獅子山

  想搵第二個意思嘅話，請睇獅子山 (搞清楚)。

獅子山，英文叫Lion Rock（解獅子石），係香港新九龍同新界之間一座山，係九龍山脈嘅其中一個峰，高495米。獅子山南面係新九龍馬仔坑、橫頭磡同竹園呢啲地方。東有雞胸山，西有筆架山。而西北有望夫石同沙田紅梅谷，可以由呢個方向落大圍。

獅子山
海拔	495米（1,624英尺）
位置	香港獅子山郊野公園
座標	22°21′11″N 114°11′13″E
獅子山 獅子山嘅地理位置

黃大仙同埋後邊嘅獅子山

獅子山山頂

獅子山日落

名

獅子山史上有好多名，好似虎頭山，金鳳山，駱駝山，鷹嘴山，禾鎌嘴山，獺子頭山。獅子山大清初期就叫虎頭山，而同期西面另有一座獅子嶺，到尾大清遷界時又響獅子嶺度起煙墩，就變成煙墩嶺，又叫煙墩山。復界後，啲人因為唔清楚，就將獅子嶺同虎頭撈埋一碟，變成家下獅子山。

地理

獅子山因為佢個樣而叫獅子，好似一大嚿獅子石坐響個山頂上面，係九龍一大標誌。英文亦都譯做Lion Rock，意謂獅子石。獅子山山勢好斜，所以唔少爬山人士都想爬，但係亦出過唔少意外。不過因為可以望晒成個維多利亞港，所以都好多人上去。

交通

山北無咁斜，麥理浩徑第5段同上山嘅路相接，係行山好地方。山上無車路上去，不過山下面有獅子山隧道，連埋九龍同沙田。

文化

獅子山懸崖

2019年8月23日反逃犯條例民眾抗議

獅子嘅外形

獅子山上嘅我要真普選直幅

因為第二次世界大戰、國共內戰同之後中國大陸政治運動，好多低下階層嘅人移居香港。獅子山南面嘅九龍係其中一個最多人住嘅地方，有山邊寮屋、唐樓、公共房屋、工廠大廈同山寨廠等。因此「獅子山下」代表當時典型嘅香港社會。1972年至1994年期間，香港電台製作咗一套名叫《獅子山下》嘅電視劇。而呢個名自1979年起亦成為呢部劇集主題曲嘅名稱，由顧嘉煇作曲，黃霑填詞，羅文主唱。

1950至1970年代期間，每逢雙十節前後，都會有親國民黨人士到獅子山頂懸掛中華民國國旗。

2014年10月23號上晝11時左右，一班自稱「香港蜘蛛仔」嘅攀山愛好者响獅子山頂懸掛一幅6米闊、28米高嘅巨型橫額，上面有一把黃色雨遮標誌，並寫上「我要真普選」，下款係「#UMBRELLA MOVEMENT」，以聲援2014年9月香港示威。呢幅巨型橫額喺第二日（24號）中午，响政府飛行服務隊、消防處同民安隊嘅聯合行動入面被拆走。