歐陸哲學

歐陸哲學（continental philosophy）係指喺 19 至 20 世紀由歐洲大陸起源嘅相關哲學傳統，同英美嘅分析哲學相對照。歐陸哲學包括咗現象學、存在主義、解釋學、結構主義、後結構主義、後現代主義、解構，以及批判理論（例如法蘭克福學派）、心理分析、尼采、同埋絕大部分嘅馬克思主義同馬克思哲學流派。

歷史

將歐陸哲學同分析哲學區分開來係近代嘅事，大致可由二十世紀早期開始計起。但係，作為一種哲學傳統嘅區分，佢嘅源頭最早可追溯到康德。分析哲學雖然受到康德嘅影響，但係對佢以後嘅十九世紀德國哲學家，例如黑格爾、叔本華、馬克思同尼采等所謂「歐陸哲學」嘅主要思想都冇咩大嘅興趣。

二十世紀上半葉，德國仍然係歐洲最具活力嘅哲學重鎮，呢一番景像一直保持到希特拉上台為止。希特拉上台之後，一大批最優秀嘅德國哲學家——其中大部分係猶太人或者係左翼學者——不斷走到海外（尤其係美國），令到德國哲學界日漸沈寂。同樣嘅情形亦都同時發生喺法蘭克福學派上。同一個時期，亦有一啲哲學家留咗喺到，例如當時德國最傑出嘅哲學家之一——海德格爾，佢信奉納粹主義。但當納粹失勢之後，呢批人發現佢哋唔單止被禁止教學，甚至佢哋本人，亦都連同佢哋嘅哲學一齊被世人拋棄。

二戰之後，德國哲學喺法國引發咗一股研究嘅熱潮。原因主要有兩個方面，其中一個係法國共產黨喺法蘭西解放運動中所起嘅作用令到法國共產黨喺短期內成為咗法國嘅最大政黨，對共產主義學說嘅翻譯熱情又進一步激發咗對馬克思哲學同黑格爾哲學嘅興趣，喺呢一股思潮嘅影響下，呢兩個人嘅學說第一次開始喺法國大學入面被廣泛研究；第二個原因，另一股主流思潮關注嘅焦點就係現象學家胡塞爾以及佢嘅學生海德格爾嘅學說，喺推動呢股風潮嘅運動入面，薩特扮演咗非常重要嘅角色，佢唔單止係當時知名嘅作家同哲學教師，同時亦係一位非常有影響力嘅公共知識分子，佢將佢自己嘅學說叫做存在主義。

英語國家嘅歐陸哲學

「歐陸哲學」喺唔同流派之間嘅分歧好大，令到「歐陸哲學」呢一個術語本身都冇太大嘅描述價值。美國同英國由二十世紀八十年代開始，已經有唔同嘅教授寫咗大量有關「歐陸哲學」嘅內容。（注：有啲講法文同德文嘅歐洲哲學家，例如戈特洛布·弗雷格同維也納學圈，對分析哲學有好重要嘅貢獻，但呢啲人一般唔會畀人當係「歐陸哲學家」。）

而歐洲大陸國家同埋英語國家，對待「歐陸哲學」嘅態度都好唔同。喺德國同法國，「歐陸哲學」係大學哲學系教學嘅核心，但喺英語國家入面，哲學系講授嘅一般都係分析哲學，而「歐陸哲學」就屬於另一個科系。（「歐陸哲學」一般被當作人文學科，例如文學、電影、建築、藝術史等領域入面，通常作為文藝理論或者批評理論嚟介紹，而喺社會學科當中，社會學、人類學同埋社會心理學等領域入面，有時又會被當係社會理論或批判嘅社會理論。）

雖然分析哲學同歐陸哲學嘅分界並唔係絕對，但兩種學說確實喺側重點同風格上有好明顯嘅唔同。反對先驗懷疑論係歐陸哲學嘅一個基調，呢種觀點認為思想唔能夠脫離自然或者物質前提獨立噉存在，但哲學家又必須去處理呢種不可能性。例如，黑格爾認為思想唔能夠遊離於歷史，對馬克思嚟講，人類嘅一切意識形態都離唔開階級嘅鬥爭，而尼采就認為意志係嚟源於對權利嘅欲望，而海德格爾同薩特就主張思想必須要處理「存有」嘅問題，而德裏達就提醒人，喺辨析各種哲學同思想時，唔可以忘記歷史有偶發性，而各種語言同文本之間又有住相互依賴性。

而歐陸哲學家通常對分析哲學家噉樣睇，佢哋相信方法學，認為只要有適當嘅方法，就可以毫無疑義噉對所有思想同當中嘅相互關系進行歸類同分析，雖然有時分析哲學家都可能會提出一啲同歐陸哲學家睇法相類似嘅懷疑論作為分析成果，但佢哋唔會將呢一種懷疑論當係方法學上嘅假設。

除此之外，分析哲學通常係圍繞住一啲講唔完嘅辯論，為咗呢啲辯題，一代代嘅哲學家貢獻咗佢哋所有嘅智慧，而歐陸哲學則傾向於將研究嘅重心放喺幾個關鍵嘅思想家身上，討論佢哋嘅哲學同埋相互之間嘅關系。哈佛大學教授斯坦利·卡維爾解釋分析哲學同歐陸哲學嘅差異嗰陣，佢噉樣講：

哲學喺傳承嘅過程入面，可以被當係一啲有待解決嘅問題（例如英美分析哲學家係噉樣睇），又可以當係一連串有待解讀嘅文本（例如歐陸哲學家係噉樣睇） 。喺唔同嘅傳承模式下，思維訓練方法、批評同埋對話嘅標準、寫作流派、作者嘅角色，都會跟住唔同。

參考

書籍

• Simon Critchley, Continental Philosophy: A Very Short Introduction. Oxford University Press (2001) ISBN 0-19-285359-7