維基百科

梁經國

梁經國（粵拼：loeng4 ging1 gwok3，英文：Kingqua[1]；1761年10月1號—1837年），字調禮（調讀掉，diu6 lai5）[2]，號左垣（zo2 wun4），商名經官（ging1 gun1），廣州黃埔村人，十三行天寶行創始人，官至誥授通奉大夫從二品[3][4]，追贈光祿大夫正一品[5]。佢係黃埔村左垣家塾嘅創辦人，亦創造咗家族二百年書香嘅傳奇[5]。

梁經國
字調禮
號左垣
出世1761年10月1號
廣東廣州
死1837年
廣東廣州
別名經官
職業商人
鄉下廣東廣州
黃埔村鳳浦南約榮西里
頭銜時期1808年～1827年
前任（無）
繼任梁綸樞
配偶凌氏
仔女梁綸勳（大仔）
梁綸樞（二仔）
梁綸煥（三仔）
梁綸機（孻仔）
父母梁昭緒（老頭）

生平 編輯

出身同早年 編輯

梁經國嘅先人住喺番禺北亭鄉，到咗明朝洪武初年，佢嘅祖上梁永成遷過嚟鳳浦[2]。老頭dau6梁昭緒係鄉村私塾嘅先生，因為淨教十幾個學生哥，先賺雞碎咁多doe1錢[6]，生活艱難。乾隆三十三年（1768年），梁昭緒過身，梁經國亦無錢讀書，日頭就趯dek3去廣州城做小販，晚黑返歸幫老母織布。乾隆四十三年（1778年），入馮氏洋行做伙記，學洋行商務[7]。乾隆四十八年（1783年），梁經國娶cou2凌氏[3]。之後，夫人就喺屋企織布，梁經國就響廣州幫馮氏洋行經營生意，開始搵到錢[3]。喺馮氏去外國嗰十幾年，梁經國主管洋行業務。佢做生意講誠信、無私心兼夾醒目，生意越做越大，成日賺咗都重有凸。等到馮氏翻廣州，梁經國照實同馮氏交代，於是馮氏心懷感激[8]。

創行 編輯

嘉慶十三年（1808年），梁經國喺其他十三行行商紛紛破產[9]嘅情況底下，得到馮氏支持，請旨創立天寶行[5]。天寶行創立之後，梁經國一直秉承「實在誠信」嘅理念，喺行商之中獨樹一幟，生意興隆。嘉慶末年，生意鼎盛[3]。

梁經國熱心公益事業。嘉慶十六年（1811年），佢同其他兩個行商捐錢起文瀾書院[10] ；又捐銀重修澳門媽祖閣[3]。就噉，梁經國得到社會各界嘅敬重。嘉慶二十四年（1819年），因為踊躍捐錢興辦河工，皇帝御賜牌坊嚟表彰；又同嘉慶皇帝作六十大壽，出咗二萬兩銀，係出錢最多嘅行商[3]。所以日後受朝廷嘅恩賞，升官進爵，由州同議，升同知，升運司，再升知府，官職疊加，後尾請封誥授通奉大夫從二品[3]。

晚年 編輯

道光七年（1827年），六十七歲嘅梁經國禀報粵海關，話自己年老多病想退出行務，要求核實批準，將行務交畀個仔梁綸樞接辦[3]。但係當時行商想退出行務，唔係話咁易。好彩梁經國畀咗粵海關三萬銀，先退出到[11] 。

道光十七年（1837年），梁經國過身，享年七十七，追贈光祿大夫正一品[5]。

創立家塾 編輯

 
梁經國創辦嘅左垣家塾
内文：左垣家塾

梁經國家底豐厚，但遺憾自己無讀到書。受咗老頭做私塾先生嘅影響，梁經國喺馮氏洋行做伙記嗰陣，趁住得閒，就睇下古人格言，有疑必問，連地理、醫學嘅書都睇，又加上佢學洋務商理，佢成咗範範都識嘅商人。除咗自身嘅追求，重有客觀嘅原因。按照中國傳統，「萬般皆下品，唯有讀書高」，而且按「士、農、工、商」，商人喺社會嘅底層，於是梁經國發達之後，請名師響黃埔村開咗間「左垣家塾」，家塾管教梁氏家族啲仔女讀書[3][5]。而梁經國呢個家族從佢孻仔梁同新登科入仕開始，梁肇煌、梁慶桂、梁廣照夾埋四代人先後做到大官，實現咗梁經國嘅願望[2]。

家族名人 編輯

梁氏家族出咗唔少大官，其中梁經國嘅後人最多，尤其係佢孻仔梁同新呢一脈就代代名人，創造二百年書香嘅傳奇[2][5][12]，以下嘅名人從梁氏家族第十三世起列舉：

之前
十三世：
  • 梁惠連，梁經國阿爺，誥授通奉大夫[2]
十四世：
  • 梁國熾，梁經國伯爺，黃埔村師儉堂祠主，曾經從外國引進牛痘疫苗[12]
之後
十六世：
  • 梁綸樞，梁經國二仔，亦叫梁承禧，繼承衣缽[2]
  • 梁同新，梁經國孻仔，原名梁綸機，翰林院庶吉士、國史館協修、纂修、總纂官，內閣侍讀學士，順天府尹[2]
十七世：
  • 梁肇煌，進士，官至順天府尹[2]，代理兩江總督[5]
  • 梁肇晉，進士，官至禮部主事[2]
  • 梁誠，原名梁肇旭，晚清外交官，中國駐美國公使，粵漢鐵路總辦[2][12]
十八世：
十九世：
二十世：
二十一世：
  • 梁承鄴，原華南植物研究所所長[2][5]

攷 編輯

  1. ↑ 冷東、趙春晨、章文欽、楊宏烈 (2012). 《廣州十三行歷史人文資源調研報告》. 廣州: 廣州出版社. p. 143. ISBN 978-7-5642-1181-7
  2. ↑ 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 黃啓臣. 〈經珠璣巷向珠三角遷移的廣府人及其發展——以十三行商梁經國家族為例〉. 中國學術評論出版社. 原著喺2016年3月4號歸檔. 喺2015年8月24號搵到.
  3. ↑ 3.0 3.1 3.2 3.3 3.4 3.5 3.6 3.7 3.8 梁嘉彬. 〈梁經國傳〉. 《史學集刊（第七期）》.
  4. ↑ 4.0 4.1 4.2 〈梁經國天寶行的演變〉. 《名城明珠黃埔村》. 廣州: 廣州出版社. 2001.
  5. ↑ 5.0 5.1 5.2 5.3 5.4 5.5 5.6 5.7 新快報, 編 (2012年9月25號). 〈廣州二百年書香望族:天寶行梁家 富賈之家崇文重教〉. 金羊網. 喺2015年8月22號搵到.{{cite web}}: CS1 maint: url-status (link)
  6. ↑ 梁慶桂 (1979). 《式洪室詩文遺稿》. 臺北: 文海出版社. p. 34. ISBN 978-5-5500-5305-8.
  7. ↑ 梁嘉彬 (1999). 《廣東十三行攷（再版）》. 廣州: 廣東人民出版社. p. 323. ISBN 7-21803-173-0.
  8. ↑ 梁慶桂. 《先曾祖左垣光實祿公家傳》.
  9. ↑ 梁嘉彬 (1937). 《廣東十三行攷》. 南京: 國立編譯館. p. 147-148.
  10. ↑ 廣州西關下九甫文瀾書院碑記
  11. ↑ 丁仁長、吳道熔. 〈卷十九 人物〉. 《（宣統）番禺縣志》.
  12. ↑ 12.0 12.1 12.2 鍾暉 等, 編 (2014). 《海珠古祠堂》. 廣州: 廣東教育出版社. p. 234-237. ISBN 978-7-5548-0235-9.
由「https://zh-yue.wikipedia.org/w/index.php?title=梁經國&oldid=1579889」收