流水響水塘

流水響水塘（英文：Lau Shui Heung Reservoir），又寫做流水嚮水塘，係香港一個水塘，喺新界北區東部，八仙嶺郊野公園之內，龍山東北一帶，處於粉嶺平原至東北嘅位置。

水塘功能係將八仙嶺西北部嘅水源收集，經地下水管輸送到船灣淡水湖。又係灌溉水塘，用來灌溉附近農田。水塘亦係軍地河嘅主要源頭，河水先流入軍地，再匯入梧桐河。面積約3.5公頃，容量約17萬立方米，石屎主壩高24米、長54.9米，副壩高7.3米、長39米，算係比較細嘅水塘。

歷史

水塘喺1968年起，屬於船灣淡水湖工程計劃一部分。

水塘所在地流水響，喺大清嘉慶廿四年（1819年）編嘅《新安縣志》已有記載，「流水響潭發源處有數石井，天造地設，深約尋丈，春夏溺如飛瀑，秋冬則淙淙細響」。

水塘四周圍係林地，一排排白千層樹生喺水塘邊。

水塘相當深，顏色碧綠。塘底俾大大細細嘅沙石覆蓋，形成唔同嘅生態環境，適合各種魚類生存，包括香港少見嘅弓背青將、月鱧等。

2003年，漁農自然護理署喺流水響水塘附近發現一個蜻蜓新品種，灰白色肚嘅「赤斑蟌」。

流水響郊遊徑

流水響水塘係新界北郊遊熱門之地。漁護署喺附近整咗涼亭、露營場地、燒烤場、野餐場地同廁所等設施。仲有一條郊遊徑，起點同終點都喺水塘附近，全長約4.4公里，行晒全程大概要兩個鐘。

呢篇流水響水塘係香港建築嘅楔位文章，重未完成嘅。麻煩你幫手補充佢嘅內容。