丹尼士三叉戟3型

丹尼士三叉戟3型（Dennis Trident 3；以丹尼士三叉戟/Dennis Trident名義賣）係一款由英國丹尼士車廠出嘅三軸低地台雙層巴士，亦係丹尼士嘅第一款低地台雙層巴士，喺1996年推出。佢取代咗丹尼士巨龍/禿鷹雙層巴士。丹尼士車廠喺2001年正式併入TransBus International之後，三叉戟3型就改由TransBus出。

丹尼士三叉戟3型 Dennis Trident 3
香港新世界第一巴士嘅丹尼士三叉戟3型 喺新加坡嘅丹尼士三叉戟3型
製造廠	丹尼士車廠 /TransBus International
邊道出	英格蘭Guildford
取代咗	丹尼士巨龍/禿鷹
製造年份	1996年—2002年
後繼產品	丹尼士Trident E500（TransBus Enviro 500）
主要對手	猛獅24.310/24.350 Neoplan Centroliner N4026/3, N4426/3 富豪超級奧林比安
規格
長	10.3米、10.6米、11.3米、12米
闊	2.5米
高	4.17米、4.3米、4.4米
引擎	康明斯M11-305E 康明斯ISM-330 康明斯ISMe335
波箱	Voith DIWA ZF Ecomat

設計

丹尼士三叉戟3型底盤設計係源自丹尼士長矛/飛箭。佢有打直擺嘅後置式引擎，散熱水箱擺喺引擎右邊。中軸係驅動軸，而尾軸係輔助車軸，用嚟承擔車尾重量同埋縮短後輪跨。三叉戟3型底盤有4隻長度揀：10.3米、10.6米、11.3米同埋12米。其中10.3米版嘅前輪跨短啲。

佢可以配康明斯M11-305E歐盟二型引擎，後來改配康明斯ISMe335歐盟三型引擎，而北美版就配康明斯ISM-330引擎。初時波箱配搭係Voith DIWA863.3或者ZF 5HP590，後來多咗Voith DIWA864.4同埋Voith DIWA864.3，而後期嘅就用Voith DIWA864.3E或ZF 5HP602。三叉戟3型可以配亞歷山大ALX500或者都普金屬部分DM5000車身。

第一架樣辦車

第一架三叉戟3型樣辦車喺1996年被送去亞歷山大車身公司嵌咗一個有R型車頭設計嘅車身，而車身其餘部分就係ALX500嘅設計。呢架車俾丹尼士車廠留起作車型發展用途。2005年，架車改咗做開頂兼封咗前門，成為英國太陽報嘅宣傳車。

香港

九龍巴士

九龍巴士有兩架丹尼士三叉戟3型樣辦車。第一架喺1997年2月嵌好個亞歷山大ALX500樣辦車身，之後佢留喺英國做一連串測試，去到1998年至運去香港，1999年投入服務。

而第二架樣辦車亦係配亞歷山大ALX500樣辦車身，喺1997年5月運到香港，成為香港第一架低地台雙層巴士。之後架巴士俾人油成香檳色、貼埋顯示車廂地台嘅紅線同埋幾個人仔嘅貼紙，以宣傳佢嘅「超低地台」（九巴叫法）設計。巴士喺1997年11月17號投入服務。

1998至1999年，九巴引入186架12米丹尼士三叉戟3型巴士，116架配亞歷山大ALX500車身，70架配都普金屬部分DM5000車身。之後喺1999至2000年間引入50架配都普金屬部分DM5000車身嘅10.6米三叉戟3型巴士。

到咗2000年，九巴引入多110架配都普金屬部分DM5000車身同埋電子路線牌嘅12米三叉戟3型巴士。2001年九巴引入多50架10.6米三叉戟3型巴士，不過係配改良型亞歷山大ALX500車身，其中兩架特別改配歐盟三型引擎同埋油咗漸變嘅車身色彩。

2002年，九巴引入50架配改良型亞歷山大ALX500車身同埋歐盟三型引擎嘅10.6米三叉戟3型巴士。同年九巴訂咗100架配同款車身嘅12米三叉戟3型巴士，不過後來改為淨係要80架，批車喺2002至2003年出。

2002年九巴亦買咗14架原本屬於龍運巴士、配亞歷山大ALX500車身嘅12米丹尼士三叉戟3型巴士。2010至2015年，九巴再由龍運巴士買103架丹尼士三叉戟3型巴士。

九巴有幾架丹尼士三叉戟3型巴士焚燬報廢。一架12米版喺2002年底燒咗，隨後喺2003年退役；三架12米版（其中一架係前龍運嘅車）同埋一架10.6米版喺2008年3月31號响天水圍嘅九巴廠入面燒咗，同年7月退役。一架12米版喺2015年1月燒咗，同年6月退役。由於車齡關係，九巴嘅丹尼士三叉戟3型巴士喺2015至2021年逐步被淘汰。當中有幾架前龍運嘅巴士做咗幾年訓練巴士，亦有兩架前龍運嘅巴士改成開篷巴士之後轉咗畀同集團嘅陽光巴士，另外有3架歐盟三型引擎12米三叉戟3型巴士都一樣轉咗畀陽光巴士。

喺1997年投入服務嘅第一架三叉戟3型巴士，喺2015年9月22號退役後由九巴保留。

龍運巴士

龍運巴士喺1997至1998年引入150架配亞歷山大ALX500車身嘅12米丹尼士三叉戟3型巴士，行北大嶼山及機場巴士線，其中25架係客車版，有大啲嘅行李架。

其中一架巴士因為喺1999年7月燒咗之後退役。後來查出架車起火係因為設計問題，因此丹尼士車廠整咗一架配都普金屬部分DM5000車身嘅三叉戟3型巴士，並喺2000年投入服務。

後來由於車隊過剩，龍運巴士自1999年起陸續將其中20架三叉戟3型巴士租咗畀九巴，其中14架喺2002年賣咗畀九巴，而其餘6架喺2005年或之前返咗龍運巴士。2010至2015年，龍運再有103架丹尼士三叉戟3型巴士賣咗畀九巴，另外有兩架丹尼士三叉戟3型喺2010同埋2011年撞車而提早退役。剩低30架亞歷山大ALX500車身嘅三叉戟3型巴士，包括全部25架客車版，都喺2016年5至6月退役。至於唯一配都普金屬部分DM5000車身嘅三叉戟3型巴士，就喺2017年退役。

城巴

城巴有三架丹尼士三叉戟3型樣辦車，一架係配都普金屬部分DM5000車身嘅客車、一架係配亞歷山大ALX500樣辦車身嘅巴士，同埋一架係配都普金屬部分DM5000車身嘅巴士。

城巴喺1997至1998年引入61架12米丹尼士三叉戟3型客車，用嚟行機場線，11架配亞歷山大ALX500車身，50架配都普金屬部分DM5000車身。另外又喺1998至1999年引入60架配都普金屬部分DM5000車身嘅12米三叉戟3型半客車（單門、雙門版各佔一半。其中一架雙門版去到2000年至出）同埋40架配都普金屬部分DM5000車身嘅12米三叉戟3型巴士。

另外城巴喺1999年出咗一架配都普金屬部分DM5000車身嘅10.6米三叉戟3型客車，呢架亦係丹尼士出嘅第一架10.6米版三叉戟3型。

城巴喺2003年買咗9架原屬新巴、配歐盟三型引擎嘅12米三叉戟3型巴士。

由2010年開始，城巴陸續有三叉戟3型巴士同埋客車因為燒車或者撞車而提早退役，另外由2013年開始，城巴引入新嘅亞歷山大丹尼士Enviro 500客車去取代三叉戟3型客車行機場線，呢啲客車之中有兩架改行過境線，2016年退役；三架改做訓練巴士，2018年退役；八架賣咗畀冠忠巴士，2014年1月開始支援旗下新大嶼山巴士嘅過境線，2015年退役；兩架賣咗畀新大嶼山巴士，2016年退役；其餘嘅都係完全退役。而1998至1999年出嘅巴士亦由於車齡關係，喺2014年底至2017年被淘汰，得3架半客車調咗去非專利部，去到2019年完全退役。至於喺2003年引入嘅9架二手車，同樣喺2019年完全退役。

新世界第一巴士

新世界第一巴士喺1998年投得中巴88條線之後，就決定喺2000年8月31號前（即係兩年內）引入合共500架新嘅「特低地台」巴士（新巴叫法）去取代喺中巴買返嚟嘅冇冷氣巴士。第一批278架巴士之中有202架係12米丹尼士三叉戟3型巴士，160架配亞歷山大ALX500車身，42架配都普金屬部分DM5000車身。喺1998年9月1號交接當日，有十幾架投入服務，其餘嘅喺1998至1999年投入服務。

而第二批222架巴士之中有182架係丹尼士三叉戟3型巴士。50架係12米版，30架配亞歷山大ALX500車身，20架配都普金屬部分DM5000車身；30架係11.3米版，配亞歷山大ALX500車身；62架係10.6米版，配亞歷山大ALX500車身；40架係10.3米版，配都普金屬部分DM5000矮車身，用嚟行山頂線。佢哋喺1999至2000年投入服務。

新巴喺2000年引入1架配都普金屬部分DM5000車身嘅10.6米版三叉戟3型巴士。其後再喺2002年引入配歐盟三型引擎嘅三叉戟3型巴士，其中21架係12米版，配改良型亞歷山大ALX500車身；而其餘20架係10.3米版，配都普金屬部分DM5000矮車身（喺亞歷山大廠嵌），其中後者係史上最後一批巴士配都普金屬部分車身。

後來由於車隊過剩，新巴喺2003年將頭9架配歐盟三型引擎嘅12米三叉戟3型巴士賣咗畀城巴，再喺2004年底至2005年期間賣咗47架10.6米版同埋6架11.3米版三叉戟3型巴士畀九廣鐵路公司。

2015年，新巴將其中5架配歐盟三型引擎嘅12米三叉戟3型巴士改為開篷巴士，用嚟行人力車觀光巴士線。

2015至2020年，新巴嘅丹尼士三叉戟3型巴士亦因車齡關係而被淘汰。有一架喺2015年嘅12米巴士喺退役之後做咗幾年訓練巴士。2018年開始，新巴安排一啲配歐盟三型引擎嘅三叉戟3型巴士去城巴非專利部（14架10.3米，6架12米，後者其中一架改成閞篷車）或者做訓練巴士（4架10.3米），去取代俾政府強制退役嘅歐盟二型引擎巴士，直到2020至2021年冇得再續牌而退役。

九廣鐵路公司

九廣鐵路公司喺2000年引入22架11.3米版丹尼士三叉戟3型巴士，配改良型亞歷山大ALX500車身，服務新界西北（包括接駁西鐵路線），其後喺2004年底至2005年期間從自新巴買入47架10.6米版同埋6架11.3米版三叉戟3型巴士（全部配亞歷山大車身），以取代旗下嘅都城嘉慕威曼都城巴士，行接駁東鐵或者西鐵嘅路線。

兩鐵合併後九鐵公司將巴士租畀港鐵公司，行西鐵綫嘅港鐵巴士同埋東鐵綫嘅港鐵接駁巴士。2009年底開始，原本行港鐵接駁巴士線嘅三叉戟3型巴士全部改行港鐵巴士線。港鐵嘅三叉戟3型巴士喺2015至2017年退役。

加拿大

加拿大卑詩省嘅BC Transit喺1999年訂咗11架配都普金屬部分DM5000車身嘅三叉戟3型巴士。其中一架喺付運期間損毀，而其餘10架就喺2000年喺Victoria投入服務。

2002年，BC Transit出多19架配都普金屬部分DM5000車身（喺亞歷山大廠嵌）嘅三叉戟3型巴士，其中一架係用嚟代替喺付運期間損毀嘅同款車。頭16架去咗Victoria，3架去咗Kelowna。

新加坡

新加坡巴士公司（家下嘅新捷運）早喺1998年訂咗20架配都普金屬部分DM5000車身嘅三叉戟3型巴士，但由於丹尼士車廠要應付來自香港嘅大量訂單，因此底盤延遲至1999年底至開始陸續出廠。全部20架巴士喺2001年投入服務，2018年退役。

美國

美國嘅錦倫旅運（Gray Line）喺2001年引入40架配都普金屬部分DM5000開篷車身嘅三叉戟3型巴士，佢哋喺紐約市同埋聖迭戈等城市投入服務。

進一步發展

2002年，丹尼士三叉戟3型底盤俾TransBus改良，並配上全新車身，成為TransBus Enviro 500（後來改叫亞歷山大丹尼士Enviro 500）。2002年之後再冇已知嘅三叉戟3型底盤出廠。