林婉儀墮海案
林婉儀墮海案係2021年香港一單警員墮海殉職嘅事件。官方稱：37歲水警女高級督察林婉儀9月25號朝早喺沙洲對開海域執行反走私行動嗰陣，所坐嘅水警艇俾架走私艇撞到反咗，佢跌咗落海失蹤，艇上另有三個水警都跌咗落海，但好快就被救起咗而無大礙。林婉儀嘅遺體喺27號朝早喺二澳對開海域搵返[1]。
死者
編輯死者林婉儀（Kary Lam，1984年—2021年9月25號）死嗰陣37歲，2007年加入警隊，初頭喺屯門警區做軍裝警員，之後做過屯門刑事調查隊。到2015年加入水警分區，之後做咗第一個女嘅水警分區指揮官，殉職時係水警西分區高級督察[2]。佢結咗婚，並無仔女。
案發經過
編輯官方説辭：2021年9月25號朝早，林婉儀同埋3個水警人員揸住一架水警艇執行反走私行動，喺沙洲對開海域發現走私艇並展開追逐，走私艇突然高速撞反水警艇，四人跌咗落海，除林婉儀外嘅其餘三人好快獲救，但林婉儀就失咗蹤，警方進行搜救行動，一路都無發現。
27號朝早，有艇家報警話喺二澳對開海域發現懷疑浮屍，警方撈起同核實身份後，證實就係死者林婉儀。
後續發展
編輯案件由水警總區重案組第二隊跟進調查。到10月11號，警方公佈中國大陸公安已經拘捕咗兩個大陸男人，涉嫌嗰日用快艇蓄意撞向水警艇[3]。
警方為林婉儀舉行最高榮譽喪禮，喺11月2號喺紅磡世界殯儀館搞，而公務員事務局亦已批准將林婉儀安葬浩園[4]。有啲親中派人士當日都有送上花牌或出席致意，其中包括親中派藝人楊明同莊思明。楊明亦藉機喺花牌上為自己嘅燉湯店宣傳[5]。
相關事件
編輯由於反修例運動入面，警察被指濫用暴力執法或者以言入罪亂咁拉市民，所以令香港警方形象低落，網上有唔少表現出幸災樂禍嘅聲音，或者認為事件係報應，當中甚至包括有紀律部隊人員，至少有兩位消防員、一位懲教人員同埋一位警員[6]因為畀人發現發表嘲諷言論而被停職候查[7]。
另外有高登網民將嗰時熱播嘅流行歌《跌嘢唔好搵》惡搞歌詞做《墮海唔好搵》去嘲諷，受壓力落架後又創作過另一首嘅歌《落架唔好搵》。
而咁啱差唔多時間香港麥當勞都用咗《跌嘢唔好搵》嘅原裝歌詞宣傳，有建制網民覺得原裝歌詞一樣都有嘲諷意味，最後麥當勞要澄清返只係純粹搞宣傳，無任何其他含意。
參考
編輯- ↑ 〈【女警殉職】林婉儀遺體二澳尋回 蕭澤頤：水警艇被走私船撞翻 暫無人被捕〉。原先內容歸檔喺2021年9月28號。喺2021年9月28號搵到。
- ↑ 〈殉職高級督察林婉儀被封「走私剋星」 表現卓越多次獲獎〉。hk.news.yahoo.com (中文)。原先內容歸檔喺2021-10-02。喺2021-10-02搵到。
- ↑ 〈水警殉職｜駕大飛走私凍肉撞翻水警艇 中港合作拘兩內地私梟〉。原先內容歸檔喺2021年12月29號。喺2021年10月18號搵到。
- ↑ 王潔恩 (2021-09-30)。〈水警殉職｜警隊11月2日為林婉儀舉行最高榮譽喪禮 將下葬浩園〉。《香港01》 (香港中文)。原先內容歸檔喺2021-10-01。喺2021-10-02搵到。
- ↑ 〈水警林婉儀殉職 警隊舉行最高榮譽喪禮 | 立場報道 | 立場新聞〉。《立場新聞 Stand News》。原先內容歸檔喺2021-11-03。喺2021-11-03搵到。
- ↑ 〈涉網上嘲殉職女警林婉儀「抵死」 男警停職 (20:40) - 20210930 - 港聞〉。《明報新聞網 - 即時新聞 instant news》 (繁體中文)。原先內容歸檔喺2021-10-02。喺2021-10-02搵到。
- ↑ 〈【女警殉職】被指嘲諷林婉儀「抵死」 男警遭停職 至今四紀律部隊人員遭停職 | 立場報道 | 立場新聞〉。《立場新聞 Stand News》。原先內容歸檔喺2021-10-02。喺2021-10-02搵到。