木結他

木結他指唔使用任何電子儀器幫手，就可以純粹用弦嚟發聲嘅結他，同電結他相對；原理係弦振會傳到琴橋，再傳到音板同共鳴箱放大。木結他主要分鋼弦嘅民謠結他或者原音結他（acoustic guitar；中國大陸叫原聲結他）同主要用尼龍弦嘅古典結他（classical guitar）。

民謠結他

雖然木結他自己出到聲，但係亦可以裝拾音器；因為民謠結他同古典結他嘅弦唔同質料，佢哋用嘅拾音器係唔同類型。

民謠結他

民謠結他係一般彈流行曲用嘅結他；除咗弦係鋼嘅之外，特徵係校音嘅六個扭掣會向出。民謠結他嘅揸法主要係向左傾斜到幾乎打橫，琴身用大脾承起，樂譜比較多用結他譜（tabulature）。

古典結他

古典結他係彈古典音樂用嘅結他；喺尼龍弦發明之前，佢用嘅係用貓腸（即係羊嘅腸）造嘅弦（而今都仲有用）。除咗弦嘅質料之外，古典結他嘅特徵係校音嘅六個掣會向下，而揸法主要係向左斜大概 45°；可以擺到咁斜嘅方法主要係用腳凳托起左腳，亦都可以用特別嘅架托起個琴。樂譜方面，幾百年前雖然係用結他譜，但係而今主要係用五線譜。