驚

驚（fear）係一種情感，當遇到一啲睇落危險或者有威嚇嘅嘢就會出現，特徵包括心跳同唞氣快咗、血壓高咗等等。喺現代心理學上，「驚」呢個概念可以噉樣想像：

• 人同第啲動物物種都經歷過幾億年嘅進化過程，受過物競天擇嘅考驗；喺自然環境當中，有好多嘢都能夠威脅一隻動物嘅生存，而正路嚟講，曉避開呢啲危險嘅動物個體會有比較大機會能夠生存落嚟並且繁衍後代，將佢哋嗰啲（令佢哋具有「避開危險」行為嘅）基因傳去下一代嗰度，所以進化嘅過程會令各動物物種具有求存嘅能力；
• 驚係一種求存嘅功能：喺人同大家鼠等嘅哺乳類動物當中，一隻動物會感知佢周圍環境，一旦佢探測到對佢生存有威脅嘅事物（例如係獵食者），佢就會驚；當一隻動物驚嗰陣，佢會進入一個戰鬥定逃走（fight-or-flight；即係準備打交或者走佬）嘅狀態－即係佢會出現心跳同唞氣加速等嘅生理變化，而呢啲生理變化會幫佢應付威脅，例如心跳加速會令隻動物嘅肌肉暫時多咗血用，而呢點有助佢對威脅作出還擊（戰鬥）或者快速噉跑（逃走）。
• 喺人等嘅某啲動物物種當中，驚仲可以引致面部表情出現變化：一塊表示驚嘅面會有多種特徵，例如係對眼好多時會擘到大一大，而呢點俾一啲心理學家指係一種進化上嘅適應－擘大啲對眼能夠幫助一隻動物更加睇清楚周圍嘅環境，有利於佢探測周圍環境當中存在嘅可能危險或者逃生路線。

一個人驚嘅樣

上述嘅理論思考亦都引起咗原始恐懼（primal fear）嘅概念：驚呢種情緒係進化而生嘅求存功能，而家想像有兩個原始人，第一個原始人天生就識驚一啲會對人造成危險嘅嘢（例如係大隻嘅野生動物），另外嗰個原始人冇呢種本能，一定要有人教先識驚嗰啲嘢；假設第啲因素不變，第二個人比較大機會會喺遇到危險嗰陣唔識即刻要驚同走佬而死亡；即係話，有啲嘢係喺人類進化史上一路都威脅住人生存嘅，搞到人進化到就算唔使學都本能上會識驚呢啲嘢－呢啲「人天生就會驚嘅事物」就係所謂嘅原始恐懼，死亡、黑暗、未知同尖銳嘅物件等等都被指係屬於原始恐懼。

睇埋

• 操作制約
  • 懲罰 (心理學)
• 杏仁核
• 恐怖故仔