液體檢測儀

 液體檢測儀（粵拼：jik6 tai2 gim5 cak1 ji4） ，又嗌液體安檢儀jik6 tai2 on1 gim5 ji4或液體探測儀jik6 tai2 taam3 cak1 ji4，係種專門用嚟檢測啲人有冇帶咗易燃易爆或有害有毒或帶腐蝕性液體嘅檢測裝置。佢主要用嚟檢查人所帶啲行李入面，若果帶有樽裝或杯裝、罐裝啲液體，佢可以進一步繼續檢查啲液體係唔係存在威脅性。

液體檢測儀（右）

由來

初期好多人流密集嘅公眾場合同機密場所好少對待乘客究竟帶咗啲乜液體，即使係1987年11月29號同1994年12月11號先後爆發嘅大韓航空858號班機失事同菲律賓航空434號爆炸案都冇提到液體安檢嘅行為（除咗1995年1月21～22號間嗰單俾臥底舉報有液體炸彈裝置而穿煲之外）。2001年，由於美國爆出震驚全球嘅911事件發現到係阿蓋達組織所為，重喺2006年8月9號爆出震驚全球嘅跨大西洋航班恐怖襲擊陰謀之後，令美國同加拿大、英國等發達國家開始接受更加嚴格嘅安檢措施，包括將液體安檢列入到巡查範圍。隨後好多國家都一窩蜂噉開始借鑒歐美嘅嚴格安檢措施行為。

期間一直都冇檢查液體嘅相關檢測儀器，直到2009年10月20號，總部喺德國北萊茵－西法倫科隆行政區嘅于利希研究中心研發咗種可以喺短時間內查到入面裝嘅係乜液體嘅檢測儀重成功通過相關測試。隨後從2010年開始，逐漸喺各大人流密集嘅公眾場合同機密場所開始用呢套裝置。

原理

部份液體檢測儀成日出嗰兩隻符號。檢測液體時：
出現左圖嘅類似符號係證明液體係安全，可以通過。
出現右圖嘅類似符號係證明液體係危險，唔畀入閘。

液體檢測儀嘅主要原理有拉曼光譜、熒光淬滅技術、地面敏銳雷達技術、及介電常數呢四種技術檢測，但多數都圍繞X光斷層影相可以測到待測液體入面嘅導電物質嘅介電常數同傳導率，而得出液體係唔係易燃易爆或有害有毒或帶腐蝕性。佢同待測液體嘅所在容器嘥士、厚度，及檢測儀同容器之間嘅空氣間隙無關。

一般嚟講，若果測到嘅液體係安全嘅，檢測儀着綠燈兼冇聲響、顯示屏會顯示白底綠字或綠底白字嘅剔；若果測到嘅液體係危險嘅，檢測儀着紅燈兼有聲響、顯示屏會顯示白底紅字或紅底白字嘅交叉。

應用

液體檢測儀一般喺火車站、機場、地鐵、汽車客運站、港口、領事館、差館、消防局、法院、邊境站、軍隊、監獄、體育場館、戲院、大型會議場所，及部分圖書館、博物館、商場等人流密集或涉及機密嘅有關場所用到。