武漢肺炎英國疫情

武漢肺炎英國疫情係講武漢肺炎喺英國嘅爆發情形。截至2021年5月17號，英國夾埋有4,452,756單確診病例，死咗127,684個人。

唔同地區確診嘅病例

情況

頭兩單個案

英國喺2020年1月31號出現第一單感染個案，嗰時有兩位中國大陸留學生喺英倫北約郡約克玩（其中一位係約克大學嘅留學生），喺入住酒店時身體唔舒服，後嚟轉院到紐卡素時發現感染咗武漢肺炎。同日喺中國湖北武漢出發，飛到英國英格蘭牛津郡布里茲諾頓嘅軍機機場時，當地官員懷疑會將病毒帶到英國而搞出大傳播，結果證實係虛驚一場。之後嗰一個禮拜都冇任何新嘅武漢肺炎個案。

出現零星個案

踏入2月後，喺2月6號出現第3單武漢肺炎個案，患者曾經同星加坡班老友去咗法國上薩華一帶滑雪，1月28號返到英國英格蘭東修適士時冇乜明顯感冒發燒症狀，直到2月6號先至被確診。正因爲呢單個案，當地政府開始加強入境監控，對凡係最近兩個禮拜內去過中國大陸、香港、澳門、日本、南韓、馬來西亞、臺灣、星加坡、泰國啲旅客都必須要採取隔離措施。9號出現第4單武漢肺炎個案，重喺第二日多咗4位感染武漢肺炎嘅患者，都喺布禮頓嗰邊發現。而第9單武漢肺炎個案喺2月11號發現。

自從鑽石公主號因爆發武漢肺炎而停靠日本橫濱港後，政府要求撤返嗰堆英國旅客入面，2月23號當日確診有4位英國人感染咗武漢肺炎，嗰四位旅客返到英國先後轉院到默西利物浦、南約郡錫菲、北約郡紐卡素。

大爆發趨勢

疫情從2月28號開始出現大爆發。喺威爾斯同北愛爾蘭都各收到第一單感染武漢肺炎個案，患者曾經去過意大利北邊玩。同日喺英格蘭又收到兩單確診武漢肺炎個案，都係英格蘭本地公民，既冇任何既往疾病史，又冇接觸過其他武漢肺炎患者。2月29號又出三單，患者分別喺英格蘭柏莎郡、告羅士打郡同埋赫福郡出現。

到2月29號深夜為止，總確診武漢肺炎個案去到23單，未出過單死亡個案。

大規模爆發

踏入3月之後，疫情正式開始大爆發。3月1號連埋大曼徹斯特同埋蘇格蘭在內，出現13單感染武漢肺炎個案。第二日喺根德郡、赫福郡同德雲郡，都夾埋收到四單個案，都係由意大利遊完返嚟嘅居民。直到3月4號深夜為止，雖然先後喺直布羅陀、蘇格蘭大格拉斯哥、嘉林邊山脈都發現有感染武漢肺炎個案，但嗰時重未發現死亡個案。

2020年3月12號，喺英格蘭倫敦某間超市入面，貨架賣嘅番梘差唔多賣嗮咁滯。

2020年3月5號，感染個案破咗一百大關，重出現第一單死亡個案。死者係位70歲嘅阿婆，佢當日感染咗武漢肺炎，送院之後直接證實不治。從嗰日開始，感染個案越嚟越多，重喺第二日又出一單死亡個案。到3月9號爲止，感染個案上升到321單，死亡個案達到5單，喺英格蘭多實郡都出現第一單感染武漢肺炎個案。疫情重向體壇界插手，做過諾定咸森林同埋奧林比亞高斯足球會嘅老世——伊雲基路斯馬連拿基斯喺3月10號感染咗武漢肺炎。3月12～13號，由於阿仙奴足球會球員——米基阿迪達同車路士足球會球員——哥林·赫臣－奧杜爾都相繼感染咗武漢肺炎，英格蘭足球協會先至知東窗事發而直接宣佈，屬下嘅英超、英冠、英甲、英乙、女版英超等等冚唪唥足球聯賽從3月14號開始，都要停賽。喺蘇格蘭，當地收到英格蘭有兩位職業足球成員感染武漢肺炎嘅料後，亦即刻宣佈舉辦緊嘅蘇格蘭專業足球聯賽停賽；當地民眾收到疫情爆發料後，一窩蜂噉去超市同百貨猛咁買口罩、番梘、紙巾、廁紙等生活應急物資而出現缺貨。近圓周率日時段，由於死亡個案達到兩位數，感染個案破千。蘇格蘭亦收到第一單因感染武漢肺炎死咗嘅個案。消費者權益日喺體壇界，無網籃球超級聯賽委員會亦宣佈停辦。

由於疫情爆發，當地重有部份民眾去商場甚至戴嗮全副武裝入場買嘢。

2020年3月16號，感染個案去到1543單，死亡個案去到55單。首相鮑里斯·約翰遜建議喺英國當地啲民眾，若果冇乜必要或唔緊急情況下，都暫時唔好出去旅遊或接觸第啲人。重建議民眾暫時唔好去酒吧或夜總會、戲院等人員密集場所，重建議喺屋企辦公。嗰日連英國工黨成員——姬蒂·奧斯邦都成為武漢肺炎患者；英格蘭橄欖球超級聯賽當日亦宣佈停賽。第二日，英國保守黨議員辛偉誠宣佈捐出£330,000,000嚟支持對抗呢單疫情。

2020年3月18號，感染個案破咗二千大關，死亡個案破咗一百大關。喺威爾士，當地政府宣佈受疫情影響，從後日開始，冚唪唥學校都要停課。隨後北愛爾蘭都借鑒咗威爾士嘅停課行動所為，淨低嘅英格蘭同蘇格蘭政府都宣佈冚唪唥學校喺後日停課。不過就喺第二日，北愛爾蘭收到第一單感染武漢肺炎死咗嘅患者。

2020年3月23號，感染個案破咗六千大關，死亡個案破咗三百大關。英國當地好多商場都要閂門大吉嚟避開疫情。同日政府重直接要求喺疫情期間要嘚喺屋企，除非係需要緊急購買、有必要兼好緊急嘅工作性旅遊、醫學需要、保姆四種是但一個理由先至有得出街。甚至停止一切公共娛樂活動、社會活動除葬禮外都唔辦得、甚至好多企業都閂門大吉。期間首相鮑里斯·約翰遜重打算採取「封城」嚟控制疫情。

喺英國部份街頭嘅電子牌出現嘅防疫公示標語。入面啲字喺粵語翻譯係「嘚喺屋企，拯救生命，保持距離」噉解。

2020年3月25號，感染個案破咗九千大關，死亡個案破咗五百大關。其中喺英國駐匈牙利大使館做嘢嘅副館長——史提芬迪成為武漢肺炎患者兼喺匈牙利布達佩斯嗰邊直接瓜老襯。

英國國會就喺休會前嘅3月26號通過咗緊急法案，重喺第二日生效。法令除為被召回嘅退休醫護提供保障外，最緊要嘅係俾咗差人啲執法權，去限制啲活動舉行，同埋關閉酒吧等營業場地。違反法令嘅民眾，首次會被開罰60英鎊（14日清數可減半），再犯開罰120英鎊。呢個法令有效期將達6個月，每3個禮拜會檢視一次。嚟到嗰日，感染案例即刻破咗一萬大關，死亡個案去到759單。不過第二日嘅武漢肺炎死亡個案破千。

不過感染案例重係持續增加，到3月底倒數第二日深夜為止，感染個案突破咗二萬大關，甚至喺月底最後一日，死亡個案突破二千大關。嗰時總確診數去到25150單，死亡個案2352單。期間疫情重向總統府同皇室插手，約翰遜喺27號感染咗武漢肺炎；30號輪到當時係王儲嘅查理斯三世感染武漢肺炎。不過P. J. N. 辛克利成為武漢肺炎患者後唔好彩，喺月底最後一日直接賣鹹鴨蛋。

踏入4月之後，感染同死亡個案重係繼續爬升。2號，感染案例打破咗三萬大關，去到33718單；死亡個案打破咗三千大關，去到3605單。月初第一日，英國國民保健署要求用9日時間喺倫敦東部地區再起兩間臨時醫院嚟收留武漢肺炎患者。到清明嗰日為止，感染個案破咗四萬大關，去到41892單；死亡個案破咗四千大關，去到4932單。同日總統約翰遜嘅女友——卡莉茜蒙絲（Carrie Symons）都成為武漢肺炎患者；期間有謠傳5G網絡會散播肺炎病毒，結果喺英格蘭西密德蘭伯明翰同默西先後發生信號塔縱火案。

抗疫措施

英國國會喺2020年3月27號實施咗緊急法案後嘅第一個禮拜，陸續浮現咗差人一啲執法嘅問題，被輿論質疑係濫權。似前英國最高法院法官桑普遜（Jonathan Sumption）就同BBC講，英國嘅警務傳統度，差人不過係有著制服嘅公民，唔係唯政府指揮、鐵板一塊嘅成員，又話後者嘅出現正係步向警察國家（Police State）嘅開端。

喺英格蘭打比郡，有班差人為咗防啲民眾去聚到「藍湖」而染黑成個湖，搞到啲水成個污糟貓噉。據報有啲地方嘅差人重派咗無人機去睇實啲到風景區散步嘅民眾。有獲准開門嘅便利店話：有警員由人客嘅籃度拎走咗復活蛋同十字包，因為呢啲話唔係「必需品」。呢個就事關個法令，係未有明確啲銷售嘅許可範圍，同埋必需品嘅定義。

表

武漢肺炎英國疫情

日期	英格蘭								北愛爾蘭	蘇格蘭	威爾士	確診		死		檢測		攷
	東英格蘭	倫敦	中部地區	東北英格蘭同約克郡	西北英格蘭	東南英格蘭	西南英格蘭	未分類				多咗	夾埋	多咗	夾埋	多咗	夾埋
2020/01/31				2								2	2					中國 (2)
2020/02/06						1						1	3					星加坡 (1)
2020/02/10						4						4	7					法國 (4)
2020/02/12		1										1	8					中國 (1)
2020/02/23								4				4	12					日本 (4)
2020/02/27			1					1	1			3	15				7,690	意大利 (1) 西班牙 (1)
2020/02/28		2				1		1			1	5	20			1,296	8,986	意大利 (1) 伊朗 (2) 英國 (1)
2020/02/29	1			1			1					3	23			1,497	10,483	意大利 (2) 亞洲 (1)
2020/03/01	2	1		1	1	3	1	3				12	35			1,267	11,750	意大利 (7) 伊朗 (2) 英國 (4)
2020/03/02						1	1	1		1		4	39			1,775	13,525	意大利 (4)
2020/03/03								12				12	51			386	13,911	意大利 (8) 伊朗 (1) 日本 (1) 德國(1) 新加坡(1)
2020/03/04								32	2	2		36	87			2,748	16,659	英國 (3)
2020/03/05								25		3	1	29	116	1	1	1,424	18,083
2020/03/06	3	4	3	3	4	7	7	11	1	5		48	164	1	2	2,255	20,338
2020/03/07	5	9	5	5	5	6	3	−1	3	5		45	209		2	1,122	21,460
2020/03/08	7	13	8		5	11	10	6	5	2	2	69	280	1	3	2,053	23,513
2020/03/09	1	10	6	4	4	2	3	6		5	2	43	321	2	5	1,447	24,960
2020/03/10	5	30	5	2	2	8	3	−11	4	4	9	61	384	1	6	1,301	26,261
2020/03/11	3	13	6	8	6	9	3	15	2	9	4	78	460	2	8	1,215	27,476
2020/03/12		32	2	12	10	23	−2	27	2	24	6	136	586	2	10	1,698	29,174
2020/03/13	7	31	15	5	9	27	7	55	9	25	12	202	798	1	11	3,597	32,771
2020/03/14	4	146	16	18	7	34	4	49	5	36	23	342	1140	10	21	4,975	37,746
2020/03/15	28	94	19	24	7	31	8	−37	11	32	34	251	1391	14	35	2,533	40,279
2020/03/16	10	73	35	−5	7	−2	16	−37	7	18	30	152	1543	21	55	3,826	44,105
2020/03/17	12	141	11	−12	54	68	18	55	10	24	22	407	1950	16	71	6,337	50,442
總數	93	621	140	74	157	241	95	136	62	195	136	1950	唔適用	71	唔適用	50,442	唔適用

睇埋

• VOC-202012/01（又叫英國變種病毒）