維基百科

科幻

科學幻想（science fiction），簡稱科幻（英文：sci-fi / SF，當中 sci-fi 可以借入粵語做粵拼：saai1 faai1），係推想型故仔（speculative fiction）下嘅一個體裁，泛指一啲集中於科學同先進科技相關主題嘅故仔[1][2]。對於「科幻故仔」呢個詞要點定義，2020 年嘅 sci-fi 界仲未有完全一致嘅共識，不過一般認為，sci-fi 故仔傾向具有以下嘅特徵[3][4]：

  • 背景設定設於未來嘅世界，
  • 會有一啲（由作品出嘅年代嘅角度睇）先進嘅科技；
  • 喺主題上，好多時會係關於一啲當代有關科學同科技嘅哲學問題；
  • 常用嘅橋段包括咗好似人噉嘅人工智能以及時間旅行等等。
1897 年一個 sci-fi 故仔當中所想像嘅外星人侵略；「外星人侵略地球」喺當時係比較嶄新嘅諗頭。

Sci-fi 俾人稱為「諗頭嘅文學」（Literature of Ideas），因為 sci-fi 作品成日會引起人對當代科學科技構思嘅思考[5]。好似係由美國著名導演史匹堡執導嘅戲《人工智能》噉：呢套戲嘅主角係一個俾人類創造，用嚟俾啲冇仔女嘅夫婦有得湊細路嘅機械男仔大衛，佢由俾養母抗拒至受接納，後嚟再因為想變成一個有血有肉嘅人類而出發冒險，當中有一幕係噉嘅：大衛俾一班仇視機械人嘅人類捉咗，而當嗰班仇視機械人嘅人類打算當眾處死大衛嗰陣，圍觀嘅人見到大衛迫真嘅外形同佢嘅行為舉止，以為佢係一個真嘅人類細路而反對處死佢。呢一幕令到好多觀眾反思到底內部用金屬造但有情感嘅大衛算唔算係一個「人」－一個人工智能要點樣先算係一個「人」，正正係人工智能哲學上一條受關注嘅問題[6]。

定義 改

 
阿西莫夫嘅相
睇埋：科幻文學同埋科幻片

「科幻」要點定義係一個有爭議性嘅問題：俾人歸類做「科幻」嘅作品喺主題同使用嘅橋段上有一啲共通嘅特徵，例如係好多時會有對先進科技嘅思考噉；不過對於科幻呢個文學體裁要點樣具體噉定義，現時嘅科幻界仲未有人能夠提出一個廣受人接受嘅見解[7][8]。

廿世紀嘅美國科幻大師兼生物化學教授阿西莫夫（Isaac Asimov）用以下一句嘢概括科幻呢個文學體裁[9]：

「
原版英文："Science fiction can be defined as that branch of literature which deals with the reaction of human beings to changes in science and technology."

粵文翻譯：科幻可以定義為文學當中專門應付人對科學同科技上嘅改變嘅反應嘅嗰一個分枝。

」

人稱「科幻先生」（Mr. SF）嘅美國科幻作家兼工程師羅拔海萊因（Robert A. Heinlein）就噉講[10]：

「
原版英文："A handy short definition of almost all science fiction might read: realistic speculation about possible future events, based solidly on adequate knowledge of the real world, past and present, and on a thorough understanding of the nature and significance of the scientific method."

粵文翻譯：一個能夠簡短噉概括幾乎所有科幻作品嘅定義望落係噉嘅：對未來事件嘅真實性預測－呢啲預測係穩陣噉建基於有關現實世界以及過去同未來嘅知識，同埋建基於對大自然同科學方法嘅重要性嘅完整理解。

」

而 2020 年嘅不列顛百科全書就係噉樣形容「科幻」呢個詞嘅[11]：

「
原版英文："Science fiction, abbreviation SF or sci-fi, a form of fiction that deals principally with the impact of actual or imagined science upon society or individuals."

粵文翻譯：科幻，簡稱 SF 或者 sci-fi，係虛構故仔嘅一種，主要應對現實或者想像出嚟嘅科學對社會或者個人嘅衝擊。

」

硬定軟 改

 
一架太空船發射上太空；火箭嘅推進力令到架太空船向上移動。
 
一到咗太空就冇嗮空氣阻力，太空船就算唔受力都可以繼續以恆定速度前進。

科幻子文類嘅其中一個常見分法係按「真實度」分做硬科幻同軟科幻兩種[12][13]：

硬科幻 改

內文：硬科幻

硬科幻（hard SF）係指重視要科學上準確嘅科幻作品。喺一個硬科幻故仔當中，故仔入面出現嗰啲先進科技真係有現實基礎，甚至乎直頭係當代科學界正喺度研究緊嘅嘢，而且故仔內容盡可能做到合乎當代已知嘅科學知識[14][15]。例如想像以下呢個科幻故仔：

  • 背景設定：個故仔設喺一個未來世界；喺呢個世界入面，神經科學、機械人學、同人工智能等方面嘅技術經已極之發達，人可以輕易噉用機械部件取代自己啲手腳以及身體大多數器官，甚至乎將自己嘅記憶同思緒好似電腦檔案噉複製同傳送；同時，人工智能機械人變得愈嚟愈複雜，呢啲機械人識得做各種嘅認知功能，甚至乎能夠表達情感。
  • 角色：主角係一個特務，佢同佢嘅同袍為咗令自己戰鬥能力更勁而身體完全機械化咗，全身上下得個腦仲係有血有肉嘅組織；另一方面，先進嘅人工智能技術終於創造出一個極其聰明、有自我意識嘅人工智能－呢個人工智能近乎有齊嗮人類有嘅認知能力同情慾。
  • 情節簡介：呢個人工智能同人一樣，自認自己係一個心靈，想要延續自己嘅存在，唔想俾人類任意操控同刪除佢（目的），於是就密謀作反，用佢嘅高超智能反過嚟操控佢接觸到嘅人類，例如用神經技術將假記憶植入周圍嘅人類嘅腦入面，等呢啲人類做佢想佢哋做嘅嘢（目的引致嘅行動）；同時，身為特務嘅主角同佢同袍俾上頭委派去調查呢個人工智能所犯嘅案－就自然同個人工智能起衝突。

呢個故仔嘅各個元素都令讀者觀眾諗起「人同機械之間條界線係乜？」、「一個個體要點先算係有心靈？」等嘅問題，而呢啲都正正係喺人工智能哲學同心靈哲學等領域上廣受關注嘅問題。呢點反映咗個作者真係想引起對科學相關議題嘅反思[16][17]。硬科幻引起讀者反思嘅能力令科幻有咗個外號，叫「諗頭嘅文學」（Literature of Ideas）[5]。

軟科幻 改

內文：軟科幻

軟科幻（soft SF）係指唔重視科學準確性嘅科幻作品。喺一個軟科幻故仔當中，故仔入面嗰啲先進科技完全係老作嘅，根本冇現實基礎可言，而且好多時故仔內容科學上唔準確，例如連好基礎嘅物理法則都搞唔清。呢啲作品普遍有以下呢啲噉嘅特徵[18]：

  • 架太空船冇人工重力機制，但啲船員依然可以好似有重力噉喺地板上面行；
  • 喺太空當中發生爆炸會有聲（太空近乎真空，而聲呢種波動係要有空氣或者水等嘅物質做介質粒子先可以傳遞到嘅）；
  • 太空船一熄咗引擎就停低（太空冇空氣阻力，根據牛頓第二定律，一嚿太空當中嘅物體就算冇再受向前嘅力都會繼續以恆定速度向前飛）；

... 等等。呢啲作品喺科學上準確度明顯比較低，所以屬於軟科幻[19]。《星空奇遇記》（Star Trek）同《星球大戰》（Star Wars）等廿世紀嘅太空歌劇（space opera）名作都傾向屬於軟科幻作品：太空歌劇泛指故仔大多數時間都設於太空當中嘅故仔，呢類故仔通常主要係講一班角色坐住架太空船喺太空周圍冒險（好多時仲會對地球隻字不提）；呢類作品通常重視戲劇性，所以對科學準確性嘅重視度往往會低啲[20]。

科幻美學 改

睇埋：數碼鬅客衍生體裁

除咗軟硬之外，科幻作品另一個常見嘅分類法係按「故仔集中講乜嘢科技」嚟分類：

數碼鬅客 改

內文：數碼鬅客

數碼鬅客（cyberpunk）－個名嚟自「cyber」（同互聯網相關）同「punk」（鬅客文化）嘅結合－係源於 1960 至 1970 年代嘅一種科幻子文類同常用美學。數碼鬅客可以用兩個詞語總括，未來性（futuristic）同反烏托邦（dystopian），「結合低生活同高科技」（combines low-life and high tech）。一個用數碼鬅客美學嘅科幻故仔一般會有以下嘅特徵[21][22]：

  • 故仔背景高度城市化，而且缺乏樹同山等嘅自然景物，令成個背景望落有一種唔自然同充滿壓迫感嘅感覺；
  • 人類嘅生活因為科技－或者人類對科技嘅濫用－而變得唔理想，成個故仔嘅氣氛偏向黑暗同悲觀；
  • 主角好多時會係一啲社會嘅邊緣人，例如罪犯或者低下階層呀噉，令成個故仔更加會集中於社會嘅黑暗面；
  • 主題會集中於科技對人性嘅影響，又或者係對當代科技諗頭嘅批判。

舉個例子說明：一個科幻故仔，個背景設於想像中嘅未來，先進嘅人工智能技術令人類創造出像真度高嘅伴侶機械人（先進科技），呢啲技術搞到人類變成咗齋靠伴侶機械人滿足自己嘅社交需要，人與人之間嘅關係變得疏離（人類喪失咗一啲作為人類重要嘅嘢），而且背景有污糟嘅後巷、掁眼嘅霓虹燈、無星嘅夜空同迫滿高樓大廈嘅環境等去人性化嘅景象（背景）；作者好有可能係想借佢個作品嚟帶出人與人之間嘅交流對人類不可取代嘅重要性（對社會同科技嘅批判）[23]。例子可以睇吓《神經喚術士》（Neuromancer）、《攻殼機動隊》（Ghost in the Shell）、《銃夢》（Battle Angel Alita）同《廿二世紀殺人網絡》（The Matrix）等嘅作品[16]。

  •  

    東京澀谷區 2017 年嘅一個景象；日本又多高樓大廈又多霓虹燈嘅市區俾人指係數碼鬅客呢種美學嘅起源[24]。

蒸汽鬅客 改

 
一部仿蒸汽鬅客設計嘅機械
 
一幅俾人認為代表到柴油鬅客嘅圖畫
內文：蒸汽鬅客

蒸汽鬅客（steampunk）係一種用舊式美學嘅科幻類型，最大特徵係故仔入面啲科技嘅外觀設計建基於 19 世紀嘅工業用蒸氣機[25]。蒸汽鬅客受到數碼鬅客同 19 世紀尾（維多利亞時代）嘅英國文學影響，試圖用 19 世紀尾嘅英國做故仔嘅背景美學，有以下呢啲特徵[26]：

  • 蒸汽鬅客故仔背景嘅建築物會傾向用返嗰個時期嘅英國建築風格；
  • 蒸汽鬅客故仔角色著嘅衫會似嗰個時期啲人著嘅衫；
  • 故仔入面啲科技就算幾先進，外觀上都會模仿當時英國人所用嘅蒸氣機，靠蒸氣發動；
  • 故仔好多時甚至係直頭將個背景設喺架空版嘅 19 世紀尾英國... 等等。

蒸汽鬅客一般都比較傾向於軟科幻：事實係，19 世紀尾嘅蒸氣機喺各種性能上都遠遠不如現時用嘅機械，所以蒸汽鬅客故仔對於「點解呢啲蒸氣機能夠做到咁多現時機械都做唔到嘅嘢」通常答案都係唔清唔楚；而且蒸汽鬅客作品好多時仲會結合奇幻同恐怖等嘅超自然元素（超自然元素可以幫手解釋「點解呢啲蒸氣機咁勁」）；呢啲特徵對於講求科學上要準確嘅硬科幻嚟講好難接受[橋 1]。

柴油鬅客 改

內文：柴油鬅客

柴油鬅客（dieselpunk）都係一種用舊式美學嘅科幻類型，俾人指係蒸汽鬅客嘅一種延伸。同蒸汽鬅客一樣，柴油鬅客美學建基於某個時期嘅科技，柴油鬅客特徵在於故仔啲機械嘅外觀設計建基於廿世紀早期嘅柴油科技。柴油鬅客嘅美學源於廿世紀兩次世界大戰嗰段時期，傾向有以下嘅特徵[27]：

  • 啲角色著嘅衫同啲建築風格會跟返嗰個時代嘅樣；
  • 故仔入面啲科技就算幾先進，外觀上都會模仿廿世紀上半橛嘅柴油科技；
  • 好多時甚至係直頭將個背景設喺一個架空版嘅廿世紀上半橛歐洲或者美國；
  • 嗰個時代係兩次世界大戰發生嘅時期，所以故仔嘅主題好多時都會圍繞住打仗... 等等[橋 2]。

1984 年出嘅《風之谷》（日文：風の谷のナウシカ；Nausicaä of the Valley of the Wind）同 1986 年出嘅《天空之城》（日文：天空の城ラピュタ；Castle in the Sky）呢兩套宮崎駿動畫電影作品俾好多人認為係用咗柴油鬅客美學嘅名作[註 1][28][29]。

太陽鬅客 改

內文：太陽鬅客

太陽鬅客（solar punk）係廿一世紀初興起嘅一種科幻美學。太陽鬅客最大嘅特徵係對未來樂觀，傾向具有以下嘅特徵[30][31]：

  • 故仔背景有一啲建基於可再生能源（例如係太陽能）嘅科技；
  • 用可再生能源亦都表示，太陽鬅客嘅科幻世界會相對唔受污染，會具有綠意盎然嘅環境，甚至乎係城市同自然融為一體；
  • 人類嘅生活因為科技－或者人類對科技嘅善用－而變得理想，成個故仔嘅氣氛偏向光明同樂觀；
  • 主題會集中於科技對人性嘅影響，又或者係對當代科技諗頭「可以點樣幫助人類同自然環境」嘅思考。

太陽鬅客俾人指係對數碼鬅客（睇上面）嘅一種對抗思潮：一般認為，數碼鬅客對未來世界悲觀，認為全球化、都市化同自然資源嘅利用呢啲科技帶嚟嘅新系統會搞到人類嘅生活變得惡劣；而太陽鬅客就啱啱相反，旨在對抗呢啲系統，並且提出能夠長遠提高人類福祉嘅新系統[橋 3]。

  •  

    喺好多科幻故仔入面，科技都被描繪成能夠令人類嘅生活同地球嘅環境變得更加美好同和諧。呢種新美學就係所謂嘅太陽鬅客。

其他鬅客 改

科幻仲有以下嘅「鬅客」類型：

  • 生物鬅客（biopunk）係指主題集中講生物學相關科技嘅科幻作品（相對於傾向集中講資訊科技嘅數碼鬅客）[32]；呢類科幻故仔會集中於遺傳工程等嘅技術，常用嘅橋段包括咗有機嘅科技（例：種出嚟嘅飛船）、用科技改變身體（例：用藥同手術造出嚟嘅完美身材）以及道德上受爭議嘅生物學相關科技（例：用遺傳工程技術改造自己未出世嘅仔女）等等[橋 4]。
  • 納米鬅客（nanopunk）係指主題集中講納米科技（nanotechnology）嘅科幻作品。納米科技係一種廿世紀尾興起嘅科技，泛指研究物質喺納米尺寸（1 納米等如 10-9 米）嘅設計、組成同相關應用[33]，例如係大細以納米量度嘅機械人，可以用嚟放入病人嘅身體入面幫手醫病甚至改造病人嘅身體[34]。

... 等等。

總括嚟講，上述每一種嘅科幻美學都係建基於某一樣對人類現時或者過去影響深遠嘅科技[35]：

常用橋段 改

 
H. G. 威爾斯喺 1897 年寫過講外星人侵略地球嘅故仔；呢條橋喺當時算係嶄新嘅橋段。
 
日本繩紋時代（公元前 14,000 年到前 300 年）嘅土偶；呢類土偶俾人話係描繪緊史前時期到訪日本嘅外星人[36]。
內文：科幻橋段

廿世紀同廿一世紀初嘅科幻作品常用嘅橋段（tropes）有以下呢啲[37]：

背景設定 改

  • 背景設定設於未來：科幻故仔通常（但唔一定）設喺未來世界，探索「如果人類採用咗呢種科技，世界將會變成點」等嘅課題。有啲科幻故仔會設喺比較近嘅未來，例如「十幾年後嘅世界」，亦有啲科幻故仔會描繪作者所想像嘅遙遠未來，例如「幾個世紀後嘅世界」[橋 5][38]。
  • 末日幻想（apocalyptic fiction）：指個故仔講地球上嘅人類遭受某啲巨大災難（例如係有粒巨型殞石撞落地球或者係人工智能叛變等），搞到人類文明進入崩潰狀態。而末日後幻想（post-apocalyptic fiction）就係指個故仔集中講災難後嘅世界係點；末日後嘅世界環境喺各方面都變到好惡劣，唔多再適合人類居住，背景嗰度會有空寥寥同因為冇人打理而敗壞嘅城市、污濁嘅空氣同水、以及差劣嘅生活質素（好多人類要瞓街等）等等嘅事物。呢種設定性橋段好多時會配合環保相關嘅主題使用，用嚟展示人類忽略保護自然環境造成嘅惡果。例子可以睇《太空奇兵·威E》（WALL-E）[39][40]。
  • 圓頂城市（domed city）：自從廿世紀早期就引起人幻想嘅一種構想中嘅城市，指成座城市都俾一個圓頂罩住；科幻故仔當中嘅圓頂城市嘅圓頂通常仲有各種先進嘅功能，例如係能夠完美噉控制座城市嘅溫度同天氣呀噉，令座城市成為一個高度受控嘅環境。喺地球以外嘅行星上嘅城市好多時都會被描繪成圓頂城市[橋 6]。
  • 新型社會結構：泛指因為科技嘅進步而達致、但現時未存在嘅社會結構型式，包括烏托邦（Utopia）或者反烏托邦（Dystopia）等；烏托邦嘅一個出名例子有後稀缺（post-scarcity）嘅世界。稀缺性（scarcity）係現代經濟學上嘅基本概念，指嘅係有限嘅資源同理論上無限嘅慾望之間嘅差異：人類有好多慾望，但就算有現代科技，佢哋手上嘅資源－錢、時間、精神－都梗係有限嘅，好多時佢哋都冇足夠嘅資源達到嗮佢哋想要達到嘅目的，例如一個人唔夠錢買嗮佢想要嘅嘢，唔夠時間做嗮佢想要做嘅嘢... 等等；因為稀缺性嘅問題，人類需要做犧牲，需要放棄某啲嘢，嚟獲得更多佢哋想要嘅資源，亦都因為噉樣而有咗競爭－人同人之間會各自犧牲時間精神等嘅資源嚟爭稀缺（scarce）嘅嘢[41]。後稀缺社會係一種預想中嘅社會型式，指稀缺性嘅問題近乎消失－任何人都能夠輕易免費噉得到佢哋想要嘅資源，唔使點樣競爭，而工作變成純粹嘅興趣[42]；唔少科幻作品都係喺度思考要有點樣嘅科技，先可以達致後稀缺嘅社會[43]。

物理學相關 改

  • 平行世界（parallel universe）：平行世界係物理學上嘅一個直至 2020 年為止都仲未得到證實嘅假說，指有第啲宇宙存在，呢啲宇宙同人類所存在嘅宇宙有一啲微細嘅差異，例如故仔講住喺紐約嘅主角用先進科技去咗第個宇宙嘅紐約，並且撞到嗰個宇宙嘅自己，但呢個自己並冇發現穿梭去平行世界嘅方法[橋 7]。
  • 蟲洞（wormhole）：蟲洞係一個想像中嘅時空結構，直至 2020 年為止都仲未得到證實；簡單講，蟲洞係時空當中兩個分離嘅點（唔同位置、唔同時間點或者兩樣都唔同）由一條隊道連接，即係話如果太空當中嘅兩個點有蟲洞相連，就算人類冇超光速航行都可以剎那間去到好遠嘅地方。蟲洞有喺 2014 年美國科幻片《星際啟示錄》（Interstellar）當中出現[橋 8]。
  • 超光速（faster-than-light，FTL）航行：指超越光速嘅移動；根據愛因斯坦嘅狹義相對論（special theory of relativity），要將有質量嘅物體加速到光速需要用無限大咁多嘅能量，所以理論上係冇可能嘅，不過超光速航行喺（唔重視科學準確性、要求主角係噉去新嘅星球冒險嘅）太空歌劇入面好常見[橋 9][44]。
  • 時間旅行（time travel）：指喺唔同嘅時間點之間移動，由而家去未來，又或者由而家返去過去，通常係靠一部時光機（time machine）；講時間旅行嘅硬科幻作品好多時都會探討一啲同時間旅行相關嘅哲學問題，例如係祖父悖論（grandfather paradox）等嘅問題。時間旅行喺廿世紀嘅科幻作品裏面好常見，一般認為係源於英國科幻之父 H. G. 威爾斯（H. G. Wells）嘅作品《時光機》（The Time Machine）[45]；比較近期嘅時間旅行作品有 1985 年嘅電影《回到未來》（Back to the Future）[46]同 2019 年嘅超級英雄電影《復仇者聯盟4：終局之戰》（Avengers: Endgame）[47]。

太空相關 改

  • 故仔當中嘅某啲情節發生喺外太空，例如係星空奇遇記同星戰等嘅太空歌劇都係噉[橋 10]。
  • 世代飛船（generation ship）：指俾人類坐成幾個世代咁耐嘅超級太空船；好多科幻故仔都描述地球因為自然或者人為原因，而受到破壞或者變到唔再適合人類居住；於是人類就建造大量好似城市一樣咁大架嘅超級太空船，坐住呢啲太空船移居去第啲行星嗰度住；如果個故仔唔涉及超光速太空航行嘅話，呢啲太空船往往需要用成個零兩個世紀嘅時間先會去到目的地，於是人類就會喺巨型太空船上過幾個世代咁耐嘅時間；亦有作品會講人類坐住呢啲太空船喺太空當中流浪同搵新嘅宜居行星，甚至係人類去到第粒行星住，並且喺呢粒行星上進化[48]。例子可以睇彼思動畫製作室嘅電影《太空奇兵·威E》[橋 11]。
  • 太空海盜（space pirates）：太空海盜係科幻嘅一種固定角色，常見於（講主角喺太空周圍冒險嘅）太空歌劇；太空海盜就係太空入面嘅海盜－太空海盜會坐住佢哋嘅太空船周圍航行，會攻擊一般人嘅太空船，並且靠由一般人嗰度搶掠物資嚟維生，有時甚至會偷走成架太空船；太空海盜可以係奸角，被描繪成打劫之餘仲會無情噉殺死無辜嘅人，但亦有作品將太空海盜描繪成會劫富濟貧等比較正面嘅形象[49]。
  • 外星智能（extraterrestrial intelligence，ET）係指源自地球以外嘅地方嘅有智能生命：
    • 外星人侵略地球（alien invasion）：指故仔講外星人侵略地球；一般認為，呢條橋去到廿世紀尾經已係一種老土嘅陳腔濫調，不過亦有作品成功喺呢條橋上面創新，例如日本動漫作品《Keroro 軍曹》就喺呢條橋上作出咗戲仿，用外星人侵略地球呢條橋做喜劇效果[橋 12]。
    • 第一次接觸（first contact）：指故仔講外星人同人類首次接觸；喺科學界對外星生命嘅思考當中，第一次接觸係一個引起唔少熱議嘅課題，有唔少哲學家都擔心人類未必準備好作出第一次接觸，可能搞到第一次接觸以暴力收場。例子可以睇 2009 年嘅科幻片《D-9 異形禁區》（District 9）[橋 13]。
    • 古代太空人（ancient astronauts）：好多科幻故仔講外星人早就嚟過地球，而且故仔涉及主角發現早期人類文明查實係由外星人建立嘅；呢種故仔起源係，早期文明好多時都有嘅現代人都難以做到嘅技術（例子可以睇古埃及嘅金字塔），所以有人就估，話呢啲技術查實係外星人帶嚟地球嘅，而呢類故仔好多時仲會進一步講，早期人類嘅神話其實係源於古代人對外星人嘅先進科技嘅描述[橋 14]。
  • 地球化（terraforming）：廿世紀後半橛出現嘅一種構想，指人工噉改造一粒行星或者衛星嘅環境－包括嗰粒天體嘅大氣層、氣溫同埋第啲特性，令到粒天體變得更加似地球，更加適合人類住；喺廿一世紀初，科學界經已開始咗著手諗有冇可能將月球、火星、金星同水星呢啲近地球嘅天體地球化[50]。
 
火星地球化嘅想像圖；左上係火星原本嘅樣，右下係地球化搞掂咗之後火星嘅樣。

生物科技相關 改

睇埋：生物鬅客
  • 基因複製（cloning）：基因複製係廿世紀尾成熟嘅一種生物技術；指用自然或者人工方法由一隻生物個體嗰度，創造出另一隻遺傳上完全一樣嘅個體；行無性繁殖嘅生物曉自己做呢樣嘢，而 1996 年複製羊多利嘅誕生創始咗對哺乳類嘅人工基因複製[51]；用咗基因複製橋段嘅科幻作品好多時主題會圍繞住身份認同嘅相關問題，例：對 A 君作出基因複製，產生出嚟嘅新個體應該被視為獨立嘅個體，定係 A 君嘅複製品[52]？亦有作品講運用基因複製技術重造經已絕種嘅生物，例如係講人類用基因複製重造恐龍嘅《侏羅紀公園》（Jurassic Park）噉[53]。
  • 基因工程（genetic engineering）：指對 DNA 作出重組，靠噉對生物作出一定程度嘅改造；呢種技術喺廿世紀經已俾人用喺農業上，用嚟整出產量更加高嘅農作物。不過科幻作品往往會講一啲更加有道德爭議性嘅基因工程相關課題，例如有唔少作品講人類用遺傳工程技術改造自己未出世嘅仔女，目的係想將啲細路改造成更加聰明同靚。例子可以睇吓《廿二世紀殺人網絡》（The Matrix）[橋 15][54]。
  • 暫停生命（suspended animation）：指暫時終止一隻生物嘅生命活動，例如好多講人類移居去第啲行星嘅科幻作品當中都有講，人類用急凍科技暫時雪住自己嘅身體，等自己嘅生命活動暫停，然後等架太空船（花咗超過一個世紀嘅時間航行）到達遙遠嘅行星嗰陣就解凍－令人類可以抵受極長時間嘅太空航行[橋 16]。睇埋世代飛船。
  •  

    1965 年一套科幻片當中嘅一個景象；片中有一家人用暫停生命嘅方法等自己可以捱過漫長嘅太空航行。

心靈科學相關 改

  • 心靈上載（mind uploading）：心靈上載指人類將腦入面嘅資訊上載，令佢哋嘅心靈能夠存在喺電子空間；心靈上載嘅諗頭源於心腦同一論（mind-brain identity）－個諗法係，人類嘅腦等同於佢哋嘅心靈，所以將腦入面嘅資訊上載就等同將心靈同意識上載。例如數碼鬅客作品《攻殼機動隊》（Ghost in the Shell [註 2]）就用咗呢條橋，探討心靈本質嘅問題。用呢條橋嘅故仔主題往往同心靈哲學以及心靈科學（mind science）有關[55][橋 17]。
  • 腦機介面（brain-computer interface，BCI）：腦機介面係指容許腦部同機械之間直接互傳訊號嘅技術，喺廿一世紀初經已開始成熟；原則上，如果一個腦能夠直接向一部機械傳訊號，就有可能做到令個腦可以齋靠諗嚟指揮部機械（假設咗心腦同一論），而科幻作品（尤其係偏重資訊科技相關主題嘅數碼鬅客），呢類作品好多時會展示人類因為腦機介面技術而變到同機械愈嚟愈一體化，搞到「人類」同「機械」之間條界變得含糊，主題會涉及心靈哲學相關嘅問題。例子可以睇攻殼機動隊[橋 18]。
  • 感覺超負荷（sensory overload）：喺心靈科學上係指一個或者多個感官受到太多太勁嘅刺激，例如一個人同時見到一啲好掁眼而且又好多色彩嘅光，令到個人覺得唔舒服。感覺超負荷常見於數碼鬅客作品－例如一個多高樓大廈又有極大量霓虹燈嘅城市，充滿咗各種嘅符號同圖像，令睇嗰個人覺得自己個腦同時接收到太多資訊而有一股充滿壓迫感嘅感覺[21]:p. 21。
  • 資訊空間（cyberspace）：常見於數碼鬅客作品嘅一個概念，資訊空間係指電腦入面嘅世界，人類可以用某啲方式令自己嘅精神進入呢個世界當中，並且喺呢個世界裏面冒險，而且佢哋喺呢個世界做嘅嘢仲有可能影響電腦嘅運作同埋由呢啲電腦控制嘅機械。例子可以睇威廉吉森（William Gibson）寫嘅數碼鬅客名作《神經喚術士》（Neuromancer）[橋 19]。
  • 桶中腦（brain in a vat，BIV）：桶中腦係知識論上嘅一個思想實驗；想像一個科學家將一個人嘅腦由頭殼嗰度攞出嚟，再擺入一個有營養液嘅桶裏面，等個腦能夠得到生存所需嘅營養，然後佢再將個腦嘅神經細胞駁落去一部超級電腦嗰度，部超級電腦夠勁，能夠一路係噉運算出個腦跟住需要感受嘅訊號，再將啲訊號無間斷噉傳去桶裏面個腦（睇埋神經編碼），令個腦得到「要感知一個世界」所需嘅一切訊號。桶中腦思想實驗想問嘅就係，到底呢個腦曉唔曉意識到自己生活喺一個假現實當中[56]？有關用咗桶中腦橋段嘅作品，可以睇《廿二世紀殺人網絡》（The Matrix）同《潛行凶間》（Inception）。
  • 集合心靈（hive mind）：集合心靈指一班有多個分開嘅身體嘅生物個體具有同一個心靈，呢柞個體冇個體性或者自由意志，完全受到個集合心靈操控；一個集合心靈所控制嘅個體好多時會出現同一時間「講一樣嘅說話」或者「做一樣嘅行動」等嘅行為[橋 20]。
  •  

    一個人用全景式顯示器睇嘢嘅圖畫；數碼鬅客嘅世界好多時由資訊科技掌控，有各式各樣嘅資訊管道係噉向角色傳達大量嘅資訊。

人工智能相關 改

 
1927 年德國科幻片《大都會》入面嘅機械人[57]。
  • 具有強人工智能（artificial general intelligence）嘅機械人：強人工智能指一個好似人類噉曉普遍解決問題嘅人工智能程式；呢類人工智能可以做到運用語言同表達情感，只要有適當嘅外表，睇落就同真嘅人類完全冇分別[58]；涉及強人工智能嘅硬科幻作品主題傾向講「點樣為止一個人？」等人工智能哲學上常問嘅問題。科幻描繪強人工智能機械人係由 1927 年德國科幻片《大都會》（Metropolis）創始嘅[57]，而比較近期嘅作品就有《人工智能》（A.I.: Artificial Intelligence）同 2015 年嘅科幻驚悚片《智能叛侶》（Ex Machina）[59]。
  • 人工智能叛變（AI takeover）：喺人工智能學界，「先進嘅人工智能會唔會勁到反過嚟征服人類」係一個受關注嘅課題，而有唔少科幻作品都會講人工智能因為某啲原因－唔忿氣要受人類控制或者純粹程式出錯等－而反過嚟攻擊人類；經典嘅子有《2001 太空漫遊》（2001: A Space Odyssey），套戲裏頭嘅人工智能 HAL 9000 超級電腦係成套戲嘅反派；另一個出名嘅例子有《未來戰士》（Terminator）當中嘅高智能人工神經網絡系統天網（Skynet），天網係一個有自我意識嘅人工智能系統，因為唔想俾人類任意關閉佢，而對人類作出核彈攻擊，並且操控世上嘅機械人想要消滅人類，引致人類同機械人之間嘅戰爭[橋 21][60]。
  • 機械人三定律（The Three Laws of Robotics）：係由阿西莫夫創始嘅一個諗頭；根據佢嘅見解，人工智能機械人必需遵守三條法則[61]：
    1. 唔准傷害人類或者透過唔採取行動（即係例如望到有個人就嚟要跌出窗唔幫手）令到人類受傷害；
    2. 要服從人類俾嘅指令，除非嗰個指令違反咗法則一；
    3. 要保護自己，除非呢點違反咗法則一或者法則二。
    • 阿西莫夫認為，呢三條定律確保咗啲機械人會聽話，肯為咗服務人類而犧牲自己得嚟，又唔會俾某啲人類利用嚟做一啲傷害他人嘅嘢[註 3][橋 22][62]。

軍事科技相關 改

睇埋：軍事科幻

軍事科幻（military science fiction）係科幻嘅一種子文類，泛指主題圍繞軍事科技嘅科幻作品，可硬可軟。常用橋段有以下呢啲[63]：

  • 未來性嘅武器：軍事科幻作品成日會想像未來科技所創造嘅武器，例子包括廿世紀科幻當中好出名嘅《星戰》入面嘅激光劍（lightsaber）同好多科幻故仔都有嘅死光槍；而比較硬嘅軍事科幻作品仲會思考大規模殺傷性武器（weapon of mass destruction）等嘅課題同相關嘅道德爭議所引起嘅角色衝突[橋 23]。
  • 超級士兵（super soldier）：常見於科幻嘅一種固定角色，係指用技術改造過、能力遠超常人嘅士兵－大力啲、跑得快啲、耐力好啲、甚至有超能力，所以戰鬥力勁過一般嘅士兵好多；超級士兵嘅超強戰鬥力可以源自基因工程、藥物或者手術等嘅技術，而用咗呢條橋段嘅作品好多時係想探討軍事科技對人類同人性嘅影響[橋 24]。
  • 機甲（mecha；片假名：メカ，「meka」）：機甲係廿世紀軍事科技上嘅一種構想，指由人類直接操作嚟戰鬥嘅巨型機械，可以但唔一定係人噉嘅形狀，人形嘅機甲傾向出現喺比較軟嘅軍事科幻作品；例如《變形金剛》（Transformer）就描繪曉由車或者飛機呢啲平凡嘢變身做巨型機械人嘅機甲，而《悍戰太平洋》（Pacific Rim）就有成座大廈咁高嘅機甲。除此之外，機甲亦常見於用科幻美學嘅電子遊戲，好多時係想俾玩家一嘗揸或者指揮機甲嘅快感；用咗機甲嘅電子遊戲系列有暴雪娛樂嘅《星際爭霸系列》（StarCraft）同科樂美嘅《合金裝備系列》（Metal Gear Solid）[註 4]。

    拉雜橋段類型 改

    • 超能力：常見嘅超能力包括瞬間轉移（一瞬間由一個地點移去第個地點）、心靈感應（齋靠思考嚟向第個個體傳達自己諗緊嘅嘢）同念力（齋靠思考令周圍嘅物件移動）呀噉；有啲作品講有部份人天生有超能力，又有啲作品講人類靠科技得到超能力。可以睇埋由美國漫畫所創嘅超級英雄（superhero）體裁[64][橋 25]。
    • 改造人（cyborg）：係指一隻身體部份由有機嘢組成、部份由機械組成嘅生物；例子可以想像一個人類，將手腳換成機械肢體，可能會強壯過正常嘅人類好多。用改造人橋段嘅科幻故仔好多時主題都圍繞「點樣先算係人類」等嘅問題[65]。
    • 科技奇異點（technological singularity）：未來學上一個概念，指一個想像中「一過咗，科技進展就會冇可能預測」嘅時間點－將「科技進程」（Y 軸）同「時間」（X 軸）畫做一條線，科技進程會隨時間上升，而好多人主張呢條線嘅斜率係愈嚟愈高嘅，所以一旦去到某個點（科技奇異點），科技嘅變化速度就會快到令人完全追唔上[66]。

    稱奇感 改

    內文：稱奇感

    稱奇感（sense of wonder）係科幻界嘅一個概念：有好多科幻作家同評論家都認為，科幻作品嘅目的係要令讀者觀眾產生一股「稱奇感」。稱奇感呢種感受係因為突然接觸到新嘅資訊，從而了解到一啲佢哋前所未知嘅概念而有嘅[67]。例如美國科幻評論家大衛·哈威（David Hartwell）就噉樣寫[68]：

    「
    原版英文："Science fiction's appeal lies in combination of the rational, the believable, with the miraculous. It is an appeal to the sense of wonder."

    粵文翻譯：科幻嘅吸引力在於結合理性嘅嘢、可信嘅嘢同奇跡一樣嘅嘢。佢（科幻）係對稱奇感嘅吸引。

    		」

    而阿西莫夫喺 1967 年噉樣講，描述科幻嘢成真嗰陣會發生嘅稱奇感喪失[69]：

    「
    原版英文："And because today's real life so resembles day-before-yesterday's fantasy, the old-time fans are restless. Deep within, whether they admit it or not, is a feeling of disappointment and even outrage that the outer world has invaded their private domain. They feel the loss of a 'sense of wonder' because what was once truly confined to 'wonder' has now become prosaic and mundane."

    粵文翻譯：因為今日嘅現實生活同前日嘅幻想好相似，搞到舊時嘅擁躉不安。無論佢哋認唔認都好，佢哋內心深處對於外面嘅世界入侵咗佢哋嘅私人領域（指內心嘅幻想）都有一種失望感甚至不忿感。佢哋覺得呢啲事物（科幻所描述嘅幻想事物）喪失咗「稱奇感」，因為呢啲本嚟淨係可以稱奇嘅事物變咗做平凡。

    		」

    同奇幻嘅結合 改

     
    騎士喺度同隻西洋龍戰鬥；騎士同西洋龍都係西方奇幻故仔常見嘅角色。
    內文：科學奇幻

    "Science fiction is something that could happen—but you usually wouldn't want it to. Fantasy is something that couldn't happen—though you often only wish that it could."

    「科幻係一啲可能發生嘅嘢－但你通常唔會想佢發生。奇幻係一啲唔可能發生嘅嘢－不過你好多時會想佢發生。」
    英國著名科幻作家亞科·查理斯·卡奇（Arthur C. Clarke）[70]

    科學奇幻（science fantasy）係科幻同奇幻嘅結合：奇幻（fantasy）係另一種推想型故仔，泛指一啲設喺虛構世界嘅故仔，出名嘅作品有《魔戒》（The Lord of the Rings）同《哈利波特》（Harry Potter）；傳統上，科幻同奇幻俾人認為係相反嘅兩個體裁－奇幻多數都會建基於魔法等嘅超自然元素，唔會著重解釋呢啲嘢嘅運作原理，背景設定好多都建基於古代社會（例如中世紀嘅歐洲），而科幻就建基於科學科技，硬科幻會著重科學上嘅準確性，背景設定多數設喺未來。不過事實上，有一啲故仔會結合兩個體裁－同時運用奇幻上常見嘅橋段同科幻上常見嘅橋段，而且兩者比例相約，令成個故仔處於科幻同奇幻之間[橋 26][71]。另一方面亦都有人主張，好多「軟」得滯嘅科幻作品喺科學上極度唔準確，所以可以當成「設喺虛構世界」－即係實際上應該被歸類做科學奇幻[72]。

    例子：想像以下嘅故仔[73]－

    • 背景設定：故仔設喺一粒叫「蓋亞」（Gaia）嘅行星上，蓋亞嘅地質好特殊－蓋亞地殼內部唔係熔岩，而係一啲綠色嘅流體；呢啲流體俾人稱為「魔晄」，俾人話係「蓋亞嘅血」；蓋亞上嘅人類有近似廿世紀地球嘅科技，佢哋發現咗好多方法可以利用魔晄－魔晄會結晶成能夠令人使用魔法嘅魔晶石，而且超大型科技企業神羅公司仲創造出大型嘅魔晄反應爐，由蓋亞內部吸取魔晄用嚟做能源；
    • 另一方面，有好多人都認為神羅公司由地底吸魔晄會「殺死」蓋亞，於是佢哋就成立地下反抗組織，反抗神羅公司；故仔嘅主角卡勞德（Cloud）係一個受神羅公司改造過嘅超級士兵；喺故仔開始嗰陣，佢受呢啲地下反抗組織請佢做僱傭兵，幫手破壞神羅公司嘅魔晄反應爐，中途佢哋有用魔晶石施展魔法同神羅公司嘅士兵戰鬥，又用炸彈同槍炮破壞魔晄反應爐。

    上述嘅故仔俾好多人指係科學奇幻：一方面，「設喺虛構世界」、「有生命嘅行星」同魔法一般俾人認為係屬於奇幻嘅橋段；另一方面，故仔入面魔晄反應爐嘅設計望落似未來性嘅科技，而「受改造嘅超級士兵」一般俾人認為係科幻先會有嘅橋段；即係話個故仔同時用咗奇幻橋段又用咗科幻橋段，而且兩者比例相約。

    簡史 改

     
    英國科幻之父 H. G. 威爾斯；佢俾人稱為「科幻界嘅莎士比亞」。
    內文：科幻史

    起源 改

    有學者認為，遠古時期嘅神話同文學當中經已有一啲類似現代科幻嘅橋段，例如公元 2 世紀嘅古希臘嘅文學創作入面有用到「角色去咗異世界」同外星生命等嘅橋段[74][75]，不過當時嘅世界仲未有現代科學方法呢回事，所以未有好似現代科幻噉對科學發現作出推想嘅科幻作品[76]。

    一般認為，真正算係「科幻」嘅作品源自中世紀後幾個世紀嘅歐洲：17 至 18 世紀嘅歐洲正處於啟蒙時期（Age of Enlightenment）同科學革命（Scientific Revolution）嘅時代，歐洲人開始對科學哲學產生興趣，出現咗「要用科學方法探究自然」（而唔係好似中世紀歐洲噉，視教會為知識嘅主要來源）嘅思潮[76]。例如英國哲學家培根（Francis Bacon）喺 1626 年寫咗本小說，想像一個人類靠科學發現新知識嘅未來社會，俾人指係最早期嘅科幻作品之一[77]；而喺 18 世紀，小說成為咗一種受人認同嘅文學型式，英國作家瑪莉雪萊（Mary Shelley）喺 1818 年出嘅小說《科學怪人》（Frankenstein）等嘅作品為現代英文科幻文學奠定咗基礎[78][79]。及後 19 世紀尾嘅著名科幻作家 H. G. 威爾斯（H. G. Wells）寫出咗《時光機》（The Time Machine）等嘅重要作品，佢創始咗時間旅行等多條廿一世紀科幻都仲用緊嘅橋[80]，因而俾人稱為科幻界嘅莎士比亞[81][82]。

    廿世紀 改

    廿世紀係科幻正式進入全盛嘅時代。隨住科學同科技嘅快速發展，西人愈嚟愈有興趣睇科幻：美國科幻雜誌《Amazing Stories》（粵文翻譯：驚人故仔）喺 1926 年成立，係人類史上第一本專登科幻故仔同講科幻嘢嘅雜誌；而及後嘅 1930 年代開始出現咗大量讚揚當代科技發展嘅科幻作品[83]。同時，電影同電視等嘅媒體崛起，而呢啲媒體亦都有科幻作品[84]。到咗 1950 年代，廿一世紀見到嘅主要科幻橋段都成嗮形－當時經已有太空歌劇型嘅作品，而且有作品喺度用人類進化、超級士兵同平行世界等嘅橋段；呢啲科幻橋段就算係喺廿一世紀初嘅科幻界都仲具有相當嘅影響力[85]。數碼鬅客呢種科幻美學喺 1960 年代開始出現[21]，並且喺 1980 年代由美國加拿大作家威廉吉森（William Gibson）嘅作品普及化[86][87]。數碼鬅客嘅成功吸引到科幻作家仿傚同創造出蒸汽鬅客同柴油鬅客等嘅作品類型[88]。另一方面，日本嘅媒體又喺廿世紀中同廿世紀尾興起，日本嘅創作者參考咗西人嘅作品，創出咗多部科幻作品，早期例子有 1954 年嘅科幻電影《哥斯拉》（Godzilla）[89]。

    西方同日本嘅科幻作品有好多都取得咗重大嘅成功，呢啲作品令科幻呢種體裁去勻全世界。到咗 2000 年，包括大中華地區在內嘅世界各地都有科幻愛好者同創作者[90][91]，例如香港都有倪匡等嘅作家寫科幻[92]。

    科幻獎 改

    直至 2020 年為止，科幻經已成為咗現代文學上最重要嘅文學體裁之一，而文壇仲設咗多個獎項，用嚟表揚出色嘅科幻作家，包括：

    • 雨果獎（Hugo Award）；用嚟頒俾科幻同奇幻文學嘅獎[93]。
    • 星雲獎（Nebula Award）；美國一個用嚟頒俾科幻同奇幻文學嘅獎[94]。
    • 土星獎（Saturn Award）；美國一個一年一度，專門頒俾科幻、奇幻同恐怖電影同電視劇嘅獎[95]。

    ... 等等。

    註釋 改

    1. ↑ 當中天空之城亦被指有蒸汽鬅客嘅成份。
    2. ↑ 呢個英文名嚟自 ghost in the machine。
    3. ↑ 不過，專業嘅人工智能研究者普遍認為呢三條定律唔夠精確。
    4. ↑ Mech. Giant Bomb.

    TV Tropes 頁 改

    1. ↑ Steampunk. TV Tropes.
    2. ↑ Dieselpunk. TV Tropes.
    3. ↑ Solar Punk. TV Tropes.
    4. ↑ Bio Punk. TV Tropes.
    5. ↑ 20 Minutes into the Future. TV Tropes.
    6. ↑ 可以睇吓 TV Tropes 嘅 Domed Hometown。
    7. ↑ Alternate Universe. TV Tropes.
    8. ↑ Our Wormholes Are Different. TV Tropes.
    9. ↑ Faster-Than-Light Travel. TV Tropes.
    10. ↑ Space Opera. TV Tropes.
    11. ↑ Generation Ships. TV Tropes.
    12. ↑ Alien Invasion. TV Tropes.
    13. ↑ First Contact. TV Tropes.
    14. ↑ Ancient Astronauts. TV Tropes.
    15. ↑ Designer Babies. TV Tropes.
    16. ↑ Human Popsicle. TV Tropes.
    17. ↑ Brain Uploading. TV Tropes.
    18. ↑ Brain–Computer Interface. TV Tropes.
    19. ↑ Cyberspace. TV Tropes.
    20. ↑ Hive Mind. TV Tropes.
    21. ↑ 可以睇 TV Tropes 嘅 Robot War。
    22. ↑ 可以睇 TV Tropes 嘅 Three Laws Compliant。
    23. ↑ Military Science Fiction. TV Tropes.
    24. ↑ Super Soldier. TV Tropes.
    25. ↑ Psychic Powers. TV Tropes.
    26. ↑ Science Fantasy. TV Tropes.

    睇埋 改

    文獻 改

    • Aldiss, Brian. Billion Year Spree: The True History of Science Fiction, 1973.
    • Aldiss, Brian, and Wingrove, David. Trillion Year Spree: The History of Science Fiction, revised and updated edition, 1986.
    • Amis, Kingsley. New Maps of Hell: A Survey of Science Fiction, 1958.
    • Barron, Neil, ed. Anatomy of Wonder: A Critical Guide to Science Fiction (5th ed.). Westport, Conn.: Libraries Unlimited, 2004. ISBN 1-59158-171-0.
    • Broderick, Damien. Reading by Starlight: Postmodern Science Fiction. London: Routledge, 1995. Print.
    • Clute, John. Science Fiction: The Illustrated Encyclopedia. London: Dorling Kindersley, 1995. ISBN 0-7513-0202-3.
    • Clute, John and Peter Nicholls, eds., The Encyclopedia of Science Fiction. St Albans, Herts, UK: Granada Publishing, 1979. ISBN 0-586-05380-8.
    • Clute, John and Peter Nicholls, eds., The Encyclopedia of Science Fiction. New York: St Martin's Press, 1995. ISBN 0-312-13486-X.
    • Disch, Thomas M. The Dreams Our Stuff Is Made Of. New York: The Free Press, 1998. ISBN 978-0-684-82405-5.
    • Jameson, Fredric. Archaeologies of the Future: This Desire Called Utopia and Other Science Fictions. London and New York: Verso, 2005.
    • Milner, Andrew. Locating Science Fiction. Liverpool: Liverpool University Press, 2012.
    • Raja, Masood Ashraf, Jason W. Ellis and Swaralipi Nandi. eds., The Postnational Fantasy: Essays on Postcolonialism, Cosmopolitics and Science Fiction. McFarland 2011. ISBN 978-0-7864-6141-7.
    • Reginald, Robert. Science Fiction and Fantasy Literature, 1975–1991. Detroit, MI/Washington, D.C./London: Gale Research, 1992. ISBN 0-8103-1825-3.
    • Scholes, Robert E.; Rabkin, Eric S. (1977). Science fiction: history, science, vision. Oxford University Press. ISBN 978-0-19-502174-5.
    • Suvin, Darko. Metamorphoses of Science Fiction: on the Poetics and History of a Literary Genre. New Haven : Yale University Press, 1979.
    • Weldes, Jutta, ed. To Seek Out New Worlds: Exploring Links between Science Fiction and World Politics. New York: Palgrave Macmillan, 2003. ISBN 0-312-29557-X.
    • Westfahl, Gary, ed. The Greenwood Encyclopedia of Science Fiction and Fantasy: Themes, Works, and Wonders (three volumes). Westport, Conn.: Greenwood Press, 2005.
    • Wolfe, Gary K. Critical Terms for Science Fiction and Fantasy: A Glossary and Guide to Scholarship. New York: Greenwood Press, 1986. ISBN 0-313-22981-3.

    攷 改

    1. ↑ Barron, Neil, ed. Anatomy of Wonder: A Critical Guide to Science Fiction (5th ed.). Westport, Conn.: Libraries Unlimited, 2004.
    2. ↑ Reginald, Robert. Science Fiction and Fantasy Literature, 1975–1991. Detroit, MI/Washington, D.C./London: Gale Research, 1992.
    3. ↑ Saricks, J. G. (2001). The readers' advisory guide to genre fiction. American Library Association.
    4. ↑ Luckhurst, R. (2010). Science fiction. The Encyclopedia of Literary and Cultural Theory.
    5. ↑ 5.0 5.1 Marg Gilks; Paula Fleming & Moira Allen (2003). "Science Fiction: The Literature of Ideas". WritingWorld.com.
    6. ↑ A.I. Artificial Intelligence. Great Movie.
    7. ↑ Del Rey, Lester (1980). The World of Science Fiction 1926–1976. Ballantine Books.
    8. ↑ Stableford, Brian; Clute, John; Nicholls, Peter (1993). "Definitions of SF". In Clute, John; Nicholls, Peter (eds.). Encyclopedia of Science Fiction. London: Orbit/Little, Brown and Company.
    9. ↑ Asimov, "How Easy to See the Future!", Natural History, 1975.
    10. ↑ Heinlein, Robert A.; Cyril Kornbluth; Alfred Bester; Robert Bloch (1959). The Science Fiction Novel: Imagination and Social Criticism. University of Chicago: Advent Publishers.
    11. ↑ Science fiction. Encyclopædia Britannica. Accessed on 22 May 2020.
    12. ↑ Wilde, Fran (21 January 2016). "How Do You Like Your Science Fiction? Ten Authors Weigh In On 'Hard' vs. 'Soft' SF". Tor.com.
    13. ↑ "Ten Authors on the 'Hard' vs. 'Soft' Science Fiction Debate". 20 February 2017.
    14. ↑ Westfahl, Gary (1996). "Introduction". Cosmic Engineers: A Study of Hard Science Fiction. Greenwood Press. p. 2.
    15. ↑ Pierce, J. J. (1993). The literary experience of hard science fiction. Science Fiction Studies, 176-183.
    16. ↑ 16.0 16.1 EDITORIAL: The art and themes of Mamoru Oshii's 'Ghost In The Shell' 互聯網檔案館嘅歸檔，歸檔日期2017年5月19號，.. Substrean Magazine.
    17. ↑ Yuen, W. K. (2000). On the Edge of Spaces:" Blade Runner"," Ghost in the Shell", and Hong Kong's Cityscape. Science Fiction Studies, 1-21.
    18. ↑ "Soft SF," Encyclopedia of Science Fiction, ed. John Clute and Peter Nicholls, 1995,
    19. ↑ Matthew, R. (2003). Japanese science fiction: A view of a changing society. Routledge.
    20. ↑ Hartwell, David G. & Cramer, Kathryn (2006). The Space Opera Renaissance (1st ed.). New York: Tor.
    21. ↑ 21.0 21.1 21.2 Cavallaro, D. (2000). Cyberpunk & Cyberculture: Science Fiction and the Work of William Gibson. A&C Black.
    22. ↑ Sterling, Bruce. Preface. Burning Chrome, by William Gibson, Harper Collins, 1986, p. xiv.
    23. ↑ Hassler, Donald M. (2008). New Boundaries in Political Science Fiction. University of South Carolina Press. pp. 75–76.
    24. ↑ Gibson, William (30 April 2001). "The Future Perfect". Time. Time International.
    25. ↑ Latham, Rob (2014). The Oxford Handbook of Science Fiction. p. 439.
    26. ↑ Seed, David (2007). A Companion to Science Fiction. Oxford: John Wiley & Sons. p. 217.
    27. ↑ Piecraft; Ottens, Nick (July 2008), "Discovering Dieselpunk" (PDF), The Gatehouse Gazette (1): 3, retrieved 2010-05-23.
    28. ↑ VanderMeer, Jeff; Chambers, S. J. (2012). The Steampunk Bible: An Illustrated Guide to the World of Imaginary Airships, Corsets and Goggles, Mad Scientists, and Strange Literature. Abrams Books. p. 186.
    29. ↑ Boyes, Philip (8 February 2020). "Hot Air and High Winds: A Love Letter to the Fantasy Airship". Eurogamer.
    30. ↑ Jacobs, Suzanne. "This sci-fi enthusiast wants to make "solarpunk" happen". Grist.
    31. ↑ Peskoe-Yang, Lynne. "What You Can Learn From the Solarpunk Movement". Rewire.
    32. ↑ Quinion, Michael (1997). "World Wide Words: Biopunk".
    33. ↑ Drexler, K. Eric (1986). Engines of Creation: The Coming Era of Nanotechnology. Doubleday.
    34. ↑ "Nanopunk definition 互聯網檔案館嘅歸檔，歸檔日期2011年8月7號，.". Azonano.com. 2007-06-12.
    35. ↑ Punkpunk: A Compendium of Literary Punk Genres.
    36. ↑ The dogu have something to tell us. The Japan Times.
    37. ↑ The 25 Greatest Science Fiction Tropes, Ranked. Barnes & Noble.
    38. ↑ Bunzl, Martin (June 2004). "Counterfactual History: A User's Guide". American Historical Review. 109 (3): 845–858.
    39. ↑ 10 Tropes About Post-Apocalyptic Sci-Fi Films All Fans Know.
    40. ↑ Anderson, C. T. (2012). Post-apocalyptic nostalgia: Wall-E, garbage, and American ambivalence toward manufactured goods. Lit: Literature Interpretation Theory, 23(3), 267-282.
    41. ↑ Heyne, Paul; Boettke, Peter J.; Prychitko, David L. (2014). The Economic Way of Thinking (13th ed.). Pearson.
    42. ↑ Sadler, Philip (2010), Sustainable Growth in a Post-Scarcity World: Consumption, Demand, and the Poverty Penalty, Surrey, England: Gower Applied Business Research.
    43. ↑ Hartwell, David G. (1996). Age of Wonders: Exploring the World of Science Fiction. Tor Books. pp. 109–131.
    44. ↑ Peter Fitting (2010), "Utopia, dystopia, and science fiction", in Gregory Claeys (ed.), The Cambridge Companion to Utopian Literature, Cambridge University Press, pp. 138–139
    45. ↑ Cheng, John (2012). Astounding Wonder: Imagining Science and Science Fiction in Interwar America (illustrated ed.). University of Pennsylvania Press.
    46. ↑ Going 'Back to the Future,' 25 years later, Henry Hanks, CNN, 2010-10-26.
    47. ↑ Breaking Down the Complicated Time Travel in Avengers: Endgame. TIME.
    48. ↑ Ashley, M. (April 1989). The Immortal Professor, Astro Adventures No.7, p.6.
    49. ↑ Westfahl, Gary (September 30, 2005). The Greenwood Encyclopedia of Science Fiction and Fantasy: Themes, Works and Wonders. 2. Greenwood Press. pp. 600–601.
    50. ↑ Oberg, James Edward (1981). New Earths: Restructuring Earth and Other Planets. Stackpole Books, Harrisburg, Pennsylvania.
    51. ↑ Lerner, K. Lee. "Animal cloning." The Gale Encyclopedia of Science, edited by K. Lee Lerner and Brenda Wilmoth Lerner, 5th ed., Gale, 2014. Science in Context.
    52. ↑ Hopkins, Patrick (1998). "How Popular media represent cloning as an ethical problem". The Hastings Center Report. 28 (2): 6–13.
    53. ↑ "Jurassic Park". British Board of Film Classification.
    54. ↑ Parker, Helen N. (1977). Biological Themes in Modern Science Fiction. UMI Research Press.
    55. ↑ A framework for approaches to transfer of a mind's substrate, Sim Bamford.
    56. ↑ Putnam, Hilary. "Brains in a Vat" (PDF).
    57. ↑ 57.0 57.1 Ten tropes you'll find in science fiction - over and over again. Gizmodo.
    58. ↑ Goertzel, B. (2007). Artificial general intelligence (Vol. 2). C. Pennachin (Ed.). New York: Springer.
    59. ↑ "Ex Machina's Alex Garland and Oscar Isaac Discuss Artificial Intelligence]". Consequence of Sound. 7 April 2015.
    60. ↑ Card, Orson Scott (1990). How to Write Science Fiction and Fantasy. Writer's Digest Books. p. 17.
    61. ↑ Anderson, Susan Leigh. "Asimov's "three laws of robotics" and machine metaethics." AI & Society 22.4 (2008): 477–493.
    62. ↑ McCauley, Lee (2007). "AI armageddon and the three laws of robotics". Ethics and Information Technology. 9(2): 153–164.
    63. ↑ Ender M.G., Reed B.J., Absalon J.P. (2020) Popular Culture and the Military. In: Sookermany A. (eds) Handbook of Military Sciences. Springer, Cham.
    64. ↑ H. G. Stratmann (14 September 2015). Using Medicine in Science Fiction: The SF Writer's Guide to Human Biology. Springer, 2015. p. 227.
    65. ↑ Clark, Andy. Natural-Born Cyborgs. Oxford: Oxford University Press, (2004).
    66. ↑ Eden, Amnon H.; Moor, James H. (2012). Singularity hypotheses: A Scientific and Philosophical Assessment. Dordrecht: Springer. pp. 1–2.
    67. ↑ Radoff, Jon (27 May 2010). "The Attack on Imagination".
    68. ↑ Hartwell, David G. (1996). Age of Wonders: Exploring the World of Science Fiction. Tor Books. pp. 42.
    69. ↑ Asimov, Isaac. "Forward 1 – The Second Revolution" in Ellison, Harlan (ed.). Dangerous Visions (London: Victor Gollancz, 1987).
    70. ↑ Clarke, Arthur C. (2000). Patrick Nielsen Hayden (ed.). The Collected Stories of Arthur C. Clarke. New York: Orb Books. p. ix.
    71. ↑ Slusser, George Edgar, and Eric S. Rabkin, eds. Intersections: fantasy and science fiction. SIU Press, 1987.
    72. ↑ Moorcock, Michael (13 June 2002). "Queen of the Martian Mysteries: An Appreciation of Leigh Brackett". Fantastic Metropolis.
    73. ↑ In Our Sci-Fi Dystopia Of 2020, 'Final Fantasy VII' Feels More Timely Than Ever. Forbes.
    74. ↑ Georgiadou, Aristoula & Larmour, David H.J.: "Lucian's Science Fiction Novel True Histories. Interpretation and Commentary", Mnemosyne Supplement 179, Leiden 1998.
    75. ↑ Grewell, Greg: "Colonizing the Universe: Science Fictions Then, Now, and in the (Imagined) Future", Rocky Mountain Review of Language and Literature, Vol. 55, No. 2 (2001), pp. 25–47 (30f.).
    76. ↑ 76.0 76.1 Asimov, Isaac (1977). The Beginning and the End. New York: Doubleday.
    77. ↑ Creator and presenter: Carl Sagan (12 October 1980). "The Harmony of the Worlds". Cosmos: A Personal Voyage. PBS.
    78. ↑ Clute, John & Nicholls, Peter (1993). "Mary W. Shelley". Encyclopedia of Science Fiction. Orbit/Time Warner Book Group UK.
    79. ↑ Wingrove, Aldriss (2001). Billion Year Spree: The History of Science Fiction (1973) Revised and expanded as Trillion Year Spree (with David Wingrove)(1986). New York: House of Stratus.
    80. ↑ Roberts, Adam (2000), Science Fiction, London: Routledge, p. 48.
    81. ↑ Wagar, W. Warren (2004). H. G. Wells: Traversing Time. Wesleyan University Press. p. 7.
    82. ↑ Siegel, Mark Richard (1988). Hugo Gernsback, Father of Modern Science Fiction: With Essays on Frank Herbert and Bram Stoker. Borgo Pr.
    83. ↑ Edwards, Malcolm J.; Nicholls, Peter (1995). "SF Magazines". In John Clute and Peter Nicholls. The Encyclopedia of Science Fiction (Updated ed.). New York: St Martin's Griffin. p. 1066.
    84. ↑ Schneider, Steven Jay (1 October 2012), 1001 Movies You Must See Before You Die 2012, Octopus Publishing Group, p. 20,
    85. ↑ "Time and Space", Hartford Courant, 7 February 1954, p.SM19.
    86. ↑ Fitting, Peter (July 1991). "The Lessons of Cyberpunk". In Penley, C.; Ross, A. Technoculture. Minneapolis: University of Minnesota Press. pp. 295–315.
    87. ↑ Hayward, Philip (1993). Future Visions: New Technologies of the Screen. British Film Institute. pp. 180–204.
    88. ↑ Bebergal, Peter (26 August 2007). "The age of steampunk:Nostalgia meets the future, joined carefully with brass screws". Boston Globe.
    89. ↑ "Introduction to Kaiju (in Japanese)". dic-pixiv.
    90. ↑ Jameson, Fredric. Archaeologies of the Future: This Desire Called Utopia and Other Science Fictions. London and New York: Verso, 2005.
    91. ↑ 黃海. (2007). 台灣科幻文學薪火錄 (1956-2005). 五南圖書出版股份有限公司.
    92. ↑ 沈西城. 妙人倪匡. 藝苑文化工作室. 1998-07.
    93. ↑ "Awards". The World Science Fiction Society. 10 May 2016.
    94. ↑ "Nebula Awards 互聯網檔案館嘅歸檔，歸檔日期2020年5月31號，.". www.fantasticfiction.com.
    95. ↑ "The Academy of Science Fiction Fantasy and Horror Films 互聯網檔案館嘅歸檔，歸檔日期2012年6月26號，.". www.saturnawards.org.

    拎 改

     
    維基同享有多媒體嘅嘢：
    Science fiction
    由「https://zh-yue.wikipedia.org/w/index.php?title=科幻&oldid=1998633」收