塘
塘（英文：pond），又叫池塘，係止水停留嘅地方，一般來講細過湖，大過池。
塘可以天然，亦可以係人工嘅。有啲塘有特別用途，好似魚塘係用來養魚；水塘係用儲水。
塘同溪嘅分別係，溪嘅水流好明顯，而塘嘅水流好細，通常由溫差或者風吹而來。
幾大幾細先叫做塘，係各有各講，無一個公認標準。
天然嘅塘，深啲嘅，有時會叫潭。
界定塘同湖嘅方法都幾有爭議，一般嚟講，塘係面積較細、水深較淺嘅水體，唔使用船隻而多採竹筏渡過；另一個定義係可以畀人澗住水行到過去，或者水淺得可以畀陽光照到塘底。
塘除咗徑流、泉水同少數間歇性溪流以外通常冇明顯嘅天然入水口，主要係依靠天然嘅降水、地下水滲出或以人工引水方法（比如引水道、水泵、伏流同鑽井導水）補充池內嘅水量。塘都冇真正意義上嘅地表出水口，水只可以以蒸發、滲入土壤、進入地陷或喺滿水時漫過塘畔同塘堤嘅形式離開塘。因此塘呢個封閉嘅內流生態系統都同湖唔同，幾乎冇成形嘅水體流動，囤積嘅淤泥同被沖刷進入嘅污染物通常好多，池水渾濁而且好多時候都係綠色或棕紅色嘅（因為死水裡會有好多藻類同水草生長）。但塘周圍都可以形成小型濕地同消落帶植被，為蛙類、水生昆蟲同一啲半水生動物（比如水鳥同水鼠）提供棲息地。一啲由河流或溪流改道而形成嘅塘（比如曲流切斷形成嘅牛軛池）如果水量夠多甚至可以形成能自我維持嘅淡水生態系統，並可能有殘餘嘅天然淡水魚群。
喺亞洲，塘常見於庭院入面；而喺歐洲，塘亦常見於城堡同修道院之中。塘中通常會放養一啲觀賞魚（比如錦鯉），用來提供消遣並控制水藻同蚊蟲滋生。有啲塘都會被利用來養殖有經濟價值嘅淡水食用魚、甲殻動物（淡水蝦、鰲蝦、淡水蟹）同龜類，呢類用作水產養殖嘅塘統稱魚塘。一啲魚塘則會放養受休閒捕魚群體喜愛嘅游釣魚來提供免費或付費釣魚嘅娛樂場所。
陂塘可以指天然嘅水池加上人工建設、作為灌溉用途嘅水利設施，都特指台灣桃園臺地上嘅人工灌溉塘。桃園臺地係個切割臺地，河谷深而水位低，位於高處嘅農田難以灌溉。臺地表面厚覆嘅紅色粘土層，唔適合農耕，但係適合儲水。從清朝開始，當地住民就由緩斜坡地挖集粘土，堆築喺坡下成岸，用以阻聚山泉雨水，而形成陂塘[1]。台灣桃園市因陂塘眾多，有「千塘市」美名[2]。
圖集
編輯-
人造水塘 -
-
-
養魚池
