楚岫雲
粵劇正印花旦演員
楚岫雲（1922年9月30號—1980年1月14號[1]）原名譚耀鑾，廣東東莞人，係粵劇演員、電影演員。1940年代，同譚蘭卿、衛少芳、上海妹並稱「粵劇四大名旦」[2]。
| 楚岫雲 | |
|---|---|
 | |
| 出世 | 譚耀鑾 1922年9月30號  中華民國廣東省廣州市 |
| 死 | 1980年1月14號（57歲） 中國廣東省廣州市 |
| 籍貫 | 廣東東莞 |
| 職業 | 粵劇演員 |
| 知名作品 | 《情僧偷到瀟湘館》、《牛郎織女》、《林衝休妻》 |
| 配偶 | 馮俠魂 |
生平
編輯楚岫雲喺廣州出世，初時叫譚耀鑾。11歲拜巢雪舟爲師，又跟伍冉明學打翻學咗一年。14歲開始登台，由老豆改藝名「楚岫雲」。因爲唱功掂當，15歲就做到正印花旦，1938年，喺佢演嘅第一齣電影《梅知府》做女主角；同年10月，去香港入「太平」劇團同馬師曾同台做大戲。1939年入南洋電影公司，同鄺山笑合作拍《蕩寇志》、《八美圖》、《鍾無艷》，仲去美國、加拿大登台。1940年5月，返香港，應白玉堂邀請入「中華」劇團做第二花旦。1941年12月，薛覺先請佢入「覺先聲」劇團做正印花旦。之後去越南登台。1947年，由越南返廣州，入「非凡響」劇團，同何非凡喺廣州海珠大戲院連做300幾場《情僧偷到瀟湘館》，場場滿座[3]。嗰時，楚岫雲經已同譚蘭卿、衛少芳、上海妹齊名，被譽為粵劇「四大名旦」[2]。
1949年，入「永光明」劇團，同呂玉郎合作做《可憐女》、《淒涼姐妹碑》、《紅娘子》、《嫦娥奔月》，又做過《林衝休妻》。1955年9月至到1956年6月，同馮俠魂拍檔連做三百場《牛郎織女》，亦場場爆滿。1964年之後，身子太差無再登台。1970年代尾，喺廣東省青年粵劇團教學生。1980年1月14號，因爲肺癌過身[2]。
電影
編輯連出去
編輯攷
編輯- ↑ 〈粵劇正印花旦演員 楚岫雲〉。戲曲文化網。原著喺2021年5月12號歸檔。喺2019年3月4號搵到。
- ↑ 2.0 2.1 2.2 韓文臨 (2014年5月24號)。〈一代名伶楚岫雲〉。《羊城晚報》。鳳凰網。
- ↑ 譚子榮 (2014年7月26號)。〈也說我的姑姑楚岫雲〉。《羊城晚報》。鳳凰網。