求偶

求偶（粵拼：kau4 ngau5；英文：courtship）係指一對男女交往並且嘗試發展親密關係嘅過程。廣義上，呢個字詞可以包埋人以外嘅動物當中「一公一乸搵對象做伴侶」嘅過程，呢種現象吸引咗好多動物行為學家研究。

呢幅相影到一隻孔雀公開屏。孔雀公一開屏就會成為孔雀乸嘅注意力中心。

動物

睇埋：性選擇

喺地球上，稍為複雜啲嘅動物都會有求偶嘅行為。動物有好多方法求偶，例如蟬公會大聲叫嚟吸引啲乸、螢火蟲會發光嚟搵伴侶、孔雀公會開屏嚟吸引啲乸... 呀噉。

呢個過程梗會涉及公同乸雙方揀對象求偶，而公同乸嘅擇偶喜好，會影響邊啲特徵比較有機會傳到去下一代。擇偶喜好嘅呢種影響，就係所謂嘅性選擇。

公要吸引乸，一種簡單嘅方法係送啲「小禮物」畀隻乸：由隻乸嘅角度睇，一隻公可以搵到有價值嘅嘢畀佢，就表示隻公能力有返咁上下；例如喺多種嘅企鵝當中，公成日都會送石仔畀佢哋想追求嘅乸—對呢啲企鵝嚟講，石仔係築巢嘅重要材料，乸收到石仔（尤其係表面平滑嘅石仔）往往會比較有意慾同送禮嗰方交配。呢種情況幾似人類當中男人用各種嘅禮物嚟向女人求愛。

人類

喺人類社會裡邊，男人求愛好興送小禮物畀女人，例如玫瑰就係廿一世紀初常見嘅求愛禮物。

睇埋：跳舞同社交舞

喺歐美地區，男女雙方一齊跳舞係求偶嘅一種常見方式，一種常見嘅做法如下：喺舞會上，冇興趣跳舞嘅人一般都會齊齊退後去間舞廳嘅邊緣，畀舞廳中間嗰度空出一笪有返咁上下大嘅空間；想跳舞嘅男士跟住就要行去佢想邀請嘅女士嗰度，問嗰位女士有冇興趣同佢一齊跳（所謂嘅 May I?），而如果位女士肯同佢跳，兩個人就會行去舞廳中間跳；一對對共舞嘅男女就會喺舞廳中間起舞。

睇埋

• 訊號理論
• 節奏感