拾音器

Pickup（粵拼：pik1 ap1），書面語叫拾音器，係一種裝喺樂器上面或者入面，將樂器某個發聲部位嘅震動轉成電子訊號嘅架生仔（爾種功能叫做 ｢拾音｣），按有冇內置擴音功能分被動式（即係純綷拾音，唔使插電）同主動式（即係有擴音功能，要用電芯）兩種；按操作原理主要分 ｢磁圈收音｣ 同 ｢接觸式｣ 兩大類，但係亦有其他設計，例如裝喺樂器入面或者上面嘅小型咪。有弦嘅電子樂器一般要有拾音器先出到聲，但係唔係電子嘅樂器，例如普通嘅小提琴或者鋼琴，亦都可以裝拾音器。

電結他用嘅磁圈收音拾音器；左面嗰兩個係單線圈，右面嗰個係雙線圈

小提琴用嘅接觸式拾音器

裝咗外掛磁圈收音拾音器嘅民謠結他

拾音器可以駁擴音機之後透過喇叭直接出聲，又或者駁混音器或者錄音卡（audio interface）混音、錄音或者出聲。

磁圈收音

磁圈收音嘅原理係用磁石將鋼弦磁化，然後用線圈感應弦震產生嘅磁場，所以淨係用鋼弦嘅樂器先可以揀用磁圈收音。

另外，如果嗰件唔係電子樂器，因為磁圈收音感應唔到件樂器嘅其他震動，佢唔會收到音板嘅震動，所以收到嘅聲一定唔會太似件樂器嘅原聲；另外，如果樂手用嘅技巧用到弦以外嘅其他部位（例如用手拍個琴身，當佢係敲擊樂器用），亦都唔會收到嗰啲聲。

雙線圈拾音器

磁圈收音拾音器嘅線圈基本上係一條天線，所以極易受到外來電波干擾，視乎當地交流電嘅頻率，聽出來會係 50 或者 60 赫嘅雜音（hum），減低雜音可以用多一個線圈，送出一個相位相反嘅訊號，等兩個相位相反嘅雜音自己滅咗自己，爾種雙線圈嘅設計叫 humbucker（意思係 ｢反雜音嘅嘢｣）。

接觸式

接觸式拾音器嘅原理係壓電效應，主要裝喺樂器嘅音板嘅某度地方，感應音板嘅震動。

個別樂器嘅考慮

一個比較邊緣嘅情況係民謠結他；雖然佢六條都係鋼絃，但係低音嘅四條丩咗銅線，所以磁場會收得唔好，加上磁圈收音會收到一種有小小類似電結他嘅聲（所謂有 ｢電味｣），有人認為民謠結已經好少用磁圈收音，但係其實爾種拾音器一直都仲有出同有得賣，所以其實一直都仲有人用。