維基百科

愛登士家庭

  提示：呢篇文講嘅唔係愛生事家庭。

愛登士家庭（粵拼：oi3 dang1 si6 ga1 ting4，英文：The Addams Family）係一個嚟自虛構故事入面嘅家庭成員，由美國漫畫家查理斯·亞當斯（Charles Addams）首創。愛登士早年曾經同佢嘅朋友雷伊·布拉德布利（Ray Bradbury）共同創作。喺一次訪談入面，布拉德布利談及由於搵唔到願意合作嘅出版商，兩人於是進行個別獨立創作，佢首創艾略特一族（the Elliott Family）而亞當斯就發明咗愛登士家庭（the Addams family）。

1964年電視劇嘅愛登士家庭主要角色

愛登士家庭係美國典型家庭嘅倒置諧仿；一個古怪，恐怖又有錢嘅家族，佢哋唔介意其他人對佢哋嘅睇法。呢家人最初喺一部單回漫畫現身，出版負責係由紐約客由1938年連載到1988年亞當斯去世為止。之後，呢部作品藉由電視、電影或者視像遊戲等媒介表現出來。

角色

編輯

主要角色

編輯
  • 哥梅茲（Gomez Alonzo Addams；全名：哥梅茲・阿隆索・愛登士，姓「阿隆索・愛登士」）係劇中男主人，祖籍卡斯提亞；鍾意食雪茄、玩火車模型，有律師資格但係冇執業，屋企有錢，所以唔太在意錢方面嘅事，亦非常慷慨，熱心公益。周不時會同佢老婆梅蒂絲講少少西班牙文。
  • 梅蒂絲（Morticia Addams；梅蒂絲・愛登士；冠夫姓前娘家姓Frump，Morticia個名接近英文嘅mortician，意思係仵工）係劇中女主人，哥梅茲嘅老婆。佢面青口唇白，擁有一頭長長嘅頭髮。冰冷嘅外表背後實際上係一個對家人好溫柔慈祥嘅好老婆、好老母。一講法文就會搞到佢老公好興奮咁拎住佢隻手嚟錫。
  • 溫絲黛（Wednesday Friday Addams；溫絲黛・愛登士）係哥梅茲同梅蒂絲所生嘅大女（有啲劇中，佢可能會係妹妹）。溫絲黛取名Wednesday有「星期三」嘅意思，係佢老母引用一首英國童謠《Monday's Child》中嘅一段「Wednesday's child is full of woe」，意思指「星期三出世嘅細路滿載憂愁」。紮孖辮打扮嘅佢，對顏色過敏，所以只會著黑白色嘅衫。識玩大提琴，最鐘意蜘蛛同虐待佢細佬。佢好叻，好聰明，但係因為行為問題，冇間學校讀得耐。
  • 帕斯利（Pugsley Addams；帕斯利・愛登士）係溫絲黛細佬（有啲劇中，佢可能會係哥哥），造型一般都係著橫間衫同短褲。鍾意喺斷頭台玩，又鍾意俾佢家姐同佢玩坐水凳。
  • 肥斯特叔叔（Uncle Fester）係哥梅茲哥哥，佢係一個光頭、寒背、眼袋好大、著住大褸嘅叔叔。佢可以自己發電，用嘴唇含住燈膽就會著燈。
  • 阿手（Thing）係一隻自己識行識走、識諗嘢、識用唔同方法同人溝通嘅手，例如摩斯碼、拍手指。
  • 路奇（Lurch）係愛登士家庭嘅管家，有成兩米幾高。
  • 嫲嫲（Grandmama Addams）

其他角色

編輯
  • Pubert Addams，1993年電影中出現嘅BB仔，係溫絲黛同帕斯利嘅細佬。
  • Itt表哥（Cousin Itt）全身都被長長頭髮遮住但又戴住副眼鏡，觀眾同一般人只會聽啲都叫吱吱聲講嘢，佢嘅說話只有家庭成員先聽得明。

改編作品

編輯

出面網頁

編輯
由「https://zh-yue.wikipedia.org/w/index.php?title=愛登士家庭&oldid=2179527」收