泡泡龍 (1986年遊戲)

泡泡龍（日文：バブルボブル，英文：Bubble Bobble）係由TAITO開發嘅電子遊戲，最先喺1986年嘅街機度推出。主角係兩隻綠色同藍色嘅可愛恐龍仔（分別叫做Bub同Bob），會噴出「泡泡」，所以叫做「泡泡龍」。泡泡龍可以一個人或者兩個人一齊玩，共有100關，每一關嘅遊戲範圍只有一個螢幕咁大，冇任何滾動，有部份關卡玩家可以喺下面嘅兩個窿「返去」螢幕度。過關方法係消滅畫面上所有嘅敵人，一般係用噴出嘅泡泡包住敵人，然後將泡泡撞爆就可以消滅。

泡泡龍
Bubble bobble
Bubble bobble.jpg 益智、射擊
平台	街機、紅白機、PS4
整	TAITO 東映株式會社
發行	TAITO 東映株式會社
設計師	三辻富貴朗
音樂	君島正
系列	泡泡龍
模式	單人、多人
發行日期	1986年8月
分級
顯示	256×224

家下呢餅帶喺街機、紅白機，及PS4平台先至有得玩。

系列遊戲一覽

泡泡龍一般系列

• 泡泡龍Part2
• 泡泡交響曲
• 泡泡回憶
• 泡泡龍革命
• 泡泡龍進化
• 泡泡龍雙重射擊
• 泡泡龍Neo！
• 泡泡龍好友

彩虹島系列

• 彩虹列島
• 彩虹島陽傘
• 彩虹島革命
• 彩虹島進化
• 彩虹島高聳嘅冒險！

過關條件

將畫面裏面所有敵人消滅就可以過關，所有敵人消滅八秒之後會自動進入下一關。

特殊狀況

• 若果已經俾泡泡包住嘅敵人過咗一段時間重唔撞爆佢，會轉變成紅色泡泡，並會喺冇幾耐之後衝爆泡泡，呢個時候怪物會呈現「發嬲」（變紅色同埋郁得好快）狀態。
• 喺一關裏面，如果未能夠喺指定時間消滅所有敵人（大概30秒），螢幕上會出現「hurry up!」嘅警告字句，敵人亦會「發嬲」。若果過咗時間之後重未消滅全部敵人，就會出現一隻白色嘅鯊魚（叫做Baron von Blubba），雙打就會出現兩隻。Baron von Blubba係唔能夠用任何方法消滅，直到主角將畫面上其他敵人全部消滅，又或者係主角死，Baron von Blubba先會自動消失。
• 當淨低最後一隻怪物嗰陣，怪物就會呈現「發嬲」狀態。

人物

玩家

• 泡泡龍：可以噴出「泡泡」，俾泡泡擊中嘅敵人會轀喺泡泡入面。泡泡龍一頂個泡泡，敵人就會消滅。

敵人

• Bubble Buster：盒形嘅機器人，冇攻擊能力。佢喺第一關出現。
• Stoner：饑鬼嘅白色怪物，會製造石頭向前推。佢喺第六關出現。
• Beluga：紫色嘅飛龍，以45度角方向移動，當撞到牆之後會以90度返轉頭。佢喺第十關出現。
• Super Socket：一隻外星機器人，淨係會左右移動，重會向下發射激光。佢喺第六十關出現。
• Hullaballoon：熊形嘅怪物，同Beluga差唔多，不過佢有良好嘅控制能力，所以喺狹窄嘅關卡會成為危險敵人。佢喺第二十關出現。
• Coiley：彈簧型嘅怪物，淨係會彈彈跳，而且好快。佢喺第三十關出現。
• Incendo：走得好快，不過跳躍能力超弱。佢能夠發射火焰球，而且唔似Stoner咁停低先會發射。佢喺第四十關出現。
• Willy Whistle：綠色嘅醉鬼，有非常好嘅跳躍能力。佢識得掟酒樽，而酒樽撞到牆之後會反彈，醉鬼會接返。佢喺第五十關出現。

大佬

• Grumple Gromit：係巨型Willy Whistle，擁有Beluga嘅飛行能力，重會猛咁「發射」酒樽。佢喺第一百關先會出現，玩家需要飲咗魔法水先至能夠攻擊佢。

特殊泡泡

部分關卡會出現特定效果嘅泡泡，撞爆佢會輔助玩家消滅敵人，有啲關卡一定要依賴特殊泡泡先可以消滅敵人。通常用特殊泡泡消滅敵人嘅分數都會高啲。

• 水流泡泡：喺第5關出現，係裝住水流嘅泡泡，撞爆之後會有一條大型水流出現，好快咁流到最底，會直接消滅撞到嘅怪物，重會變成藍鑽石，玩家掂到就會俾佢帶住走。
• 電擊泡泡：喺第19關出現，係包住電擊圖案嘅泡泡，撞爆之會根據「玩家撞爆嘅反方向」橫向移動，會直接消滅撞到嘅怪物，重會變成橙色鑽石，玩家掂到就會短暫麻痺郁唔到一陣。
• 火焰泡泡：喺第25關出現，係包住火種圖案嘅泡泡，撞爆之後會直線跌落到地面，重會產生1~15個連續性火苗，會直接消滅掂到嘅怪物，玩家掂到就會痛一陣同埋速度減慢。
• 字母泡泡：含有"E""X""T""E""N""D"嘅泡泡，撞爆佢會收集喺一邊，儲齊完整字母可以無條件過關同埋會加一條命。

睇埋

• 泡泡龍方塊