替代文字
替代文字（英文：alternate text，簡稱 alt text，又叫 text alternative）係指圖（或者其他非文字資料）喺用家睇唔到（包括因任何技術或者其他原因唔能夠正常顯示）嘅時候出現嘅文字，喺網頁嘅主要用途包括畀盲人透過熒幕閱讀器知道張圖係乜嘢，通常唔會好長。提供替代文字係喺數碼世界建立無障礙環境嘅支柱之一，喺一啲國家或者地區（例如安大略）可能係法例規定。
網頁嘅替代文字本來其實唔係畀盲人用，而係畀文字式網頁瀏覽器嘅用家用；一般嘅用家喺圖唔能夠下載嘅時候亦都可能會見到替代文字。
網頁應用
編輯喺 HTML，alt 屬性係為圖像定義替代文字嘅主要方法，但係 alt 屬性淨係可以用喺用 img 標籤定義嘅圖。W3C（訂定互聯網網頁標準嘅國際組織）對網頁嘅替代文字應該點寫有正式指引，係 WCAG 標準嘅一部分。
網頁上面嘅替代文字唔會好長，主要有兩個技術原因：第一係喺文字式環境（例如終端機），螢幕可以顯示嘅字數有限，用長嘅替代文字好唔合理；第二係用熒幕閱讀器嘅時候，如果替代文字太長，熒幕閱讀器唔會讀哂啲字，結果盲人仍然唔會知道張圖係乜。如果要寫長嘅替代文字，喺 HTML 可以用 longdesc 屬性，或者用 object 標籤。
為其他 HTML 元素定義替代文字嘅方法包括 aria-label 屬性（ARIA 標準嘅一部分），或者用 object 標籤嘅時候寫埋標籤嘅 ｢內容｣。
網頁並唔係單指網站；例如宣傳用嘅電子信其實係一種網頁，一般嘅電子書嘅主要部件其實亦都係網頁。