模擬城市系列

模擬城市系列（英文：SimCity）係一個城市建造遊戲系列。

玩法

睇埋：起城市遊戲

玩家嘅虛擬城市可以愈轆愈大：玩家要起嘢就要使虛擬錢；同時隻遊戲梗會有一啲機制，畀玩家賺虛擬錢（否則隻遊戲好快就玩完）；喺呢啲遊戲入面，玩家起嘅嘢能夠製造收入，就好似現實世界嘅城市噉—玩家起咗住宅就會有人搬嚟住，市民會搞經濟活動創造 GDP 而且仲會交稅；如是者，假設玩家管理得妥當，座虛擬城市就會進入一個循環—

1. 擴充城市，
2. 賺到收入，
3. 攞啲收入擴充，
4. 重複。

噉就表示，個遊戲程式內部實係猛咁計數，用手上座虛擬城市嘅狀態—好似係人口、商業用建築物嘅數量、工業用建築物嘅數量... 呀噉—做 input 計出玩家跟住落嚟會得到幾多收入。