丹尼士巨龍
丹尼士巨龍（Dennis Dragon），香港中華巴士嗰啲特別稱為丹尼士禿鷹（Dennis Condor），後來又間唔中稱為Dominator 6X2，係英國丹尼士車廠出嘅一款三軸後置引擎雙層巴士。
| 丹尼士巨龍/丹尼士禿鷹 Dennis Dragon/Dennis Condor | |
|---|---|
 丹尼士巨龍12米冇冷氣巴士  由香港中巴轉投新巴嘅丹尼士禿鷹冷氣巴士  由肯雅返番英國嘅丹尼士巨龍 | |
| 製造廠 | 丹尼士車廠 |
| 邊道出 | 英格蘭Guildford |
| 取代咗 | 無 |
| 製造年份 | 1981年—1997/1998年 |
| 後繼產品 | 丹尼士三叉戟3型 |
| 主要對手 | 利蘭奧林比安 都城嘉慕威曼都城巴士 富豪奧林比安 Scania N113 |
| 規格 | |
| 長 | 9.9米、10.3米、11米、12米 |
| 闊 | 2.5米 |
| 高 | 4.4米 |
| 引擎 | 吉拿6LXC/6LXCT/LG1200 康明斯L10/M11 |
| 波箱 | Voith DIWA ZF Ecomat |
設計
編輯丹尼士巨龍嘅設計係源自兩軸嘅丹尼士統治者，佢加多咗一條中軸作為輔助車軸，緊貼住驅動軸。初時嘅丹尼士巨龍條中軸只係兩個車轆用防傾桿連埋，唔係真嘅車軸，1986年先至開始用真嘅車軸。
初時嘅丹尼士巨龍得12米長版本，而三條車軸都擺得比較前（同同期嘅都城嘉慕威曼都城巴士同埋利蘭奧林比安三軸車比）。後來應巴士公司要求而出埋11米版，但車軸位置冇12米版擺得咁前。
丹尼士喺1989年整咗第一架有冷氣嘅丹尼士巨龍，用一副引擎同時行車同埋行冷氣。初時出嘅丹尼士巨龍冷氣巴士都係11米長，後來出埋9.9米（前輪跨短啲）、10.3米同埋12米版（車軸位置冇12米冇冷氣版擺得咁前）。
丹尼士巨龍可以用吉拿或康明斯引擎，並配Voith或ZF波箱。而車身方面，除咗有4架樣辦車係用亞歷山大車身之外，其餘嘅（包括全部量產型）係配都普金屬部分車身。
香港
編輯九龍巴士
編輯1982年，九巴買咗3架12米丹尼士巨龍嚟試，呢3架車係配亞歷山大車身，有上落車門各一隻。九巴喺1983至1986年買多188架12米巨龍，但改配有三隻門嘅都普金屬部分車身，一隻門上車兩隻門落車。
1986年，九巴開始引入11米巨龍巴士。1986至1994年間，九巴買咗371架11米巨龍，但係由於1990年至1991年嘅一批共50架巴士嘅其中一副底盤喺於運送時損毀，得49架（車隊冧巴S3N222-270）投入服務，所以合共有370架。其中50架11米巨龍嘅車尾被密封，預咗畀人裝冷氣，但九巴一直都冇裝冷氣上去。
1990年，九巴引入一架11米巨龍冷氣巴士嚟試。之後九巴開始引入丹尼士巨龍冷氣巴士，包括喺1991至1997年引入多359架11米巨龍冷氣巴士、1993至1999年引入235架9.9米巨龍冷氣巴士、1997至1998年引入170架12米巨龍冷氣巴士。
隨住九巴車隊更新嘅進度，全部12米冇冷氣巨龍已經喺1997至2003年退役，而11米冇冷氣巨龍除咗兩架喺1994年（交通意外）以及1999年（改裝）提早退役之外，其餘嘅喺2002至2012年退役。11米冷氣巨龍有4架因交通意外而提早退役，其餘嘅亦喺2007至2015年退役。兩架12米冷氣巨龍因交通意外或者燒車而提早退役，其餘嘅喺2015至2016年退役。兩架9.9米冷氣巨龍因交通意外而提早退役，其餘嘅亦自2011至2017年退役。九巴旗下嘅丹尼士巨龍退嗮役之後，佢嘅車隊亦全面低地台化。
中華巴士
編輯1982年，中華巴士接收咗兩架12米丹尼士禿鷹嚟試，佢哋分別配都普金屬部分車身同埋亞歷山大車身，兩架都係得兩隻門。其中配都普金屬部分車身嗰架曾經係全港載客量最高嘅巴士，載到171人，個紀錄到今時今日都冇巴士打破到。
不過中巴揀咗買三軸嘅都城嘉慕威曼都城巴士，去到都城嘉慕威曼業務喺1989年完咗至開始買丹尼士禿鷹。中巴喺1989至1990年間引入46架12米禿鷹，同埋喺1990至1991年間引入28架11米冇冷氣禿鷹。另外中巴喺1990至1997年間引入92架11米冷氣禿鷹。
1998年9月1號中巴專營權完咗之後，啲禿鷹都賣晒畀新世界第一巴士。其中3架12米禿鷹改裝為訓練巴士，其餘45架12米禿鷹喺1998至1999年退役，其中多架運返英國繼續行。至於冇冷氣嘅11米禿鷹，新巴喺1999年將其中一架（車隊冧巴DM6）改裝為開篷巴士，2000年開始行15C，直到2008年1月；2000年新巴賣咗3架畀城巴做訓練巴士；而其餘嘅就喺2002年退役。新巴將其中一架（車隊冧巴DM28）油上「新巴最後一架熱狗」特別色，並喺2002年8月17號新巴冇冷氣巴士嘅最後一日出席遊車河活動。最後兩架退役嘅冇冷氣11米禿鷹都俾人保留，一架（車隊冧巴DM17）返咗英國，而DM28就由新巴保留，不過DM28喺2004年連同多架冇冷氣11米禿鷹一齊俾人拆咗。
新巴2007年開始將一架11米冷氣禿鷹（車隊冧巴DA66）改裝為開篷巴士，2008年1月25號取代DM6。
新巴嘅禿鷹冷氣巴士喺2004至2015年退役。部分被轉售英國及杜拜等地繼續行，7架俾大巴士香港有限公司買入同埋改裝為開篷巴士，喺2008年12月開展佢嘅香港觀光巴士服務，2015年再轉賣去美國。
城巴
編輯城巴自1993年開始訂購丹尼士巨龍冷氣巴士，佢哋都係配都普金屬部分車身，但同九巴同埋中巴嗰啲唔同嘅，係城巴嘅都普金屬部分車身係用闊啲嘅前門，車頭用類似亞歷山大R型車身嘅設計，而車身裝嵌就係由葡萄牙嘅Salvador Caetano搞。
1994至1998年，城巴一共引入40架丹尼士巨龍10.3米單門冷氣巴士同埋80架丹尼士巨龍12米冷氣巴士。
2000至2002年，城巴將一架10.3米巨龍（車隊冧巴701）改裝成全球首架三軸雙層冷氣無軌電車。另有一架10.3米巨龍（車隊冧巴713）喺2002年9月焚燬報廢。至於其餘嘅丹尼士巨龍，10.3米版喺2011至2014年陸續退役，而12米版就喺2012至2015年陸續退役。
香港空運貨站
編輯1996年，香港空運貨站有限公司買咗4架丹尼士巨龍12米冷氣巴士做員工接送車。佢哋嘅外形同城巴嘅相似，但冇路線牌同埋裝咗窄身啲嘅3+2標準座椅以提升載客量。
由1999年9月起，香港空運貨站唔再親自經營自己嘅員工接送巴士線，因此呢4架巴士俾新巴買入，巴士喺2000年重新投入服務。四架車喺2013年退役。
非洲
編輯1992年，英國Stagecoach集團買入10架11米丹尼士巨龍巴士，全部編配去馬拉維。1995至1996年Stagecoach集團買多20架11米丹尼士巨龍巴士，並投放去肯雅。後來，全部喺肯雅行駛嘅巨龍被運返英國，並喺1998至2000年重新投入服務。
停產
編輯丹尼士巨龍喺1997至1998年間正式停產，俾丹尼士三叉戟3型低地台巴士取代。
之前嘅「丹尼士巨龍」、「丹尼士禿鷹」
編輯丹尼士喺1948年推出一款叫Dragon嘅拖頭，1949年宣佈停產。
丹尼士亦喺1950年代尾出過一款叫Condor嘅貨車。
出面網頁
編輯