中華巴士
中華汽車有限公司（China Motor Bus Company Limited，簡稱中華巴士或者中巴；CMB；港交所：00026）係香港嘅地產發展商，亦曾經係香港嘅主要公共交通機構之一，由顏成坤同埋佢大舅黃耀南喺1923年創立。
史
編輯.jpg)
中巴起初喺九龍半島提供巴士服務，1930年代初開始經營新界路線。其後政府喺1933年實施巴士專營權，中巴獲得香港島嘅巴士服務專營權。戰後由於港島區人口增長，中巴不斷擴張巴士路線網絡。1970年代係中巴嘅全盛期，當時中巴更加引入新款巴士吸納客源。1972年紅磡海底隧道通車，中巴聯同九巴合營過海隧道巴士路線，中巴車輛喺九龍半島再次出現。
自從地鐵港島綫喺1985年5月31號投入服務之後，中巴嘅乘客量下跌咗超過一半，造成中巴嘅服務水平一直倒退。其後喺1989年中巴因勞資雙方就退休金安排出現爭拗並談判破裂，導致中巴員工發動大罷駛事件，造成香港島交通大混亂，為當時喺香港島經營屋邨巴士線嘅城巴製造先機，不斷搶走中巴客源。自1990年代初中巴服務持續欠佳，香港政府喺1993年同1995年分別將中巴26條同14條路線攞出嚟作公開競投，城巴憑住過去喺香港島嘅良好業務，獲得呢兩批路線嘅專營權。隨後城巴大規模擴張港島巴士網絡，令中巴喺港島區巴士業務造成了史無前例嘅壓力。
1998年2月17號，港府宣佈唔再延續中巴嘅專營權，原因係中巴服務水平仍然冇改善，政府唔再畀機會。政府將中巴嘅88條巴士路線公開競投（而有部分路線沒有經競投而交由城巴經營），雖然中巴曾經連同英國第2大巴士集團Stagecoach聯合組織財團，同新世界發展為首嘅新世界第一巴士、由城巴、長江基建、香港中旅集團組成嘅香港聯合巴士有限公司，以及包括九巴等多個財團競投巴士路線，但結果仍然由新世界第一巴士成功競投到中巴嘅88條路線，而中巴嘅專營權亦喺1998年8月31號深夜告終。
喺專營權完咗之後，中巴轉為經營一條來往港運城同埋北角政府合署之間嘅非專利巴士線，到2015年都收埋檔。除此之外，中巴將位於柴灣嘅巴士車廠租畀接辦香港島路線嘅新世界第一巴士作日常運作之用。後來呢間巴士廠亦曾經租過畀城巴同埋大巴士公司作短期車廠之用，柴灣巴士車廠曾經被建議攞嚟做「巴士博物館」，但係無疾而終。到2018年，中巴同太古成功申請將車廠地皮改用途，變成商住項目，車廠喺2020年開始清拆。
2019年，家姐顏潔齡因為年事已高，將中巴主席交畀細佬顏亨利。2022年，中巴請咗曾經喺中國三大電訊公司都做過高層嘅翁順來做行政總裁，翁氏本身係中巴嘅老伙計，喺88至95年間係中巴嘅總會計師。[1]
線
編輯非專利巴士線
編輯隨住中巴作為其中一個發展商嘅地產項目北角港運城喺1998年落成之後，中巴營運佢唯一一條非專利巴士線，來往港運城同埋北角政府合署之間。條線喺2015年6月30號最後一日服務。
睇埋
編輯出面網頁
編輯
- ↑ 東網, on cc。〈中巴請新CEO 究竟有幾猛料？ | on.cc 東網〉。LINE TODAY (繁體中文)。喺2022-12-28搵到。