李從珂

李從珂（885年2月11號—937年1月11號），係後唐第四位皇帝，亦係後唐最後一個皇帝，934年到937年在位，佢無廟號，史稱唐末帝，小字二十三，因此又被叫做阿三。

生平

李從珂十幾歲嗰陣，佢媽咪魏氏俾當時重係將領嘅後唐明宗李嗣源俘擄咗，李從珂冇幾耐就俾李嗣源改名仲收咗佢做養仔。大個之後身形大隻健壯，又好打得，成日跟隨李嗣源周圍打仗，都幾得佢養父歡心。莊宗亦讚過佢：「阿三不惟與我同齒，敢戰亦相類。」

同光三年（925年），李嗣源因為屋企喺太原，所以上表請求，希望畀當時做衞州刺史嘅李從珂轉做北京（太原）内牙長步都指揮使，以便兩父子可以相聚，但就激嬲莊宗，李從珂被貶為突騎指揮使，率領幾百人守石門鎮。第二年李嗣源平定鄴都之乱嗰陣被迫造反，李從珂帶兵同李嗣源會合，幫佢養父奪位。

李嗣源做咗皇帝之後，李從珂曾經任職河中節度使，但又因為同權臣樞密使安重誨之前有過節，喺長興元年（930年），俾安重誨設計解除咗佢個軍權，返咗京師洛陽居住。第二年（931年），安重誨失勢，李從珂再受到重用，被任命為左衛大將軍、留守西京（長安）。長興三年（932年），被改任命為鳳翔節度使。長興四年（933年），升為封潞王。

後唐應順元年（934年），閔帝李從厚聽信大臣嘅建議，調動各重要節度使嘅職，準備削弱藩鎮嘅實力，李從珂就驚喇，於是作反。李從厚任命王思同率大軍去討伐，王思同圍攻鳳翔城（今陝西鳳翔）。鳳翔城嘅城牆低，護城河又窄又淺，根本冇辦法守得耐。睇住鳳翔就嚟落陷，點知班討伐軍將兵驕橫，貪圖賞賜，李從珂捉住呢一點誘使討伐軍叛變，反敗為勝，冇幾耐就以摧枯拉朽之勢攻入京師洛陽，做埋皇帝，改元清泰，並派人將逃亡嘅李從厚殺埋。

李嗣源個女婿石敬瑭當時係重鎮河東節度使，李從珂同佢兩個當初喺李嗣源手下都係以勇力過人出晒名，彼此存有競爭嘅心。因此李從珂繼位之後，對石敬瑭就越嚟越猜忌，而石敬瑭亦都有謀反之意。

清泰三年（936年），石敬瑭就以調鎮去第二度試探佢，而李從珂真係將石敬瑭改任天平節度使，石敬瑭因此就叛變，同時向契丹乞求援手。李從珂命令各個鎮聯合討伐，點知因為聯軍都各懷鬼胎，以致大敗於團柏谷，石敬瑭同契丹大軍就得以順利咁南下進逼京師洛陽，李從珂無晒辦法，喺閏十一月二十六日（陽曆937年1月11號）自焚而死。死後無諡號同廟號，史家稱之為末帝或廢帝。傳國玉璽亦喺呢個時候唔見咗。