淘大工業村
淘大工業村（英文：Amoycan Industrial Centre）曾經係香港嘅大規模工業村，喺九龍牛池灣東南部，近牛頭角同九龍灣，1954年開始發展，係淘化大同（淘大）嘅生產基地，包括豉油廠、食品廠、汽水廠、紙廠、託兒所同員工宿舍等等，佔地超過20萬平方呎。隨住1978年淘大將工業村大部份用地賣畀恒隆集團改為發展住宅（即係淘大花園），工業村得返1961年起好嘅第一座無拆到，門牌地址係牛頭角道7號，樓高7層。近年淘大工業村第一座主要租戶係經營迷你倉業務嘅時昌迷你倉。
淘大工業村第一座先後發生過兩場四級大火。1965年2月10號，淘大工業村第一座5樓德星塑膠花廠發生四級大火，兩人受傷。2016年6月21號，淘大工業村第一座3樓時昌迷你倉又發生四級大火，燒咗四日半，建築結構受損，更造成兩名消防員殉職。2019年10月淘大工業村第一座獲批准清拆，改為起住宅。