新華輪
新華輪（s. s. Hsin Wah[1]）係招商局一隻輪船，主要行省城到上海嘅航綫，途中會經過香港。隻船1921年造，雖然喺招商局來講係新船，但多災多難，畀中國政府徵用過運軍用物資，畀海賊劫過，1929年重喺香港撞橫欄島沉船，死咗約四百人。
出廠 編輯
新華輪係英國蘇格蘭格拉斯哥，由造船商Messrs Napier and Miller爲招商局做嘅[2]。船1921年出廠[3]，出廠時1940噸，長270呎，闊40呎，深21.6呎[2]。
自始至終，船東（Owner）都係招商局輪船公司（China Merchants Steam Navigation Company）[2]。而船主（Master）係贊臣（M. P. Jensen），佢同招商局做咗超過十年嘢，好熟中國沿海水路[2]。
航綫 編輯
遇劫 編輯
1928年，新華輪復航。1928年4月12號禮拜四下晝，由上海出發，有三百個客同三百噸貨。4月14號禮拜六挨晚，喺福建附近，先前混喺客度嘅海賊發難，劫咗隻船。4月15號禮拜日晚黑，隻輪劫咗去近陸豐嘅三洲口（Samchau Inlet）。刼搭客現金20000圓港紙，重有珠寶，另外劫絲綢值12000圓港紙。佢哋擄咗五個客上輪嘅艇，重有船長（Captain）／船主贊臣（M. P. Jensen），大伙／大副（Chief Officer）賴氏（Lices）同另外三個海員擄埋上岸[2]。班海賊返轉頭，但只係帶返大副。
跟住中山艦（gunboat Chung Shan）出現，向住輪來緊。海賊即刻走上岸，而船長等人爬返隻艇去輪度。重同時發訊畀中山艦。艦派人去追賊，但兩個鐘無功而還[2]。
之不過，比起當時同類案情況好好多。起碼無流血，賊對受害人都好相與[2]。
雙船遇劫後，最後駛去香港。
沉船 編輯
隻船一如以往，由上海去省城，中間過香港同汕頭。隻船1929年1月11號喺上海出發，有103個船員，同約莫300個客，當中30個係女人，重有唔知幾個細路，同埋估計帶往2200箱貨去香港，另外重有唔少去省城。唔少搭客係解甲歸田嘅兵[2]。中間喺佢喺汕頭上貨，重上多廿個客[2]。
出事經過 編輯
喺1月15號正午早少少，隻船離開汕頭，向香港行[2]。去到1月16號未天光三點鐘，就來到香港境內。當時好大風，海起晒浪。當時二副睇住隻船，船長落咗去休息[2]。輪去到橫欄燈塔東便，看燈嘅人發覺隻船太近橫欄島北，嗰處近島有好多石[2]。
3點40分，就橫欄發出通知，隻輪觸礁[2]。擱淺後一個鐘內，至少有船四艘行過。但係天未光，天氣極差，無人發覺。而船又畀無浪沖返出海，到天光時分，太古船塢派船營救，但船都沉得七七八八，無可挽救。沉船之時，有啲搭客喺海度浮沉。而少數人好彩，畀香港仔同筲箕灣出海嘅水上人救起，最後送咗去尖沙嘴水警度。
全船除咗呢廿六人救得返，其餘大約四百人都葬身大海，是爲香港最大海難。
打撈 編輯
招商局無力打撈，事後將船拍賣，由得主打撈上水。