

[4]