新字形

新字形，係源自中國大陸漢字改革採用嘅字形，最初標準係據1965年《印刷通用漢字字形表》，以楷體同俗體字為準嚟到修改宋體（明體），唔單止適用於簡化字，重適用於繁體字，中國大陸嘅中易宋體就係採用呢個標準，同臺灣嘅標楷體同新細明體（PMingLiu/MingLiu）、香港嘅舊細明體，同埋大陸嘅中易楷體都有啲差異。

另外，臺灣嘅國字標準字體（簡稱「臺標」）都係用楷體嚟改造宋體（明體），所以「新字形」喺廣義上亦都可以同時包括大陸嘅規範字形同埋臺灣嘅國字標準字體，呢個用法喺繁體地區好常見。以下嘅敘述，主要係講狹義嘅大陸新字形。臺灣用楷體改造宋體嗰部份，請見國字標準字體條目。

同新字相對嘅傳統明體（宋體）叫傳承字形或者舊字形，宋體同楷體嘅差異本來係正常嘅印刷體同手寫體嘅字體差異，譬如「言」字，楷體第一劃係點，但係宋體舊字第一劃係橫（「言」），大陸嘅《印刷通用漢字字形表》就係跟楷體同俗寫對宋體做咗改革。由於新字主要從俗、從簡，筆劃大多數都少啲，好多時被以為係簡化字，好似有人誤以為「爭」係「争」嘅繁體，其實係明體舊字形。當然，「爭」字喺中易宋體度，都係會變成新字化嘅風格，「爫部件」第二至第四筆會向內。而傳承字形「爫部件」第二至第四筆會向外。

傳承字形或者舊字形，主要係指傳統嘅明體字，起源於明朝，直到而家。代表書有《康熙字典》、《中文大辭典》、《大漢和辭典》、《漢韓大辭典》、《中華大字典》之類。喺日本就被叫做舊字體、正字體。喺韓國就係標準嘅印刷字形。不過，舊字形有若干個由文字學者研訂嘅標準，但係無一個硬性嘅唯一標準，即使係未修改過嘅韓國字形、舊細明體（細明體到3.21版為止，係用接近傳統宋體嘅字形，新版就用咗國字標準字體）等電腦字體，都有啲字同《康熙字典》上嘅字形唔同。之但係嗰啲因為大陸新字形或者臺灣國字標準字體改造之後先至出現嘅寫法，或者喺手寫書法、仿楷體字彫版呢啲場合先出現嘅字形，就唔可以算係舊字形。